އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން މާލޭގައި ސިލްސިލާކޮށް ބާއްވަމުންދާ މުޒާހަރާތަކުގެ ތެރެއިން، މިރޭ މާލެ ސިޓީގެ މޭޔަރު އާދަމް އާޒިމަށް މީހަކު ހަމަލާދީފި އެވެ.
ސޯޝަލް މީޑިއާގައި ދައުރުވަމުންދާ ވީޑިއޯ ފުޓޭޖުތަކުން ފެންނަ ގޮތުގައި، މި ހާދިސާ ހިނގާފައިވަނީ މުޒާހަރާ ކުރިއަށްދިޔަ ވަގުތު، މުޒާހަރާގެ ބޭރުން އައި މީހަކު އާޒިމަށް ހަމަލާދޭން އުޅުމުންނެވެ. އެ ވަގުތު މުޒާހަރާގެ ބައިވެރިއަކު އެ މީހާއަށް ހުރަސްއެޅި ނަމަވެސް، އެހިސާބުން ހަމަލާދިން މީހާއާއި މުޒާހަރާގެ ބައިވެރިންނާ ދެމެދު ވަރުގަދަ ކުރިމަތިލުންތަކެއް ހިނގާފައިވެ އެވެ. ވީޑިއޯތަކުން ފެންނަ ގޮތުގައި މި ހަމަލާތައް ކޮންޓްރޯލް ކުރުމަށް އެމްޑީޕީގެ ފަރާތުން އެއްވެސް މަސައްކަތެއް ކޮށްފައެއް ނުވެ އެވެ. އޭގެ ބަދަލުގައި އެ ސަރަހައްދުގެ އަމާންކަން ނަގާލަން އެމްޑީޕީ ސަޕޯޓަރުން މަސައްކަތްކުރި މަންޒަރުވެސް ވަނީ ފެނިފަ އެވެ.
މޭޔަރު އާޒިމަށް ހަމަލާދީފައިވަނީ އެމްޑީޕީއަށް ނިސްބަތްވާ ސަޕޯޓަރެއް ކަމެއް ނުވަތަ ޕާޓީ ތެރޭގައި އުފެދިފައިވާ ފެކްޝަނަކުން ފޮނުވި ބައެއްކަން އަދި ސާފެއް ނުވެ އެވެ. މި ހާދިސާ ހިނގާފައި މިވަނީ އެމްޑީޕީގެ އެތެރޭގެ މަސްލަހަތު ވަރަށް ބޮޑަށް ގޯސްވެ، ބޮޑެތި ކޯޅުންތަކެއް އުފެދިފައިވާ ދަނޑިވަޅެއްގަ އެވެ.
Advertisement
ޕާޓީ ތެރޭގެ ނުތަނަވަސްކަން ފުރަތަމަ ބޮޑުވެގެން ދިޔައީ، ލޯކަލް ކައުންސިލް އިންތިހާބުގެ ކާމިޔާބީ ފާހަގަކުރަން ބޭއްވި ޖަލްސާގައި ކުރީގެ ރައީސް މުހައްމަދު ނަޝީދަށް ވާހަކަ ދައްކަވަން ފުރުސަތު ނުދިނުމުން އެމަނިކުފާނު ޖަލްސާ ބޮއިކޮޓު ކުރެއްވި ހިސާބުންނެވެ. އޭގެ ފަހުން ޗެއާޕާސަންގެ އިންތިހާބާ ގުޅިގެން މުހައްމަދު ނަޝީދާއި މީކާއީލް އަހްމަދު ނަސީމްގެ ކެމްޕެއިން ޓީމުތަކުގެ ދެމެދުގައި ވަނީ ބަހުގެ ހަމަލާތައް ބަދަލުކުރަން ފަށާފަ އެވެ. އަދި ވޯޓުލެވޭ ދަފްތަރާ ގުޅިގެން ނަޝީދުގެ ފެކްޝަނުން ވަނީ ނުރުހުން ފާޅުކޮށްފަ އެވެ.
މި ހަލަބޮލިކަމުގެ ތެރެއިން، އެމްޑީޕީގެ އިސްތިއުނާފު ފަނޑިޔާރު މަޖިލީހުން މިހާރު ވަނީ ޗެއާޕާސަން ހޮވުމަށް ބާއްވާ އިންތިހާބު ބާތިލުކުރުމަށް އަންގާފަ އެވެ. އިސްތިއުނާފު ފަނޑިޔާރު މަޖިލީހުގެ ރައީސް އަހްމަދު އަބްދުﷲ އަފީފް، ވަގުތީ ޗެއާޕާސަން އަބްދުލްގަފޫރު މޫސާއަށް ފޮނުއްވި ސިޓީއެއްގައި ވިދާޅުވެފައިވަނީ، އިންތިހާބު ބޭއްވުމަށް ކުރި އިއުލާނަކީ އަސާސީ ގަވާއިދާ ހިލާފު ނިންމުމެއް ކަމަށެވެ. ގަވާއިދު ބުނާގޮތުން އިންތިހާބުގެ ކަންކަން ރާވައި ހިންގުމުގެ މަސްއޫލިއްޔަތު އޮންނަނީ އިސްތިއުނާފު ފަނޑިޔާރު މަޖިލީހުގެ ރައީސަށެވެ.
ކުރިއަށް އޮތް ރިޔާސީ ޕްރައިމަރީއަށް ތައްޔާރުވަމުންދާއިރު، އާދަމް އާޒިމް ރަސްމީކޮށް ވާދަކުރައްވާނެކަން އިއުލާނު ނުކުރެއްވި ނަމަވެސް، އޭނާ ވާދަކުރައްވާނެ ކަމަށް ބޮޑަށް ބެލެވެ އެވެ. މިހާތަނަށް ޕްރައިމަރީގައި ވާދަކުރައްވާނެކަން އިއުލާނު ކުރައްވާފައިވަނީ ރައީސް ސޯލިހާއި، ފައްޔާޒު އިސްމާއީލްގެ އިތުރުން އަހްމަދު ޝަމްހީދެވެ. އަދި ޕާޓީގެ ރައީސް އަބްދުﷲ ޝާހިދުވެސް ވާދަކުރައްވާނެ ކަމަށް ބެލެވެ އެވެ.
މޭޔަރު އާޒިމަށް ދިން ހަމަލާ ކުށްވެރިކުރައްވަމުން ޕާޓީގެ ވަގުތީ ޗެއާޕާސަން އަބްދުލް ގަފޫރު މޫސާ (ގަޕޯ) އެކްސްގައި ވިދާޅުވީ، ސުލްހަވެރި މުޒާހަރާއެއްގެ ތެރެއިން މޭޔަރަށް ދިން ހަމަލާ ހަރުކަށި އިބާރާތުން ކުށްވެރިކުރާ ކަމަށާއި، މި މައްސަލަ ތަހުގީގުކޮށް އާޒިމަށް ރައްކާތެރިކަން ކަށަވަރުކޮށްދިނުމަށް ފުލުހުންނަށް ގޮވާލާ ކަމަށެވެ.
