ނޭޓޯގެ މެންބަރު ގައުމުތަކުގެ ވައިގެ ސަރަހައްދަށް ވަންނަ ރޫސީވިލާތުގެ އުޅަނދުތަކާއި ޑްރޯންތަކަށް ހަމަލާދީ ވައްޓާލުމުގެ ހުއްދަ، އިނގިރޭސިވިލާތުގެ ރޯޔަލް އެއަރ ފޯސް (އާރް.އޭ.އެފް) ގެ ހަނގުރާމަމަތީ ޖެޓްތަކަށް ދީފި ކަން ހާމަވެއްޖެ ކަމަށް ބައިނަލްއަޤްވާމީ އިތުބާރު ހުރި މަސްދަރަކުން ބުނެފިއެވެ.
އިނގިރޭސިވިލާތުން މި ގޮތަށް އެންގީ އިރުމަތީ ޔޫރަޕްގެ ގައުމެއް ކަމަށްވާ ރޫމޭނިއާގެ ވައިގެ ސަރަހައްދު ބެލެހެއްޓުމަށް ނޭޓޯއިން ކުރިއަށްގެންދާ "އެއަރ ޕޮލީސިން" މިޝަންގެ ދަށުންނެވެ.
މޮސްކޯއިން ދަނީ ނޭޓޯގެ މެމްބަރުން ސީދާ ހަނގުރާމައިގައި ބައިވެރިވާ ކަމަށް ބުނެ، ޔޫކްރޭނަށް ހުޅަނގުން ދޭ އެހީތައް ކުށްވެރިކުރަމުންނެވެ.
އިނގިރޭސިވިލާތަކީ 2022 ވަނަ އަހަރު ރަޝިޔާއިން ޔުކްރޭނަށް އަރައިގަތުމަށް ފަހު، ޔޫކްރޭނަށް ހުޅަނގުގެ އެންމެ ބޮޑު އެއް އެހީތެރިކަން ފޯރުކޮށްދޭ އެއް ގައުމެވެ.
ހަނގުރާމަ ފެށި ފަހުން މިހާތަނަށް އިނގިރޭސިވިލާތުން ވަނީ ޒެލެންސްކީގެ ސަރުކާރަށް ގާތްގަނޑަކަށް 21.8 ބިލިއަން ޕައުންޑާއި ހަމަޔަށް އެހީތެރުވެދޭން ނިންމާފައެވެ. މީގެ ތެރޭގައި ހަތިޔާރާއި، ވަޒަނާއި، ޔޫކްރޭންގެ ސިފައިން ތަމްރީނު ކުރުމާއި، ބަޖެޓް ސަޕޯޓާއި، ރިކޮންސްޓްރަކްޝަން ފަންޑިންގ ހިމެނެއެވެ. އަދި 2030-31 އާއި ހަމައަށް މަދުވެގެން އަހަރަކު ގާތްގަނޑަކަށް 3 ބިލިއަން ޕައުންޑްގެ އަސްކަރީ އެހީ ވެސް ޔުކްރޭނު ސަރުކާރަށް ދޭނެ ކަމަށް ބުނެފައި ވެއެވެ.
