ރަމަޟާން މަހުގެ ރޭތަކުގައި ކޮލެޖުތަކުން ކުރިއަށްގެންދާ ކްލާސްތައް ތަރާވީހް ނަމާދުގެ ވަގުތުތަކާ ފުށުނާރާނެ ގޮތަކަށް އިންތިޒާމުކުރުމަށް އިސްލާމިކް މިނިސްޓަރު އިލްތިމާސްކުރައްވައިފި އެވެ.

މިނިސްޓަރު މިފަދައިން އިލްތިމާސްކުރެއްވީ، ބައެއް ކޮލެޖްތަކުން ރަމަޟާން މަހުގެ ރޭގަނޑު، އަދި ވަކިން ހާއްސަކޮށް ރަމަޟާން މަހުގެ ފަހު ދިހައިގެ ދުވަސްތަކުގައި ވެސް ތަރާވީހް ނަމާދު ގަޑީގައި ކްލާސްތައް ތާވަލުކުރަމުންދާތީ، އެކަމުގެ ޝަކުވާ ދަރިވަރުން ހުށަހަޅަމުންދާތީ އެވެ.

އިސްލާމިކް މިނިސްޓަރު ވިދާޅުވީ، ރަމަޟާން މަހަކީ އަޅުކަމުގެ މަތިވެރި މަހަކަށް ވީހިނދު، ދަރިވަރުންނަށް ތަރާވީހް ނަމާދާއި އެހެނިހެން އަޅުކަންތަކުގައި ބައިވެރިވުމަށް ހުރަސްނޭޅޭނެ ފަދަ ގޮތަކަށް ކްލާސްތައް އިންތިޒާމުކުރުމަކީ ވަރަށް މުހިންމު ކަމެއް ކަމުގައި ދެކޭ ކަމަށެވެ. އަދި ކިޔަވައިދޭ މަރުކަޒުތަކުން މިކަމަށް ހާއްސަ ސަމާލުކަމެއް ދީ، ދަރިވަރުންގެ ދީނީ ވާޖިބުތަކަށް އިސްކަންދެވޭނެ ފަދަ ގޮތަކަށް ކަންކަން ތަރުތީބުކޮށްދިނުމަށް މިނިސްޓަރު ވަނީ އެދިވަޑައިގެންފައެވެ.

ރައީސް ޑރ. މުޙައްމަދު މުޢިއްޒު ވަނީ އަޅުކަންތައްތަކަށް އިސްކަންދިނުމުގެ ދުރުސަތު ހޯދައިދުނުމުގެ ގޮތުން ރޯދަ މަހުގެ ފަހު ދިހައަކީ ސަރުކާރު ބަންދު ދުވަސްތަކެއް ކަމުގައި ކަނޑައަޅައިފައެވެ. ތައުލީމީ މަރުކަޒުތަކުން ވެސް މިފަދަ ކަންކަމުގައި ދަރިވަރުންނަށް ލުއިފަސޭހަ ގޮތްތައް ހޯދައިދިނުމަކީ އިސްލާމީ މުޖުތަމައެއްގައި ކޮންމެހެން ބޭނުންތެރި ކަމެކެވެ.