ޔަމަނުގައި ހަރަކާތްތެރިވާ ހޫޘީ ހަނގުރާމަވެރިން، އިސްރާއީލަށް އަމާޒުކޮށް ވަރުގަދަ މިސައިލް ހަމަލާތަކެއް ދީފިކަމަށް އެ ޖަމާއަތުން މިއަދު އިއުލާންކޮށްފިއެވެ. މި ހަމަލާއަކީ އީރާނާއި އިސްރާއީލާ ދެމެދު އުފެދިފައިވާ ނުތަނަވަސްކަން އިންތިހާއަށް އިތުރުވެފައިވާ ދަނޑިވަޅެއްގައި ދެވުނު ހަމަލާއެކެވެ.
ހޫޘީންގެ ތަރުޖަމާނު ވިދާޅުވި ގޮތުގައި، އިސްރާއީލުގެ މުހިންމު ސަރަހައްދުތަކަކަށް އަމާޒުކޮށް ގިނަ އަދަދެއްގެ ބެލިސްޓިކް މިސައިލް ވަނީ ފޮނުވާލާފައެވެ. މި ހަމަލާތައް ދީފައިވަނީ ފަލަސްތީނުގެ ރައްޔިތުންނަށް ކުރިމަތިވަމުންދާ އަނިޔާތަކާ ދެކޮޅަށް އަޑުއުފުލުމުގެ ގޮތުންނާއި، އިސްރާއީލުން ހިންގަމުންދާ ލާއިންސާނީ އަމަލުތަކަށް ރައްދު ދިނުމުގެ ގޮތުން ކަމަށް އެ ޖަމާއަތުން ބުނެއެވެ.
މި ހަމަލާތަކާ ގުޅިގެން އިސްރާއީލުގެ ދިފާއީ ބާރުތަކުން ބުނެފައިވަނީ ޔަމަނުން އައި ބައެއް މިސައިލްތައް ވައިގެ ތެރޭގައި ގޮއްވާލާފައިވާ ކަމަށެވެ. ނަމަވެސް ބައެއް މިސައިލްތައް އެކި ސަރަހައްދުތަކަށް ވެއްޓިފައިވާ ކަމަށް ރިޕޯޓްތައް ބުނެއެވެ. މި ހަމަލާއަކީ މި ސަރަހައްދުގައި ހިނގަމުންދާ ހަނގުރާމައިގެ ދާއިރާ އިތުރަށް ފުޅާވެ، މުޅި މެދުއިރުމައްޗަށް އޭގެ ނުރައްކާ ކުރިމަތިވެފައިވާ ކަމުގެ ހެއްކެކެވެ.
ޔަމަނުގެ ހޫޘީންނަކީ ފަލަސްތީނުގެ ހައްގުގައި އަޑުއުފުލައި، އިސްރާއީލާ ދެކޮޅަށް އަމަލީ ގޮތުން މަސައްކަތް ކުރަމުންދާ ބައެކެވެ. ހާއްސަކޮށް ރަތްކަނޑުގެ ސަރަހައްދުގައި އިސްރާއީލާ ގުޅުންހުރި އުޅަނދުފަހަރަށް އަމާޒުކޮށް ހޫޘީން ދެމުންދާ ހަމަލާތަކުގެ ސަބަބުން ބައިނަލްއަގުވާމީ ވިޔަފާރިއަށްވެސް ވަނީ ބޮޑެތި ހުރަސްތަކެއް ކުރިމަތިވެފައެވެ.
އީރާނާއި އިސްރާއީލުގެ ކުރިމަތިލުންތައް ވަރުގަދަވަމުންދާ މި ދަނޑިވަޅުގައި، ހޫޘީންގެ މި ހަމަލާއާއެކު މަސްރަހު އިތުރަށް ގޯސްވެގެންދާނެ ކަމަށް މަސްރަހު ދިރާސާކުރާ ފަރާތްތަކުން ލަފާކުރެއެވެ.
