ފަރަންސޭސިވިލާތުގެ ސަރުކާރުން ލުބުނާނުގެ އަސްކަރިއްޔާ ވަރުގަދަކުރުމަށް އެހީތެރިވުމުގެ ގޮތުން 39 އަސްކަރީ އުޅަނދު އެ ގައުމަށް ފޯރުކޮށްދީފިއެވެ.
މި އުޅަނދުތައް ލުބުނާނުގެ އަސްކަރިއްޔާއާ ހަވާލުކުރުމުގެ ރަސްމިއްޔާތު ބާއްވާފައިވަނީ ބައިރޫތުގެ ބަނދަރުގައެވެ. މި ރަސްމިއްޔާތުގައި ލުބުނާނުގައި ހުންނަވާ ފަރަންސޭސި ސަފީރާއި ލުބުނާނުގެ އަސްކަރިއްޔާގެ އިސްވެރިން ބައިވެރިވެވަޑައިގެންނެވިއެވެ.
މި އެހީގެ ދަށުން ފޯރުކޮށްދީފައިވަނީ "ވީބީއެލް" (VBL) މަރުކާގެ ހަތިޔާރު އެޅި އުޅަނދުތަކެކެވެ. މި އުޅަނދުތަކަކީ ލުބުނާނުގެ ސިފައިން ގައުމުގެ ސަލާމަތާއި ރައްކާތެރިކަން ބެލެހެއްޓުމަށާއި، ބޯޑަރުތައް ހިމާޔަތްކުރުމަށް ކުރަމުންދާ މަސައްކަތްތަކަށް ލިބިގެންދާނެ ބޮޑު ކުރިއެރުމެއް ކަމަށް ދެ ގައުމުން ފާހަގަކުރެއެވެ.
ފަރަންސޭސިވިލާތުން މިފަދަ އެހީއެއް ފޯރުކޮށްދީފައިވަނީ ލުބުނާނަށް ކުރިމަތިވެފައިވާ އިގްތިސާދީ ދަތިތަކުގެ ސަބަބުން އެ ގައުމުގެ އަސްކަރިއްޔާ ހިންގުމަށް ކުރިމަތިވެފައިވާ ގޮންޖެހުންތަކުން އަރައިގަތުމަށް އެހީތެރިވުމުގެ މަގްސަދުގައެވެ. ލުބުނާނުގެ ހަމަޖެހުމަކީ މުޅި ސަރަހައްދުގެ ސަލާމަތަށް މުހިންމު ކަމެއް ކަމަށް ވާތީ، ފަރަންސޭސިވިލާތުން ދަނީ މެދުނުކެނޑި އެ ގައުމުގެ އަސްކަރިއްޔާއަށް އެކި ގޮތްގޮތުން އެހީތެރިކަން ފޯރުކޮށްދެމުންނެވެ.
މިދިޔަ އަހަރުތަކުގައިވެސް ފަރަންސޭސިވިލާތުން ވަނީ ލުބުނާނުގެ އަސްކަރިއްޔާއަށް ބޭނުންވާ ތަމްރީނާއި، މާލީ އެހީތެރިކަމުގެ އިތުރުން ތަފާތު އަސްކަރީ ސާމާނު ފޯރުކޮށްދީފައެވެ.
