އާންމު ދަތުރުފަތުރާއި ޕަބްލިކް ފެރީގެ ހިދުމަތް ދޭ ފަރާތްތަކަށް ކުރިންވެސް ކަނޑައެޅިފައިވާ ހާއްސަ އަގުތަކުގައި ތެޔޮ ފޯރުކޮށްދިނުމުގެ އިންތިޒާމު ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ހަމަޖައްސައިދީފިއެވެ.

މިއީ އާންމު ރައްޔިތުންނަށް މާލީ ގޮތުން އިތުރު ތަކުލީފެއް ކުރިމަތިނުވާނޭހެން ޕެޓްރޯލާއި ޑީސަލް ފޯރުކޮށްދިނުމަށް އެޅުނު މުހިންމު ފިޔަވަޅެކެވެ. 

އިރާނާ ދެކޮޅަށް އެމެރިކާ އަދި އިޒްރޭލު އިސްކޮށް އޮވެގެން ކުރަން ފެށި ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގުތަކަށް އައި ބަދަލާ ގުޅިގެން ރާއްޖޭގައިވެސް ތެލުގެ އަގުތައް ވަނީ އުފުލިފަ އެވެ. މިބަދަލާއެކު އަތޮޅުތަކަށް ދަތުރުކުރާ ލޯންޗުފެރީތަކުގެ އަގުތައްވެސް އިންތިހާއަށް ވަނީ އުފުލިފަ އެވެ.

ނަަމަވެސް ސަރުކާރުން މަސްވެރިންނަށް ހާއްސަކޮށްގެން ކުރިއަށްގެންދާ 'ފަހި ހަކަތަ' ޕްރޮގްރާމްގެ ދަށުން، ސަބްސިޑީ ދެވިފައިވާ އަގުތަކެއްގައި މަސްވެރިންނަށް ތެޔޮ ލިބޭނެ އިންތިޒާމު ކުރިއެކޭވެސް އެއްގޮތަށް ދެމިއޮންނާނެ ކަމަށް އެސްޓީއޯއިން ވަނީ ކަށަވަރުކޮށްދީފައެވެ. މި ނިންމުމުގެ ސަބަބުން މަސްވެރިކަމުގެ ސިނާއަތަށް ކުރިމަތިވެދާނެ މާލީ ގޮންޖެހުންތަކުން ސަލާމަތްވުމަށް މަގުފަހިވެގެންދާނެއެވެ.

މާލެ ސަރަހައްދުގެ އަގުތަކަށް ބަލާއިރު، އެފްއެސްއެމްގެ ފިއުލް ޝެޑްތަކުން ތެޔޮ ވިއްކާ އަގަށް އެއްވެސް ބަދަލެއް ގެނެސްފައެއް ނުވެއެވެ. މީގެ އިތުރުން، އަތޮޅުތެރޭގައި އެސްޓީއޯއިން ތެޔޮ ގަނެގެން ޝެޑްތައް ހިންގާ ފަރާތްތަކަށްވެސް ކުރީގެ އަގުތަކުގައި ތެޔޮ ލިބޭނެ ގޮތް މިހާރު ހަމަޖައްސާފައިވާނެ ކަމަށް އެސްޓީއޯއިން ބުންޏެވެ.

އެސްޓީއޯއިން މިފަދަ ނިންމުމެއް ނިންމާފައިވަނީ ދުނިޔޭގެ ބާޒާރުގައި ތެލުގެ އަގަށް އަންނަ ބަދަލުތަކާ ގުޅިގެން، ރާއްޖޭގެ ދަތުރުފަތުރާއި ކާބޯތަކެތީގެ އަގުތައް އުފުލުނު ނުދިނުމަށެވެ. މި އިންތިޒާމުތަކުގެ ސަބަބުން އާންމު ހިދުމަތްތައް މެދުނުކެނޑި ކުރިއަށް ގެންދިއުމަށް ބޮޑު އެހީތެރިކަމެއް ލިބިގެންދާނެއެވެ.