ފިތުރު އީދުގެ އުފާވެރި މުނާސަބަތު ފާހަގަކުރުމުގެ ގޮތުން މާލެ ސަރަހައްދުގައި މިއަދު ބޭއްވި އީދު ހަވީރުގެ ހަރަކާތްތަކަށް އާންމުންގެ ބޮޑު ތަރުހީބެއް ލިބިއްޖެ އެވެ. ކުޑަކުދިންނާއި ބޮޑެތިމީހުންނަށްވެސް ބައިވެރިވެވޭ ގޮތަށް ކުރިއަށްގެންދިޔަ މި ހަރަކާތްތަކަކީ އީދުގެ އުފާ ފާޅުކުރުމުގެ ގޮތުން ސަރުކާރާއި ކުންފުނިތަކުން ގުޅިގެން އިންތިޒާމުކުރި ހަރަކާތްތަކެކެވެ.

މި އަހަރުގެ އީދު ހަވީރު އިންތިޒާމްކޮށްފައިވަނީ އެކި އުމުރުފުރާގެ ކުދިންނާއި މީހުންވެސް ޝައުގުވެރިވާނެހެން ތަފާތު ހަރަކާތްތަކާއި ކުޅިވަރުތައް ހިމެނޭ ގޮތަށެވެ. މިގޮތުން، މި ހަރަކާތުގައި ބައިވެރިވި ކުންފުނިތަކުން ތައްޔާރުކޮށްފައިވާ ސްޓޯލްތަކުގައި ކުޑަކުދިން ގަޔާވާނެ އެކި ކަހަލަ ކުޅިވަރުތައް ވަނީ ހިމަނާފައެވެ. އަދި ބައެއް ސްޓޯލްތަކުން ރާއްޖޭގެ އިހުގެ ސަގާފަތާއި، ކުރީގައި ދިވެހިން ކުޅެއުޅުނު ކުޅިވަރުތައް ދައްކާލުމުގެ އިތުރުން، ޒަމާނީ ކެރެކްޓަރތައް ފިއުޝަން ގޮތަކަށް ވަނީ ހުށަހަޅައިދީފައެވެ.

މި ހަރަކާތްތައް މާލޭގެ އިތުރުން ހުޅުމާލެ އަދި ވިލިމާލޭގައިވެސް ކުރިއަށްދާނެ އެވެ. އެގޮތުން ހުޅުމާލޭގައި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އިން މި ފެސްޓިވަލް ބާއްވަނީ ކުޑަކުދިންގެ މެދުގައި މަގުބޫލު "ޒޫޓޯޕިއާ" ތީމަށެވެ. މީގެ އިތުރުން ހުޅުމާލެ ހިޔާ ފާކް އަދި ސެންޓްރަލް ޕާކުގައިވެސް އީދު ހަރަކާތްތައް ކުރިއަށްދެ އެވެ.

މާލޭގައި މި ހަރަކާތްތައް ކުރިއަށްދަނީ ޖުމްހޫރީ މައިދާން ސަރަހައްދުގަ އެވެ. މީގެ ތެރޭގައި އިސްލާމީ މަރުކަޒު ކުރިމަތީގައި އޮންނަ މާބުލް ސަރަހައްދާއި، ސަލްޓަން ޕާކާއި، އިއްޒުއްދީން ފާލަމުގެ އިތުރުން ފަޅުތެރޭގައި ކުރިއަށްދާ ހަރަކާތްތައްވެސް ހިމެނެ އެވެ. އަދި މިއަހަރު މުޅިން އަލަށް ވިލިމާލެ ޓާފް ދަނޑުގައިވެސް އީދު ހަވީރުގެ ހަރަކާތްތައް ކުރިއަށްދާނެ އެވެ.

އީދު ހަވީރުގެ ހަރަކާތްތައް ކުރިއަށްދާނީ އީދު ދުވަހާއި އެއަށް ވިދިގެން އަންނަ ދެ ދުވަހުއެވެ. މި ތިން ދުވަހުވެސް ހަވީރު 16:00 އިން 18:00 އަށް މި ހަރަކާތްތައް ކުރިއަށްދާނެ ކަމަށް އިންތިޒާމުކުރާ ފަރާތްތަކުން މައުލޫމާތު ދެ އެވެ.