ރާއްޖެއަށް މިހާރު ކުރިމަތިވެފައިވާ ހޫނުގަދަ ދުވަސްތަކަކަށް ފަހު، ކުރިއަށް އޮތް އަންގާރަ ދުވަހުން ފެށިގެން ރާއްޖޭގެ އެކި ހިސާބަށް ވިއްސާރަ ކުރާނެ ކަމަށް މޫސުމާބެހޭ ގައުމީ އިދާރާ (މެޓް އޮފީސް) އިން ލަފާކޮށްފިއެވެ.

މެޓް އޮފީހުން މި ހަފުތާގެ މޫސުން ލަފާކުރާ ގޮތަށް ބަލާއިރު، ކުރިއަށް އޮތް ފަސް ދުވަހު ރާއްޖޭގެ އެކި ހިސާބަށް ވިއްސާރަ ކުރާނެއެވެ. މި ވިއްސާރައިގެ އަސަރު އެންމެ ބޮޑަށް ކުރާނެ ކަމަށް ލަފާކުރެވެނީ ދެކުނާއި މެދުރާއްޖެތެރޭގެ އަތޮޅުތަކަށެވެ. އަދި ބުދަ ދުވަހުން ފެށިގެން އުތުރުގެ ސަރަހައްދުތަކަށް ވެސް ކެރީގެ އަސަރު ފޯރާނެ ކަމަށް އެ އިދާރާއިން ލަފާކުރެއެވެ.

މެޓުން ހާމަކުރި ގޮތުގައި، އުތުރާއި މެދުތެރޭގެ އަތޮޅުތަކަށް ވައިޖެހޭނީ ހުޅަނގުދެކުނާއި ހުޅަނގުން ގަޑިއަކު 4 މޭލާއި 10 މޭލާ ދެމެދުގެ ބާރުމިނުގައެވެ. ދެކުނުގެ އަތޮޅުތަކަށް ވެސް ހުޅަނގުދެކުނާއި ހުޅަނގުން ގަޑިއަކު 3 މޭލާއި 10 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާކުރެވެއެވެ. މި ދުވަސްވަރު ކަނޑުތައް އާދައިގެ ވަރަކަށް ގަދަވާނެ ކަމަށް ވެސް އެ އިދާރާއިން ވިދާޅުވިއެވެ.

މި ހަފުތާގައި ވިއްސާރަ ކުރި ނަމަވެސް، ހޫނު މޫސުން އަދި ނުނިމޭ ކަމަށް މެޓް އޮފީހުން ފާހަގަކުރެއެވެ. ދޭތެރެއަކުން ވިއްސާރަ ކުރިޔަސް، އެޕްރީލް މަހުގެ ނިޔަލަށް ހޫނުގަދަ ވާނެ ކަމަށާއި އަދި މިހާރު ކުރަން އުޅޭ ވިއްސާރައަކީ މާ ދިގުދެމިގެންދާނެ ވިއްސާރައެއް ނޫން ކަމަށް ވެސް އެ އިދާރާއިން މައުލޫމާތު ދެއެވެ.

މިއީ ރާއްޖެއަށް އާންމުކޮށް ވެސް އެންމެ ހޫނުގަދަ ދުވަސްވަރު ކަމަށްވާއިރު، މިދިޔަ މަހުން ފެށިގެން އިހުސާސް ކުރެވޭ ހޫނުމިން ވަނީ ވަރަށް ބޮޑަށް މަތިވެފައެވެ. މިހާރު ވެސް ރާއްޖޭގެ ބޮޑު ބަޔަކަށް އިހުސާސް ކުރެވޭ ހޫނުމިން ހުރީ 37 ޑިގްރީ ސެލްސިއަސްއަށް ވުރެ މަތީގައެވެ.