މާލޭގެ ވަށައިގެންވާ ބޭރުތޮށި މަރާމާތު ކުރުމުގެ އަމަލީ މަސައްކަތް އަންނަ މެއި މަހުގެ ތެރޭގައި ފެށޭނެ ކަމަށް ކޮންސްޓްރަކްޝަން މިނިސްޓްރީން މަކޮށްފިއެވެ.
މި ބިޔަ މަޝްރޫއު ކުރިއަށް ގެންދިއުމަށް ހަމަޖެހިފައިވަނީ އޭޝިޔާ ބައްރުގައި ކޮންސްޓްރަކްޝަން ސައިންސާއި ޑިޒާސްޓާ ރެސިލިއަންސަށް ހާއްސަ ކުންފުންޏެއް ކަމަށްވާ ޖަޕާންގެ ޓޯޔޯ ކޮންސްޓްރަކްޝަން އާ ހަވާލުކޮށްގެންނެވެ.
މާލޭގެ ބޭރުތޮށި މަރާމާތުކުރަން ސަރުކާރުން ނިންމީ ޒަމާންތަކެއްވެފައިވާ މިތޮށިގަނޑަށް އެކިވަރުގެ ގެއްލުންތައްވެފައިވާތީއެވެ. މިހާރު ބޭނުން ކުރެވެމުންދާ ބޭރު ތޮއްޓަކީ 1988 އިން ފެށިގެން 2002 އާ ހަމައަށް ހަތަރު ފިޔަވައްސަކަށް ބަހާލައިގެން ބިނާކޮށްފައިވާ ތޮށިގަނޑެކެވެ.
މި މަޝްރޫޢަކީ ދިވެހި ސަރުކާރުން ޖަޕާން ސަރުކާރުގެ އެހީތެރިކަމަށް އެދުމުން، އެ ގައުމުން އިޖާބަދީގެން ކުރިއަށްގެންދާ މަސައްކަތެކެވެ. މިކަމުގެ އެއްބަސްވުމުގައި ޓޯޔޯ ކުންފުންޏާއެކު ސޮއިކޮށްފައިވަނީ މިދިޔަ ފެބުރުއަރީ މަހުގެ ތެރޭގައެވެ.
މަޝްރޫއުގެ ދަށުން ކުރިއަށްދާނެ މުހިންމު މަސައްކަތްތައް:
- ރާޅުގަނޑު ސަރަހައްދުން ފެށިގެން ސިޓްރޯން ރެސްޓޯރަންޓާ ހަމައަށްވާ ތޮށިގަނޑު ރީ-ޕްރޮފައިލް ކުރުން
- ކިންގް ސަލްމާން މިސްކިތް ހިމެނޭ ސަރަހައްދުގެ ތޮށިގަނޑު 70 ސެންޓިމީޓަރު އުސްކޮށް، ރީ-ޕްރޮފައިލް ކުރުން
- ބޭންކް އޮފް މޯލްޑިވްސް ކުރިމަތީގައިވާ ތޮށިގަނޑު މަރާމާތުކޮށް ރީ-ޕްރޮފައިލް ކުރުން
- މާލޭގެ 16 ޕަމްޕް ސްޓޭޝަނެއް މަރުކަޒީކޮށް މޮނިޓާ ކުރެވޭނެ ނިޒާމެއް ގާއިމުކުރުން
މި މަޝްރޫއު ނިމުމުން ރާޅުގަނޑު ސަރަހައްދުން ފެށިގެން ނޯތު ހާބަރާއި ރަސްފަންނު އަދި ސުނާމީ ބިނާ ހިމެނޭ ސަރަހައްދަށް ދިމާވެފައިވާ އުދައެރުމުގެ މައްސަލައަށް ދާއިމީ ހައްލެއް ލިބިގެންދާނެއެވެ. މާލޭގެ އިރުމަތީ ފަރާތަކީ މޫސުން ބަދަލުވާ ދުވަސްވަރު އާދަޔާ ހިލާފަށް އުދައެރުމުގެ މައްސަލަ ބޮޑު ސަރަހައްދަކަށް ވާއިރު، މި މަސައްކަތާއެކު މާލޭގެ މަލަމައްޗަށްވެސް ބޮޑު ބަދަލެއް އަންނާނެއެވެ.
