މިރެއަކީ ދިވެހި ރައްޔިތުންގެ ހައްގުގައި ރައީސް ޑރ. މުޙައްމަދު މުއިއްޒު އަނެއްކާވެސް ބޮޑު ގުރުބާނީއެއް ވެވަޑައިގެންނެވި ރެޔެއް ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެމްބަރު އިބްރާހިމް ޝުޖާއު ވިދާޅުވެއްޖެ އެވެ.
ޝުޖާއު މިހެން ވިދާޅުވީ ޕީއެންސީގެ ހަރުގޭގައި ބޭއްވި ހާއްސަ ޖަލްސާއެއްގަ އެވެ. މިއީ ނިމިދިޔަ ކައުންސިލް އިންތިހާބުގައި ހއ. ފިއްލަދޫއިން ކޮންގްރެސް ޕާޓީގެ ކެންޑިޑޭޓުން ހޯއްދެވި ކާމިޔާބީ ފާހަގަކުރުމަށް ބޭއްވި ޖަލްސާއެކެވެ.
މި ޖަލްސާގައި ވާހަކަފުޅު ދައްކަވަމުން ޝުޖާއު ވިދާޅުވީ، ނިމިދިޔަ ސަރުކާރުން އިންޑިއާއިން ނަގާފައިވާ ލޯނުތަކުގެ ތެރެއިން 400 މިލިއަން ޑޮލަރު މިރޭ ދައްކާފައިވާ ކަމަށެވެ. އަދި މި ހިނގާ މަސްތެރޭގައި ދިވެހި ރައްޔިތުންނަށްޓަކައި ގައުމަށް ލިބުނު ފައިސާގެ ތެރެއިން ޖުމްލަ 925 މިލިއަން ޑޮލަރުގެ ލޯނު ފައިސާ އިންޑިއާއަށް ދައްކާފައިވާކަން އޭނާ ފާހަގަކުރެއްވި އެވެ.
ރާއްޖޭގެ މާލީ ތާރީހަށް އަލިއަޅުވާލައްވަމުން ޝުޖާއު ވިދާޅުވީ، މި މަހުގެ 2 ވަނަ ދުވަހު 525 މިލިއަން ޑޮލަރުގެ ސުކޫކެއް ދައްކާފައިވާ ކަމަށާއި، މިއީ ރާއްޖޭގެ ތާރީހުގައިވެސް އެއް އަހަރެއްގެ ތެރޭގައި މިހާ ބޮޑު އަދަދެއްގެ ލޯނު ފައިސާ ދައްކަން ޖެހުނު ފުރަތަމަ ފަހަރު ކަމަށެވެ. އޭނާ ވިދާޅުވި ގޮތުގައި މި ހުރިހާ ލޯނުތަކަކީވެސް ނިމިދިޔަ އެމްޑީޕީ ސަރުކާރާއި އޭގެ ކުރީގެ ސަރުކާރުތަކުން ނަގާފައިވާ ދަރަންޏެވެ.
ރަށްރަށުގައި ފަށާފައިވާ ތަރައްގީގެ މަޝްރޫއުތައް ބޭނުންވާ ބާރުމިނުގައި ކުރިއަށް ނުގެންދެވި އޮތް ސަބަބަކީ މި ދަރަނިތައް ކަމަށް ޝުޖާއު ވިދާޅުވިއެވެ. "ނިމިދިޔަ ދެ އަހަރު ރައީސް ޑރ. މުއިއްޒު މަސައްކަތް ކުރެއްވީ އެމްޑީޕީ ސަރުކާރުން ނެންގެވި ލޯނުތައް ދެއްކުމުގައި،" ޝުޖާއު ވިދާޅުވިއެވެ.
ގައުމުގެ އިގްތިސާދީ ހާލަތު އެމްޑީޕީން މި ދަރަޖައަށް ވައްޓާލުމުން އެކަމުގެ ހިތާމަ ފާޅުކުރައްވަމުން ޝުޖާއު ވިދާޅުވީ، ރާއްޖޭގެ ރައްޔިތުން ރަށްރަށުގައި އުޅެމުންދަނީ ވަރަށް ދަތި ހާލުގައި ކަމަށެވެ. އަދި އިދިކޮޅު ފަރާތްތަކުން ބޭނުންވާ ބަދަލެއް މި ގައުމަށް މިހާރު ބޭނުން ނުވާ ކަމަށާއި، ރައްޔިތުން ބޭނުންވަނީ "ދިވެހީންގެ ރާއްޖެ" އަމާން އައްސޭރިއަކަށް ގެންގޮސް، މި ގައުމުގައި ހިތްހަމަޖެހުމާއެކު ދިރިއުޅެން ކަމަށްވެސް އޭނާ ވިދާޅުވި އެވެ.
