މިއުޒީޝަނުން ހިމެނޭހެން ރާއްޖޭގެ ހުރިހާ ފަންނުވެރިންނަށް ހާއްސަ ލޯނުތަކާއި ގްރާންޓުތައް ދިނުމަކީ ސަރުކާރުގެ މުހިންމު ސިޔާސަތެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް މިހެން ވިދާޅުވީ ނޫސްވެރިންގެ ބައްދަލުވުމެއްގައި، ބީއެމްއެލްގެ ސަބްސިޑަރީ އެސްއެމްއީ ޑިޖިޓަލް އިން ދޫކުރާ ލޯނުތަކުގައި މިއުޒީޝަނުންނަށް ފުރުސަތު ނެތުމާ ގުޅޭގޮތުން ކުރެވުނު ސުވާލަކަށް ޖަވާބު ދެއްވަމުންނެވެ.
ރައީސް ވިދާޅުވީ އެކި ސެކްޓާތަކަށް ކުދި އަދި މެދު ފަންތީގެ ލޯނު ދޫކުރުމުގެ ސިޔާސަތެއް ސަރުކާރުން ގެންގުޅޭ ކަމަށެވެ. އަދި ކުރިއަށް އޮތް ތަނުގައި އާޓިސްޓުންނާއި އެކި ފަންނުވެރިންނަށް ފުރުސަތުތައް އޮތް ގޮތް ބައްލަވާނެ ކަމަށް ވެސް އެމަނިކުފާނު ވިދާޅުވި އެވެ.
"ކުރިއަށް އޮތް ތަނުގައި އަޅުގަނޑުމެން ބަލާނަން ކިހިނެއްތޯ މިހާރު ޖުމްލަކޮށް އާޓިސްޓުންނަށް އެކިއެކި ފަންނުވެރިންނަށް ފުރުސަތުތައް ދިނުން އޮތީ. ސަރުކާރުގެ ސީދާ ބަޖެޓުން ވެސް، މިއުޒިކް ކުޅޭ ފަރާތްތަކެއް ނޫން، އާޓިސްޓުންނަށް ނުވަތަ ކުރަހާ ފަރާތްތަކަށް ހާއްސަ ގްރާންޓެއް ދިނުން ވެސް އެބައޮތް. އެހެންވީމަ، ފަންނުތައް، އެކި ކަހަލަ އާޓްތަކުގައި މަސައްކަތް ކުރާ ފަރާތްތަކަށް އެކި ކަހަލަ ލޯނުތަކާއި ގްރާންޓުތައް ދިނުމަކީ ސަރުކާރުގެ ސިޔާސަތު،" ރައީސް ވިދާޅުވި އެވެ.
އެސްއެމްއީ ޑިޖިޓަލްގެ ކޮންޓެންޓް ކްރިއޭޓާ ފައިނޭންސިން ސްކީމް މިހާރު ޓާގެޓުކޮށްފައި ވަނީ ކޮންޓެންޓް ކްރިއޭޓަރުންގެ އިތުރުން ފިލްމު ޕްރޮޑިއުސަރުންނަށެވެ. އިސްލާމިކް ފައިނޭންސިން އުސޫލުގެ ދަށުން އެކުލަވާލާފައިވާ އެ ސްކީމްގެ ދަށުން 25,000 ރުފިޔާ އާއި 500,000 ރުފިޔާ އާ ދެމެދުގެ އަދަދަކަށް ފައިނޭންސިން ދޫކުރެ އެވެ.
މީގެ އިތުރުން، އިސްލާމިކް މައިކްރޯ ފައިނޭންސިންގެ ނަމުގައި ތައާރަފުކޮށްފައިވާ ހާއްސަ ސްކީމެއްގެ ދަށުން ވެސް ކުދި ވިޔަފާރިތަކަށް އެސްއެމްއީ ޑިޖިޓަލް އިން ލޯނު ދޫކުރެ އެވެ. މި ސްކީމްގެ ދަށުން 100,000 ރުފިޔާ އާ ހަމައަށް ފައިނޭންސިން ހަމަޖައްސައިދޭއިރު، ފައިސާ ދެއްކުމަށް 10 އަހަރުގެ މުއްދަތެއް ލިބެ އެވެ. އަދި މި މުއްދަތުގެ ތެރޭގައި 12 މަސްދުވަހުގެ ގްރޭސް ޕީރިއަޑެއް ވެސް ލިބިގެންދެ އެވެ.
މި ސްކީމްތަކަކީ މޯލްޑިވްސް އިސްލާމިކް ސޯޝަލް ފައިނޭންސިން އިނިޝިއޭޓިވް (މިސްފީ) ގެ ދަށުން ކުރިއަށް ގެންދާ ހަރަކާތްތަކެކެވެ. ސަރުކާރުގެ އަމާޒަކީ މިފަދަ ސްކީމްތަކުގެ ތެރެއިން ހުރިހާ ދާއިރާއެއްގެ ފަންނުވެރިންނަށް ވެސް މާލީ އެހީތެރިކަން ފޯރުކޮށްދިނުމެވެ.
