މިއަދު ފާހަގަކުރަމުންދާ ބަރަކާތްތެރި ފިތުރުއީދު ދުވަހުގެ އީދު ހުތުބާގައި، މުސްލިމުންގެ މެދުގައި އޮންނަންޖެހޭ އެއްބައިވަންތަކަން ދަމަހައްޓައި، ހަސަދަވެރިކަމާއި ބައިބައިވުމުން ދުރުހެލިވުމަށް މުޅި އިސްލާމީ އުންމަތަށް ގޮވާލައިފި އެވެ.

ރާއްޖޭގެ އެކި ކަންކޮޅުތަކުގައި މިއަދު ހެނދުނު ކުރެވުނު އީދު ނަމާދުގެ ހުތުބާގައި ބަޔާންކޮށްފައިވާ ގޮތުގައި، މިއަދަކީ މާތް الله ދެއްވި ހިދާޔަތަށްޓަކައި އެކަލާނގެއަށް ޝުކުރުކޮށް، ތަކުބީރުގެ އަޑު އުފުލަންޖެހޭ އުފާވެރި ދުވަހެކެވެ. އީދުގެ މުނާސަބަތުގައި މުސްލިމުންގެ މެދުގައި އޮންނަ ގުޅުން ބަދަހިކޮށް، ކުޑަކުދިންނާއި ބޮޑެތިމީހުން، އަދި ފަގީރުންނާއި މުއްސަނދިންގެ މެދުގައި އޮންނަ އަހުވަންތަކަން ދެއްކުމަކީ ދީނީ ގޮތުން ނުހަނު ބާރުއަޅާ ކަމެއްކަން ހުތުބާގައި ފާހަގަކުރި އެވެ.

ހުތުބާގައި އެންމެ ބޮޑު އިސްކަމެއް ދީފައިވަނީ އިޖުތިމާއީ ބަދަހިކަމަށެވެ. އެގޮތުން، އެކަކު އަނެކަކަށް ހަސަދަވެރިވުމާއި ބައިބައިވުން އުފެއްދުމުގެ ބަދަލުގައި، އެކުވެރިކަމާއެކު އުޅުމަށް ނަސޭހަތްތެރިވި އެވެ. އަދި ކޮންމެ މީހަކުވެސް އަނެކާގެ ހައްގުތައް އަދާކުރުމަށް ބާރުއަޅަމުން، އެންމެ ފުރަތަމަ މާތް اللهގެ ހައްގުތައް އަދާކުރުމަށާއި، އެއަށްފަހު މައިންބަފައިންނަށް ހެޔޮކޮށް ހިތުމަށާއި، ރަހިމުގެ ގުޅުން ދެމެހެއްޓުމަށް އިރުޝާދު ދިނެވެ.

"ރަހިމުގެ ގުޅުން ދަމަހައްޓާ މީހާއީ، އޭނާއަށް ދޭ އެއްޗަކަށް ބަދަލުދޭ މީހާއެއް ނޫނެވެ. އެކަމަކު އެ ގުޅުން ދަމަހައްޓާ މީހާއީ އޭނާގެ ރަހިމުގެ ގުޅުން ކެނޑޭ ހިނދު، އެ ގުޅުން ދަމަހައްޓާ މީހާ އެވެ،" ކީރިތި ރަސޫލާގެ ހަދީޘްބަސްފުޅަކާ ހަވާލާދީ ހުތުބާގައި ބަޔާންކުރި އެވެ.

މީގެ އިތުރުން، އީދުގެ އުފާ ފާޅުކުރުމުގައި ޝަރުއީ މިންގަނޑުތަކުން ބޭރުނުވުމަށާއި، އިސްލާމީ ސަގާފަތާ ބީރައްޓެހި ކުޅިވަރުތަކަށް ޖާގަ ނުދިނުމަށް ހުތުބާގައި ހަނދާންކޮށްދިނެވެ. އަދި ރަމަޟާން މަހަށްފަހުވެސް ނަމާދުތަކަށް ރައްކާތެރިވުމަށާއި، ޝައްވާލު މަހުގެ ހަ ރޯދަ ހިފުމަށް ހުތުބާގައި ބާރުއެޅި އެވެ.

ގައުމުގެ އަމާންކަމާ ގުޅޭގޮތުން ވާހަކަދައްކަމުން، އިބްރާހީމްގެފާނު ކުރެއްވި ދުއާފުޅަށް އަލިއަޅުވާލައި، ރަށުގެ އަމާންކަމަކީ ކާބޯތަކެއްޗަށްވުރެވެސް މުހިންމު ނިއުމަތެއްކަން ހުތުބާގައި ފާހަގަކުރިއެވެ. އެހެންކަމުން، ގައުމުގެ ސުލްހަ މަސަލަސްކަމަށް މަސައްކަތްކުރުމަކީ ކޮންމެ ފަރުދެއްގެވެސް ވާޖިބެއް ކަމުގައި ބަޔާންކުރި އެވެ.