ސަރުކާރުން އަލަށް ފަށާ ޓެކްސީ ލައިނުގެ ހިދުމަތަށް ހާއްސަ ހޮޓްލައިން ނަންބަރެއް ތައާރަފުކޮށް، އެ ހިދުމަތް ފެށުމަށް ވާންޖެހޭ އެންމެ ފަހުގެ ތައްޔާރީތައް އިދާރާތަކުން ވަމުން އަންނަކަން ހާމަކޮށްފިއެވެ.
މި މަހުގެ ތެރޭގައި ހިދުމަތް ދޭން ފަށާ މި ޓެކްސީ ލައިނަށް ގުޅުމަށް ކަނޑައަޅާފައިވާ ނަންބަރަކީ 1655 އެވެ. މި މަޝްރޫއު ކުރިއަށް ގެންދިއުމަށް ސަރުކާރުން ހަވާލުކޮށްފައިވަނީ އެމްޓީސީސީއާއެވެ. އެ ކުންފުނިން މައުލޫމާތު ދޭ ގޮތުގައި، މި ހިދުމަތް 24 ގަޑިއިރު ރައްޔިތުންނަށް ލިބިގެންދާނެއެވެ. އަދި ޓެކްސީގެ ހިދުމަތަށް އެދުމަށް ހާއްސަ އެޕްލިކޭޝަނެއް ބޭނުންކުރެވޭނެ އިންތިޒާމުވެސް ވަނީ ހަމަޖައްސާފައެވެ.
މި ހިދުމަތް ފެށުމަށް މީގެ ކުރިން ތަފާތު ތާރީހުތަކެއް ކަނޑައެޅި ނަމަވެސް، އެކި ސަބަބުތަކާހުރެ ވަނީ ލަސްތަކެއް ކުރިމަތިވެފައެވެ. ނަމަވެސް، ޓްރާންސްޕޯޓް މިނިސްޓްރީއާއި އެމްޓީސީސީ ގުޅިގެން މިހާރު އަންނަނީ ވީހާވެސް އަވަހަށް، ފެންވަރު ރަނގަޅު ނިޒާމެއްގެ ދަށުން މި ހިދުމަތް ރައްޔިތުންނަށް ފޯރުކޮށްދިނުމަށް ބާރުސްޕީޑުގައި މަސައްކަތް ކުރަމުންނެވެ.
Advertisement
ހިދުމަތް ފެށުމުގެ ތައްޔާރީތަކުގެ ތެރެއިން، އެމްޓީސީސީން މިހާރު ދަނީ ޖުމްލަ 407 ޑްރައިވަރުން ހޯދުމުގެ މަސައްކަތް ކުރަމުންނެވެ. މީގެ ތެރޭގައި 122 ޕާޓްޓައިމް ޑްރައިވަރުން ހިމެނޭއިރު، މި މަގާމުތަކަށް މީހުން ހޮވުމަށް "ވޯކް-އިން އިންޓަވިއު" ތަކެއްވެސް ވަނީ ކުރިއަށް ގެންގޮސްފައެވެ.
ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވި ގޮތުގައި، މި ހިދުމަތް ދިނުމަށް ތިން މޮޑެލްއެއްގެ ކާރު ބޭނުންކުރާނެއެވެ. މީގެ ތެރެއިން 60 ކާރު ތައިލެންޑުން ގެނައުމަށް ހަމަޖެހިފައިވާއިރު، ބާކީ ދެ މޮޑެލްގެ ކާރުތައް ގެންނާނީ ޗައިނާއިންނެވެ. މި އުޅަނދުތައް ރާއްޖެ ގެނައުމުގެ މަސައްކަތް މިހާރު ދަނީ ކުރެވެމުންނެވެ.
ސަރުކާރުން މިފަދަ ޓެކްސީ ލައިނެއް ތައާރަފުކުރަން ނިންމީ، މިހާރު ހުރި ޓެކްސީތަކުގެ ހިދުމަތާ ގުޅޭގޮތުން އާންމުންގެ ޝަކުވާތައް އިތުރުވެފައިވާތީއެވެ. އޭގެ ތެރޭގައި ޑްރައިވަރުން ބޭނުން ގަޑިއެއްގައި ހިދުމަތް ދިނުމާއި، އުސޫލުތަކާ ހިލާފަށް ދަތުރުތައް ކުރުން ފަދަ މައްސަލަތައް ހިމެނެއެވެ. މި ހިދުމަތާއެކު ދަތުރުފަތުރުގެ ނިޒާމު އިތުރަށް ހަރުދަނާވެ، ރައްޔިތުންނަށް އިތުބާރު ހުރި ހިދުމަތެއް ލިބިގެންދާނެ ކަމަށް ސަރުކާރުން އުންމީދު ކުރެއެވެ.
