މިއަދު މާލެ ސަރަހައްދަށް އާދަޔާ ހިލާފަށް ހޫނު ވާނެ ކަމަށް މެޓް އޮފީހުން ލަފާކޮށްފި އެވެ.
މެޓް އޮފީހުން ހާމަކުރި ގޮތުގައި ރާއްޖޭގެ އެކި ހިސާބުތަކަށް އިހުސާސްކުރެވޭ ހޫނުމިން މިވަގުތު ހުރީ އެވްރެޖުކޮށް 35 ޑިގްރީ ސެލްސިއަސްގަ އެވެ.
އެގޮތުން މެޓް އޮފީހުން މިއަދު ހެނދުނު 11:00 ޖެހި އިރު ނެރުނު ރެކޯޑުތަކަށް ބަލާއިރު އެންމެ ބޮޑާ ހޫނު މިން އިހުސާސްކުރެވޭނީ މާލެ ސަރަހައްދަށެވެ. އެއީ 37.3 ޑިގްރީ ސެލްސިއަސްގެ ހޫނު މިނެކެވެ.
Advertisement
އަދި އަތޮޅު ތެރޭގައި ހޫނު މިންހުރި މިންވަރަށް ބަލާއިރު :
- ހދ. ހަނިމާދޫ: 36.4 ޑިގްރީ ސެލްސިއަސް
- ލ. ކައްދޫ: 36.4 ޑިގްރީ ސެލްސިއަސް
- ގދ. ކާޑެއްދޫ: 35.9 ޑިގްރީ ސެލްސިއަސް
- އައްޑޫގައި 35.6 ޑިގްރީ ސެލްސިއަސް
ފާހަނގަކޮށްލަން ޖެހޭ ކަމަކީ މިއަދަކީ ގިނަ އަދަދެއްގެ އާއްމުން ބޭރަށް ނިކުމެ އުޅެން ޖެހޭ ދުވަހަކެވެ. މިއަދު ބާއްވާ ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ވޯޓުލުން މިއަދު ކުރިއަށް ދާނެ އެވެ. އަދި އެތަށް އިރެއް ވަންދެން ކިއުގާ މަޑުކުރަން ޖެހޭ ފަހަރު ވެސް އަންނާނެ ކަމަށް ލަފާ ކުރެވެ އެވެ.
އެހެންކަމުން މިއަދަކީ ގިނަ ވަގުތު ބޭރުގައި އުޅެން ޖެހިދާނެ ދުވަހަކަށް ވާއިރު ހޫނު ގަދަ ވުމުގެ ސަބަބުން ޑީހައިޑްރޭޓްވުން ފަދަ ކަންކަމުން ސަލާމަތްވުމަށް ފިޔަވަޅުތައް އެޅުން މުހިންމެވެ.
އެގޮތުން ގިނައިން ފެން ބުއިމާއި އަވިން ސަލާމަތްވުމާއި ހެނދުނު 10:00 އާއި ހަވީރު 04:00 އާ ދެމެދު އަވީގައި އުޅުން މަދުކުރުމާއި ކުޑަ އެޅުމާއި އަދި ސަން ސްކްރީން ބޭނުންކުރުމަކީ ހޫނުން ސަލާމަތްވުމަށް އެޅިދާނެ ފިޔަވަޅެކެވެ. ހަމައެހެންމެ ހެދުން އެޅުމުގައި ވެސް ލުއި ނުވަތަ ކުލަ ފަނޑު އަދި ދޫ ހެދުން އެޅުމާއި ތޮފި އެޅުމަކީ ވެސް ކުރެވިދާނެ ކަމެކެވެ.
މިހާތަނަށް ހޫނު މިން އެންމެ މައްޗަށް ގޮސްފަ 2024 ވަނަ އަހަރުގެ 1 އެޕްރިލްގަ އެވެ. އެ މިންވަރަށް އޭރު ހޫނު މިން އިހުސާސްކުރީ މާލެ ސަރަހައްދުން އެކަންޏެވެ.
