ސައުދީ އަރަބިއާގެ ގައުމީ އެއާލައިން، ސައުދިއާ އިން ދިވެހިރާއްޖެއަށް ދަތުރުތައް ކުރަން ފެށިތާ 10 އަހަރު ފުރުން ކުލަގަދަ ގޮތެއްގައި ފާހަގަކޮށްފިއެވެ.

މި މުނާސަބަތާ ގުޅިގެން އިއްޔެ ރާއްޖެ އައި ސައުދިއާގެ ފްލައިޓުން ދަތުރުކުރި ފަސިންޖަރުންނަށް ވެލާނާ އިންޓަނޭޝަނަލް އެއާޕޯޓުން ވަނީ ހޫނު މަރުހަބާއެއް ކިޔާފައެވެ.

ސައުދިއާ އިން ރާއްޖެއަށް އެންމެ ފުރަތަމަ ދަތުރުތައް ފަށާފައިވަނީ 30 މާޗު 2016 ގައެވެ. 10 އަހަރު ފުރުމުގެ ހަރަކާތްތަކުގެ ތެރެއިން، ރާއްޖެއަށް އައި ފަސިންޖަރުންގެ އިތުރުން، އެ އެއާލައިނުން ފުރި ފަސިންޖަރުންނަށްވެސް ވަނީ މި ދުވަހުގެ ހަނދާނުގައި ހާއްސަ ހަދިޔާތަކެއް ބަހާފައެވެ.

ވޭތުވެދިޔަ 10 އަހަރު ދުވަހުގެ ތެރޭގައި ސައުދިއާ އިން ރާއްޖެއަށް ކުރި ދަތުރުތަކުގެ ސަބަބުން ރާއްޖޭގެ ފަތުރުވެރިކަމުގެ ދާއިރާއަށް ބޮޑެތި ކުރިއެރުންތަކެއް ލިބިފައިވެއެވެ. މީގެ އިތުރުން، މި ދަތުރުތަކުގެ ސަބަބުން ދިވެހިރާއްޖެ އާއި ސައުދީ އަރަބިއްޔާއާ ދެމެދު އޮންނަ ޒަމާންވީ ގުޅުން އިތުރަށް ހަރުދަނާވެ، ދެ ގައުމުގެ ދެމެދުގައި ދަތުރުފަތުރު ކުރުމަށް ބޮޑެތި ފަސޭހަތަކެއް ވަނީ މަގުފަހިވެފައެވެ.

ތަފާސްހިސާބުތަކަށް ބަލާއިރު، މިއަހަރުގެ ފެބްރުއަރީ މަހުގެ ނިޔަލަށް ސައުދީ އަރަބިއްޔާއިން ރާއްޖެއަށް 3,546 ފަތުރުވެރިން ޒިޔާރަތްކޮށްފައިވެއެވެ. މިއީ އެ މުއްދަތުގެ ތެރޭގައި ރާއްޖެއަށް ޒިޔާރަތްކުރި ޖުމްލަ ފަތުރުވެރިންގެ 0.8 އިންސައްތައެވެ.