އިނގިރޭސި ޕްރިމިއާ ލީގުގެ ތަށި ހޯދުމުގެ ރޭހުގައި ނުހަނު މުހިންމު މެޗެއްގައި، މެންޗެސްޓަރ ސިޓީން އާސެނަލްގެ މައްޗަށް ކުރިހޯދައި ލީގު ތަށި ދިފާއުކުރުމުގެ އަމިއްލަ ބާރު ހޯދައިފިއެވެ. ފޯރިގަދަ ކުޅުމެއް ފެނިގެންދިޔަ މި މެޗުން ސިޓީ މޮޅުވުމާއެކު، އާސެނަލާއި ސިޓީއާ ދެމެދު އޮތް ފަރަގު މިވަނީ ތިން ޕޮއިންޓަށް ކުޑަވެފައެވެ.

އިއްތިހާދު ސްޓޭޑިއަމްގައި ކުޅުނު މި މެޗުގެ ފުރަތަމަ ހާފުގައި ރަޔާން ޗެރްކީ ވަނީ އާސެނަލްގެ ޑިފެންޑަރުން ކައިރިން ނައްޓާލުމަށްފަހު ހިތްގައިމު ލަނޑެއް ޖަހައި ސިޓީއަށް ކުރިހޯދައިދީފަ އެވެ. ނަމަވެސް، ސިޓީގެ ކީޕަރު ޖިއަންލުއިޖީ ޑޮނަރުއްމާ ހެދި ގޯހެއްގެ ފައިދާ ނަގައި، އާސެނަލްގެ ކައި ހާވާޓްޒް ވަނީ ލަނޑެއް ޖަހައި ނަތީޖާ އެއްވަރުކޮށްފަ އެވެ.

މެޗުގެ ފޯރިގަދަވީ ދެވަނަ ހާފުގައެވެ. އާސެނަލްގެ އެބެރެޗީ އެޒޭ ފޮނުވާލި ހަމަލާއެއް ގޯލުގެ ދަނޑިއަށް އަމާޒުވިއިރު، ހާވާޓްޒްއަށް ލިބުނު ރަނގަޅު ފުރުސަތުތަކެއް ޑޮނަރުއްމާ ވަނީ ދިފާއުކޮށްފައެވެ. ސިޓީއަށް މެޗުން ތިން ޕޮއިންޓް ކަށަވަރުކޮށްދިނީ ތަރި އާލިން ހާލަންޑެވެ. ހާލަންޑް މި ލަނޑު ޖެހީ އާސެނަލްގެ ޑިފެންޑަރު ގަބްރިއެލްއާއެކު ދަނޑުމަތީގައި ބޮޑު ކުރިމަތިލުމެއް ހިނގަމުން ދަނިކޮށެވެ. މި ކުރިމަތިލުމުގެ ތެރޭގައި ގަބްރިއެލް ވަނީ ހާލަންޑްގެ ޖާޒީގެ އަތްވައްޓާލާފަ އެވެ. އަދި ދެ ކުޅުންތެރިން ބޮލާއި ބޯ ޖައްސައި ހިންގި ހަމަނުޖެހުމާ ގުޅިގެން ރެފްރީ ވަނީ ދެ ކުޅުންތެރިންނަށް ރަތް ކާޑުގެ ބަދަލުގައި ރީނދޫ ކާޑެއް ދައްކާފަ އެވެ.

މި ނަތީޖާއާއެކު، އާސެނަލް މިވަނީ ތާވަލުގެ އެއްވަނައިގައި ނުރައްކަލެއްގެ ތެރޭގަ އެވެ. ސިޓީއަށް އާސެނަލަށްވުރެ އެއް މެޗު މަދުން ކުޅެން އޮތްއިރު، އަންނަ ބުދަ ދުވަހުގެރޭ ބާންލީއާ ބައްދަލުކުރާ މެޗުން މޮޅުވެއްޖެނަމަ ޕެޕް ގާޑިއޯލާގެ ޓީމަށް ތާވަލުގެ އެއްވަނައަށް އެރުމުގެ ފުރުސަތު އެބައޮތެވެ.

އާސެނަލްގެ ކޯޗު މިކޭލް އާޓެޓާގެ ޓީމުން މި މެޗުގައި ރަނގަޅު ކުޅުމެއް ދެއްކި ނަމަވެސް، ނަތީޖާ ނެރުމުގައި ނަސީބު އެހީތެރިއެއް ނުވި އެވެ. އާސެނަލްގެ ދެން އޮތް މެޗަކީ އަންނަ ހޮނިހިރު ދުވަހު ނިއުކާސަލް ޔުނައިޓެޑާ ދެކޮޅަށް ކުޅޭ މެޗެވެ. އެ މެޗަށް ނުކުންނައިރު އާސެނަލް ތާވަލުގެ ދެވަނައަށް ވެއްޓުމުގެ ބިރު މިހާރު ވަނީ ބޮޑުވެފަ އެވެ.