ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ ޓެކްސީވޭގެ ގޮތުގައި މިހާރު ބޭނުންކުރަމުން އަންނަ ޓެކްސީވޭ-ޗާލީ އަލުން ތަރައްގީ ކުރުމުގެ މަޝްރޫއުގެ ތިންވަނަ ފިޔަވަހީގެ އަމަލީ މަސައްކަތް ފަށައިފިއެވެ.
މި މަޝްރޫއަކީ އެއާޕޯޓުގެ އިންފްރާސްޓްރަކްޗާ ވަރުގަދަކުރުމަށް ކުރިއަށްގެންދާ މުހިންމު މަސައްކަތެކެވެ. މި މަޝްރޫއުގެ މަސައްކަތް ހަވާލުކޮށްފައިވަނީ ވީއައިއޭގެ ތަރައްގީގެ ބޮޑެތި މަސައްކަތްތައް މީގެ ކުރިންވެސް ކޮށްފައިވާ ޗައިނާގެ ބެއިޖިން އާބަން ކޮންސްޓްރަކްޝަން ގުރޫޕް (ބީޔޫސީޖީ) އާއެވެ. އެ ކުންފުންޏާއެކު މި މަޝްރޫއުގެ އެއްބަސްވުމުގައި ސޮއިކޮށްފައިވަނީ 16 އޮކްޓޯބަރު 2024 ގައެވެ. މަޝްރޫއުގެ އަމަލީ މަސައްކަތް ރަސްމީކޮށް ފަށާފައިވަނީ 10 އޭޕްރިލް 2025 ގައެވެ.
އެމްއޭސީއެލް އިން މައުލޫމާތު ދޭގޮތުގައި ޖުމްލަ ހަތަރު ފިޔަވައްސަކަށް ބަހާލައިގެން ކުރިއަށްގެންދާ މި މަޝްރޫއުގެ ތިންވަނަ ފިޔަވަހީގެ ދަށުން ޓެކްސީވޭ-ޗާލީގެ 1,100 މީޓަރުގެ ސަރަހައްދެއް އަލުން ތަރައްގީ ކުރާނެއެވެ. ތާވަލުކޮށްފައިވާ ގޮތުން މި ފިޔަވަހީގެ މަސައްކަތްތައް މިއަހަރުގެ އޮކްޓޫބަރު މަހުގެ ނިޔަލަށް އެއްކޮށް ނިންމާލެވޭނެއެވެ.
Advertisement
3,200 މީޓަރުގެ ދިގުމިން ހުންނަ ޓެކްސީވޭ-ޗާލީއަކީ ތާރީހީ ގޮތުން ބަލާއިރު 1976 ވަނަ އަހަރު ހެދި ވީއައިއޭގެ އެންމެ ފުރަތަމަ ރަންވޭއެވެ. މި ރަންވޭ ވައިޑް ބޮޑީ މަތިންދާބޯޓު ޖެއްސޭ ފެންވަރަށް ތަރައްގީ ކުރީ 1981 ވަނަ އަހަރުއެވެ. އޭގެ ފަހުން އެކި ފަހަރު މަތިން ރަންވޭ ދިގުކޮށް މަރާމާތު ކުރެވިފައިވާއިރު، ހާއްސަކޮށް 2004 ވަނަ އަހަރުގެ ސުނާމީ ކާރިސާގައި ލިބުނު ގެއްލުންތަކާ ގުޅިގެން ގިނަ މަރާމާތުތަކެއް ކުރަން ޖެހުނެވެ.
މި ރަންވޭ ޓެކްސީވޭއަކަށް ބަދަލުކޮށްފައިވަނީ އޮކްޓޯބަރު 2022 ގައެވެ. އެއީ މިހާރު ވީއައިއޭގައި ބޭނުންކުރަމުން އަންނަ އާ ކޯޑް އެފް ރަންވޭ ބޭނުންކުރަން ފެށުމާ ގުޅިގެންނެވެ. މިހާރު ކުރިއަށްދާ ތަރައްގީގެ މަޝްރޫއު ނިމުމުން އެއާޕޯޓުގެ އޮޕަރޭޝަންތަކަށް އިތުރު ލުއިފަސޭހަކަމެއް ލިބިގެންދާނެކަމަށް އެމްއޭސީއެލް އިން ބުންޏެވެ.
