ވެލާނާ އިންޓަރނޭޝަނަލް އެއަރޕޯޓް (ވީއައިއޭ) ހިންގާ ކުންފުނި، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ 60 ވަނަ އަހަރީ ދުވަސް ފާހަގަކުރުމުގެ ގޮތުން ހާއްސަ ހަރަކާތްތަކެއް މިއަދު ވީއައިއޭގައި ކުރިއަށް ގެންގޮސްފި އެވެ.
މިއަދުގެ ހަރަކާތްތައް ފެށިގެންދިޔައީ ހެނދުނު 6:00 ގައި ޓާރމިނަލް 1 ކުރިމަތީގައި ބޭއްވި ދިދަ ނެގުމުގެ ރަސްމިއްޔާތަކުންނެވެ. ދިދަ ނަންގަވައިދެއްވީ ކުންފުނީގެ ޗީފް އެގްޒެކެޓިވް އޮފިސަރު އަދި މެނޭޖިން ޑިރެކްޓަރު އިބްރާހިމް ޝަރީފު މުހައްމަދު އާއި ޑެޕިއުޓީ މެނޭޖިން ޑިރެކްޓަރު މުޖުތަބާ ލަތީފް އެވެ. ދިދަ ނެގުމުގެ ރަސްމިއްޔާތުގައި ކުންފުނީގެ ޑެޕިއުޓީ މެނޭޖިން ޑިރެކްޓަރު މުހައްމަދު ލަމްއާންގެ އިތުރުން އެމްއޭސީއެލްގެ އިސްވެރިންނާއި ގިނަ އަދަދެއްގެ މުވައްޒަފުން ބައިވެރިވެވަޑައިގެންނެވި އެވެ. ދިދަ ނެގުމުގެ ރަސްމިއްޔާތަށްފަހު ދުވަހާ ގުޅޭ ހާއްސަ ކޭކެއްވެސް ވަނީ ފަޅައިފަ އެވެ.
ދިދަ ނެގުމުގެ ރަސްމިއްޔާތަށްފަހު ކުންފުނީގެ މެނޭޖުމަންޓުގެ ބޭފުޅުންނާއި ޑިޕާޓްމަންޓްތަކުގެ އިސްވެރިން ވަނީ ކުންފުނީގެ ހުރިހާ ޑިޕާޓްމަންޓަކަށް ޒިޔާރަތް ކުރައްވައި، މުވައްޒަފުންނާ ބައްދަލުކުރައްވައި، ދުވަހުގެ ތަހުނިޔާ ވިދާޅުވެ ހިތްވަރު ދެއްވައިފަ އެވެ.
ވީއައިއޭގެ 60 ވަނަ އަހަރީ ދުވަހުގެ ހަރަކާތްތައް ނިންމާލުމުގެ ގޮތުން، ހަވީރު ހާއްސަ ރަސްމިއްޔާތަކާއެކު ހަވީރުގެ ސައެއްވެސް ވަނީ ބާއްވައިފަ އެވެ. މި ރަސްމިއްޔާތުގައި، ވީއައިއޭގެ 60 ވަނަ އަހަރީ ދުވަހުގެ ލޯގޯ ޑިޒައިން ކުރުމަށް ހުޅުވާލި މުބާރާތުން އެއްވަނަ ހޯދި މުވައްޒަފަށާއި، ޑިޕާޓްމަންޓްތަކަށް ހުޅުވާލައިގެން ބޭއްވި ޒީނަތްތެރިކުރުމުގެ މުބާރާތުން އެއްވަނައަށް ދިޔަ ޑިޕާޓްމަންޓަށް ވަނީ ހާއްސަ އިނާމުތަކެއް ދީފަ އެވެ. މި އިނާމުތައް ހަވާލުކޮށްދެއްވީ ކުންފުނީގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފު މުހައްމަދު އެވެ.
ވީއައިއޭ ހިންގަން ފަށައިގެން 60 އަހަރު ފުރުމަކީ ދިވެހިރާއްޖޭގެ ވައިގެ ދަތުރުފަތުރުގެ ތާރީހުގައި ފާހަގަކޮށްލެވޭ މުހިންމު ލަނޑުދަނޑިއެކެވެ. ވީއައިއޭ ހިންގާ ކުންފުނި، އެމްއޭސީއެލް ވަނީ ފާއިތުވި ދިގު ތާރީހެއްގައި ރާއްޖޭގެ ވައިގެ ދަތުރުފަތުރުގެ ދާއިރާ ތަރައްގީ ކުރުމަށާއި، ފަތުރުވެރިކަމުގެ ސިނާއަތު ކުރިއެރުވުމަށް އިންތިހާ ދަރަޖައިގެ ހިދުމަތްތަކެއް ކޮށްދީފަ އެވެ. ރާއްޖެ އަންނަ ފަތުރުވެރިންނާއި ދިވެހިންގެ ދަތުރުފަތުރަށް ލުއިފަސޭހަ ކޮށްދިނުމުގައި ވީއައިއޭ އަދާކުރަމުން އަންނަ ދައުރަކީ ގައުމީ ތަރައްގީގެ ރިކޯޑުތަކުގައި ފެވިފައިވާ ދައުރެކެވެ.
