އޮސްޓްރިއާގެ ގައުމީ އެއާލައިން، އޮސްޓްރިއަން އެއާލައިންސް އިން ދިވެހިރާއްޖެއަށް ދަތުރުތައް ފެށިތާ 30 އަހަރު ފުރުން ވެލާނާ އިންޓަރނޭޝަނަލް އެއަރޕޯޓް (ވީއައިއޭ) ގައި ވަރަށް ކުލަގަދަކޮށް ފާހަގަކޮށްފި އެވެ.
މި ތާރީހީ މުނާސަބަތު ފާހަގަކުރުމުގެ ގޮތުން އިއްޔެ ވެލާނާ އިންޓަރނޭޝަނަލް އެއަރޕޯޓުން ހާއްސަ ހަރަކާތްތަކެއް ވަނީ ކުރިއަށް ގެންގޮސްފަ އެވެ. އެގޮތުން، އޮސްޓްރިއަން އެއާލައިންސްގެ ފްލައިޓުން ރާއްޖެއިން ފުރި 324 ފަސިންޖަރުންނަށް ވަނީ މި ދަތުރުގެ ހަނދާނީ ހަދިޔާ ދީފަ އެވެ. އަދި ޓާމިނަލް 1 އަށް އިއްޔެ ޖެއްސި އެ އެއާލައިންގެ ފްލައިޓުން ރާއްޖެ އައި 328 ފަސިންޖަރުންނަށް މަރުހަބާ ކިޔާފައިވަނީ ދިވެހި ސަގާފީ ބޮޑުބެރާއި އެކު ވަރަށް ހޫނު މަރުހަބާއެކެވެ.
މި ހަރަކާތަކީ އޮސްޓްރިއަން އެއާލައިންސް އާއި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާ ދެމެދު އޮތް ގާތް ގުޅުން ރަމްޒުކޮށްދިނުމުގެ ގޮތުން ވީއައިއޭ އިން އިންތިޒާމުކޮށްގެން ކުރިއަށް ގެންދިޔަ ހަރަކާތެކެވެ.
Advertisement
ފާއިތުވި 30 އަހަރު ދުވަހުގެ ތެރޭގައި އޮސްޓްރިއަން އެއާލައިންސް އިން ރާއްޖެއަށް ކުރަމުންދާ ދަތުރުތަކުގެ ސަބަބުން ރާއްޖޭގެ ފަތުރުވެރިކަމުގެ ސިނާއަތަށް ބޮޑެތި ކުރިއެރުންތަކެއް ވަނީ ލިބިފަ އެވެ. މީގެ އިތުރުން، މި ދަތުރުތަކުގެ ސަބަބުން ދިވެހިރާއްޖެއާއި އޮސްޓްރިއާ އާ ދެމެދު އޮންނަ ގުޅުން އިތުރަށް ބަދަހިވެ، ހަރުދަނާވެގެން ގޮސްފައިވާކަން ފާހަގަކުރެވެ އެވެ.
