އިއްޔެ ހުރްމުޒް ކަނޑުއޮޅި ކައިރިން އީރާނުގެ ދިދަ ޖަހާފައިވާ ކޮންޓެއިނަރު އުފުލާ އެމްވީ ޓޫސްކާ އަތުލައިގެންފިއެވެ.
ބައިނަލްއަގްވާމީ ރިޕޯޓްތައް ބުނާ ގޮތުގައި ގާތްގަނޑަކަށް 295 މީޓަރުގެ ދިގުމިނުގެ އެ އުޅަނދު ހުއްޓުވީ އެމެރިކާ އިން ދޭ އިންޒާރުތަކަށް އަޅާނުލައި ދަތުރުކުރަމުން ދިޔުމުން ކަމަށް ބުނެއެވެ.
މި ބޯޓަކީ ބައިނަލްއަގްވާމީ ދަތިކުރުމުގެ ފިޔަވަޅުތަކުގެ ދަށުން އީރާނުގެ ކުންފުންޏެއް ކަމަށްވާ އިސްލާމިކް ރިޕަބްލިކް އޮފް އީރާން ޝިޕިން ލައިންސް އިން ހިންގާ ބޯޓެއް ކަމަށް އެމެރިކާ އިން ބުނެއެވެ. އޮފިޝަލުން ބުނާ ގޮތުގައި އެ އުޅަނދަކީ ޗައިނާއިން ދަތުރުކުރި އުޅަނދެއް ކަމަށާއި އެ އުޅަނދުގައި އެތައް ހާސް ޝިޕިން ކޮންޓެއިނަރުތަކެއް އުފުލާފައިވާ ކަމަށެވެ.
ބައެއް މަސްދަރުތަކުން ލަފާކުރާ ގޮތުގައި އެ ބޯޓުގައި ތިބީ ގާތްގަނޑަކަށް 20 އާއި 30 އާއި ދެމެދުގެ އަދަދަކަށް ފަޅުވެރިންނެވެ.
އެމެރިކާ އިން ޝައްކު ކުރަނީ އެ ބޯޓުގައި ސިނާއީ ކެމިކަލްތައް ހުރި ކަމަށާއި، މިސައިލް ފިއުލް އުފެއްދުމާ ގުޅުން ހުރި ތަކެތި ހިމެނޭ ކަމަށެވެ.
ތެހެރާނުން މިކަން ސިފަ ކުރަނީ ކަނޑު ފޭރޭ ޢަމަލެއްގެ ގޮތުގައެވެ.
