މެދުއިރުމަތީގައި އުފެދިފައިވާ ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގުތައް އުފުލި، ސަޕްލައި ކުރުމުގައި ގޮންޖެހުންތަކެއް ކުރިމަތިވެފައިވީ ނަމަވެސް، ރާއްޖެއަށް ބޭނުންވާ ތެލުގެ ސްޓޮކް ހުސްނުވެ ލިބޭނެކަމުގެ ފުރިހަމަ ޔަގީންކަން އިކޮނޮމިކް މިނިސްޓަރު މުހައްމަދު ސައީދު ދެއްވައިފި އެވެ.
މިނިސްޓަރު ސައީދު ދާދި ދެންމެއަކު އެކްސްގައި ކުރެއްވި ޕޯސްޓެއްގައި ވިދާޅުވީ، ދުނިޔޭގެ މަސްރަހަށް އަންނަ ބަދަލުތަކުގެ ސަބަބުން ދިވެހި ގައުމަށާއި ރައްޔިތުންނަށް ކުރާނެ އަސަރު ކުޑަކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންގުޅުއްވަނީ ވަރަށް ހަރުދަނާ ވިސްނުންފުޅެއް ކަމަށެވެ. އެގޮތުން ސަރުކާރުން ވަރަށް ހަލުވިކޮށް އަދި ރޭވުންތެރިކަމާއެކު އަޅުއްވަމުންދާ ފިޔަވަޅުތަކާއެކު، އެސްޓީއޯއިން ދަނީ ރާއްޖެއަށް ބޭނުންވާ ތެލުގެ ސްޓޮކް ހުސްނުވާނޭ ގޮތަށް ދަމަހައްޓަމުންނެވެ.
އެސްޓީއޯއިން ތެޔޮ ގެންނަނީ ރާއްޖޭގެ ޑިމާންޑަށް ބަލައި، ސަޕްލަޔަރުންނާއެކު ދުރާލާ އެއްބަސްވެފައިވާ "ނޮމިނޭޝަން" އެރޭންޖްމެންޓުގެ ދަށުންނެވެ. މި އިންތިޒާމުގެ ދަށުން މި ހަފުތާގައިވެސް ތެލުގެ ދެ ޝިޕްމަންޓެއް ރާއްޖެ ގެނެސްފައިވާކަން މިނިސްޓރު ފާހަގަކުރެއްވި އެވެ. އަދި ކުރިއަށް އޮތް ތަނުގައިވެސް އެއްބަސްވެފައިވާ ތާރީހުތަކާ އެއްގޮތަށް އިތުރު ޝިޕްމަންޓްތައް ގެނައުމަށް ވަނީ ޝެޑިއުލް ކުރެވިފަ އެވެ.
Advertisement
ސައީދު އިތުރަށް ވިދާޅުވީ، މާތްﷲގެ ވާގިފުޅާއެކު، އެއްވެސް ދަތިކަމެއް ނެތި ތެލާއި، ގޭސް، ކާޑުގެ ބާވަތްތައް އަދި ރައްޔިތުންނަށް ބޭނުންވާ އަސާސީ ކާބޯތަކެތި ރާއްޖެއަށް ލިބެން ހުންނާނެ ކަމުގެ ފުރިހަމަ ޔަގީންކަން އަރުވާ ކަމަށެވެ.
ދުނިޔޭގެ ބާޒާރުގައި ތެލުގެ އަގަށް އަންނަ ބަދަލުތަކާ ގުޅިގެން ރާއްޖޭގެ އިގްތިސާދަށް ކުރާ އަސަރު ކުޑަކުރުމަކީ ސަރުކާރުން މިވަގުތު އެންމެ އިސްކަމެއްދޭ އެއް ކަންތައް ކަމުގައިވެސް ސައީދު ވަނީ ފާހަގަކުރައްވާފަ އެވެ.
