ސަރުކާރުގެ އެކި މިނިސްޓްރީތަކަށް ކުރިމަގުގައި އައްޔަންކުރާ ސްޓޭޓް މިނިސްޓަރުންނާއި ޑެޕިއުޓީ މިނިސްޓަރުންގެ ތައުލީމީ ފެންވަރަށް ބައްލަވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ، ކުރިއަށް އޮތް ތަނުގައި ސިޔާސީ މަގާމުތަކަށް މީހުން އައްޔަން ކުރައްވާއިރު ތައުލީމީ ފެންވަރާއި ތަޖުރިބާ އަށް ވަރަށް ބޮޑަށް ބައްލަވާނެ ކަމަށެވެ.
ރައީސް މުއިއްޒު ވިދާޅުވި ގޮތުގައި، ސަރުކާރުގެ މިނިސްޓްރީތަކަށް މީގެ ފަހުން އައްޔަނުކުރާ ސްޓޭޓް މިނިސްޓަރުންނަކީ މާސްޓާސް ޑިގްރީ އޮތް ބޭފުޅެއްތޯ އަދި ޑެޕިއުޓީ މިނިސްޓަރުންނަކީ ޑިގްރީއެއް އޮތް ބޭފުޅެއްތޯ ބަލާނެ އެވެ. މިއީ ރައްޔިތުންގެ ވިންދާ އެއްގޮތަށް ސަރުކާރުގެ ހިންގުމަށް ގެންނަވާ ބަދަލުތަކުގެ ތެރެއިން ނިންމެވި ކަމެއް ކަމަށް އެމަނިކުފާނު ފާހަގަކުރެއްވި އެވެ.
"އަޅުގަނޑު ކުރިއަށް އޮތް ތަނުގައި އިތުރަށް ބަލާނަން، މެރިޓް، އެ މީހާގެ ތައުލީމީ ފެންވަރާއި ތަޖުރިބާ އަށް. މިސާލަކަށް އަޅުގަނޑުގެ ވިސްނުމަކު ކުރިއަށް އޮތް ތަނުގައި ނެތް އެއްގޮތަކަށް ވެސް މިސާލަކަށް ސްޓޭޓް މިނިސްޓަރަކަށް މީހަކު ކޮންމެހެން ލާން ޖެހިއްޖެއްޔާ ލާންޖެހޭ ފަހަރެއްގައި ވެސް އެ މީހާ އަތުގައި މިސާލަކަށް މާސްޓާސް ޑިގްރީއެއް އޮތްތޯ ބެލުން،" ރައީސް ވިދާޅުވި އެވެ.
މީގެ އިތުރުން ޑެޕިއުޓީ މިނިސްޓަރުންގެ ފެންވަރާ ގުޅޭގޮތުން ރައީސް ވިދާޅުވީ، "ޑެޕިއުޓީ މިނިސްޓަރަކަށް ކޮންމެހެން އެ ތަނަކަށް ބޭނުންވާ މީހަކު ލާންޖެހޭ ހާލަތުގައި ވެސް އެ މީހާ އަތުގައި އެކަމާ ބެހޭ ދާއިރާ އިން ޑިގްރީއެއް އޮތްތޯ ބެލުން. މިކަހަލަ ރަފް މިންގަނޑެއް ގެންގުޅެން އަޅުގަނޑު ވިސްނާފައި މި އޮތީ،" މި ބަދަލާއެކު ގާނޫނުއަސާސީން ލިބިފައިވާ ބާރުގެ ދަށުން ސިޔާސީ މަގާމުތަކަށް އައްޔަން ކުރާއިރު ތައުލީމުގެ އިތުރުން ތަޖުރިބާއަށް ވެސް ބަލާނެ ކަމަށް އެމަނިކުފާނު ވިދާޅުވި އެވެ.
ސަރުކާރުގެ ހަރަދު ކުޑަކުރުމުގެ ސިޔާސަތުގެ ދަށުން، ޕާފޯމަންސް އަށް ބަލައި ސިޔާސީ މުވައްޒަފުން މަދުކުރުމުގެ މަސައްކަތް ކުރިއަށްދާނެ ކަމަށް ވެސް ރައީސް ވިދާޅުވި އެވެ. އަދި ހަމައެއާއެކު، ސަރުކާރުގެ ކުންފުނިތަކުގެ މުވައްޒަފުންގެ އަދަދު 33 ޕަސެންޓު މަދުކުރުމުގެ މަސައްކަތް ވެސް ކުރިއަށް ގެންދާނެ ކަމަށް ރައީސް މިއަދު އިއުލާނު ކުރެއްވި އެވެ.
