ބޭންކް އޮފް މޯލްޑިވްސް (ބީއެމްއެލް) އަށް މިދިޔަ އަހަރު ލިބުނު ބޮޑު ފައިދާއަކީ އިންޓަރެސްޓާއި ފީތައް ބޮޑުކޮށްގެން ހޯދި ފައިދާއެއް ނޫން ކަމަށާއި، އެއީ ބޭންކުގެ ވިޔަފާރި އިތުރަށް ފުޅާކޮށްގެން ހޯދި ކާމިޔާބީއެއް ކަމަށް އެ ބޭންކުގެ ސީއީއޯ މުހައްމަދު ޝަރީފު ވިދާޅުވެއްޖެ އެވެ.
ދައުލަތު މީޑިއާ ޮޕްރޮގްރާމެއްގައި ވާހަކަދައްކަވަމުން ސީއީއޯ ވިދާޅުވީ، ބޭންކުން ފައިދާ އިތުރުކުރަނީ އިންޓަރެސްޓާއި ފީތައް އިތުރުކޮށްގެން ކަމަށް ބުނެ އަބަދުވެސް ވާހަކަ ދައްކާ ކަމަށެވެ. ނަމަވެސް، މިދިޔަ އަހަރުގެ ނަތީޖާއިން ފެންނަން އޮތީ ބޭންކުގެ ހިދުމަތްތައް ފުޅާކޮށް، ގިނަ ބަޔަކަށް ލޯނު ދޫކޮށްގެން ހޯދި ކުރިއެރުންތަކެއް ކަން އޭނާ ފާހަގަކުރެއްވި އެވެ.
"މިދިޔަ އަހަރު އަޅުގަނޑުމެން މުޅިން އަލަށް 10 ބިލިއަނަށް ވުރެ ގިނަ ރުފިޔާގެ ލޯނު ދޫކުރިން. މިއީ ބޭންކުގެ 43 އަހަރުވީ ދިގު ތާރީޚުގައި އަހަރެއްގެ ތެރޭ އެންމެ ގިނަ ލޯނު ދޫކުރި އަހަރު. އެއާ އެކީގައި އަޅުގަނޑުމެންގެ ނެޓް ލޯންސް އެންޑް އެޑްވާންސަސް 25.2 ބިލިއަން ރުފިޔާއަށް އަރާފައިވޭ. އެއީ ކުރީ އަހަރާ އަޅައިބަލާއިރު 25 ޕަސެންޓްގެ ކުރިއެރުމެއް،" ސީއީއޯ ވިދާޅުވިއެވެ.
Advertisement
މީގެ އިތުރުން، ލޯނުތައް ބެލެހެއްޓުމުގައި ވެސް ބޮޑު ކުރިއެރުމެއް ހޯދާފައިވާކަން ފާހަގަކުރައްވައި ޝަރީފު ވިދާޅުވީ، ލޯނު ނުދައްކާ ނިސްބަތް އޭގެ ކުރީ އަހަރާ އަޅާބަލާއިރު 1 އިންސައްތަ ދަށްކުރެވިފައިވާ ކަމަށެވެ. އަދި ބޭންކުގެ ރައުސްމާލުގެ ފުދުންތެރިކަން ހުންނަންޖެހޭ ރޭޝިއޯ 48.1 އިންސައްތައިގައި ހުރިއިރު، މިއީ ގާނޫނީގޮތުން ލާޒިމްކުރާ މިންގަނޑަށްވުރެ ހަތަރު ގުނަ އިތުރު އަދަދެއްކަން ފާހަގަކުރެއްވި އެވެ.
ކަސްޓަމަރުން ބޭންކަށް ކުރާ އިތުބާރު ބޮޑުވަމުންދާކަން ހާމަކޮށްދޭ ތަފާސްހިސާބުތައް ވެސް ޝަރީފު ވަނީ ހިއްސާކުރައްވާފަ އެވެ. އެގޮތުން މިދިޔަ އަހަރު މުޅިން އަލަށް 30,000 ކަސްޓަމަރުން ބީއެމްއެލްއާ ގުޅިފައިވާއިރު، ކަސްޓަމަރުންގެ ޑިޕޮސިޓް 16 އިންސައްތައިގެ އިތުރުވުމަކާއެކު މިހާރު ހުރީ 37.2 ބިލިއަން ރުފިޔާގަ އެވެ.
މާލީ ގޮތުން ބަލާއިރު، މިދިޔަ އަހަރަކީ ބޭންކަށް ކާމިޔާބު އަހަރެކެވެ. ޓެކުހަށް ކެނޑުމަށްފަހު ސާފު ފައިދާގެ ގޮތުގައި ބޭންކަށް 2.5 ބިލިއަން ރުފިޔާ ލިބިފައިވެއެވެ. މިއީ ކުރީ އަހަރާ އަޅައިބަލާއިރު 10 އިންސައްތައިގެ ކުރިއެރުމެކެވެ.
ޝަރީފު ވިދާޅުވީ، ގައުމީ ބޭންކަކީ ހަމައެކަނި މާލީ ފައިދާ ހޯދާ ތަނެއް ނޫން ކަމަށާއި، އެއީ މުޅި ގައުމަށް ހެޔޮ ބަދަލެއް ގެނެސްދޭނެ މުއައްސަސާއެއްކަން ސާބިތުކޮށްދީފައިވާ ކަމަށެވެ. އަދި ބީއެމްއެލް ބިނާކުރަމުންދަނީ މިއަދާއި މާދަމާގެ ޖީލުތަކަށްޓަކައި، ހުރިހާ ދިވެހިންގެ ބޭންކެއްގެ ގޮތުގައި ކަމަށް ޝަރީފު ވިދާޅުވިއެވެ.
