އަންހެނުންނަށް ކޮންމެ މަހަކު ކުރިމަތިވާ މައްސަރު ކަންތަކުގެ ލޭ ނުވަތަ 'ޕީރިއަޑް ބްލަޑް' ބޭނުންކޮށްގެން، ހަށިގަނޑުގެ އެތެރޭގެ ސިއްހީ މައްސަލަތައް ދެނެގަނެވޭނެ އިންގިލާބީ ބަދަލެއް ގެނައުމުގެ މަސައްކަތް އެމެރިކާގެ ބަޔޯޓެކް ކުންފުންޏަކުން ފަށައިފި އެވެ.
ކެލިފޯނިއާގެ އޯކްލޭންޑުގައި ހުންނަ 'ނެކްސްޓްޖެން ޖޭން' ކުންފުނީގެ އަމާޒަކީ، އަންހެނުންގެ ސިއްހީ މައްސަލަތައް ދެނެގަތުމަށް މިހާރު ކުރަންޖެހޭ އުނދަގޫ އަދި ވޭންދެނިވި މެޑިކަލް ޓެސްޓުތަކަށް ލުޔެއް ހޯދައިދިނުމެވެ. ހާއްސަކޮށް، 'އެންޑޯމެޓްރިއޯސިސް' ފަދަ ބަލިތައް ދެނެގަތުމަށްޓަކައި ހަށިގަނޑުގެ ތެރެއަށް ކެމެރާ ލައްވައިގެން ކުރާ 'ލެޕަރޮސްކޯޕީ' ސާޖަރީގެ ބަދަލުގައި، މައްސަރު ކަންތަކުގެ ލޭގެ ސާމްޕަލަކުން ބަލި ދެނެގަނެވޭނެ މަގު ފަހިކުރުމެވެ.
މި ދިރާސާގައި ބައިވެރިވި އެމެރިކާގެ މިނެސޯޓާގެ އުމުރުން 27 އަހަރުގެ އެމާ ބެކްލަންޑް ކިޔައިދިން ގޮތުގައި، އޭނާގެ އުމުރުން 11 އަހަރުން ފެށިގެން މައްސަރު ކަންތައް ދިމާވުމުން އާދަޔާ ހިލާފަށް ބޮޑަށް ރިއްސައި، ހޮޑުލެވި، ދިރިއުޅުމުގެ އާންމު ކަންކަމަށް ހުރަސްއެޅެ އެވެ. ނަމަވެސް، އޭނާއަށް 'އެންޑޯމެޓްރިއޯސިސް' ހުރިކަން ކަށަވަރުވީ 13 އަހަރުގެ ދިގު އިންތިޒާރަކަށް ފަހުގަ އެވެ.
އެންޑޯމެޓްރިއޯސިސް އަކީ ރަހިމުގެ ފަށަލައިގެ ސެލްތައް ރަހިމުން ބޭރުގައި އާދަޔާ ހިލާފަށް އުފެދުމުގެ ސަބަބުން ކުރިމަތިވާ ބައްޔެކެވެ. ދުނިޔޭގެ ނިސްބަތުން އަންހެނުންގެ 10 އިންސައްތަ މީހުންނަށް މި ބަލި ޖެހިފައިވާއިރު، މީގެ ސަބަބުން ބަނޑުގައި ރިއްސުމާއި، ދަރިމައިވުމަށް ހުރަސްއެޅުން ފަދަ ކަންކަން މެދުވެރިވެ އެވެ. އާންމުކޮށް މި ބަލި ހުރިކަން ޔަގީންކުރުމަށް 5 އަހަރާއި 12 އަހަރާ ދެމެދުގެ މުއްދަތެއް ނަގަ އެވެ.
ނެކްސްޓްޖެން ޖޭންގެ ސީ.އީ.އޯ ރިދީ ތަރިޔާލް ވިދާޅުވާ ގޮތުގައި، ކުޑަކަމުދާ ތަކެއްޗާއި ބޮޑުކަމުދާ ތަކެތި ބަލިތައް ދެނެގަތުމަށް ބޭނުންކުރާތާ އެތައް ހާސް އަހަރެއް ވެފައިވީ ނަމަވެސް، މައްސަރު ކަންތަކުގެ ލެއަށް މިހާތަނަށް ސައިންޓިފިކް ދާއިރާގައި އެކަށީގެންވާ ސަމާލުކަމެއް ދެވިފައެއް ނުވެ އެވެ. މި ލެޔަކީ ހަމައެކަނި ލޭގެ އިތުރުން، ރަހިމާއި، ފަލޯޕިއަން ޓިއުބް އަދި އޯވަަރީ ފަދަ ގުނަވަންތަކުން އުފެދޭ ސެލްތަކާއި މޮލިކިއުލާ މައުލޫމާތުތައް މުއްސަނދި މިންވަރަކަށް އެކުލެވިގެންވާ އެއްޗެކެވެ. މިއީ ހަށިގަނޑުގެ އެތެރޭގެ ގުނަވަންތަކުން ލިބޭ "ގުދުރަތީ ބަޔޮޕްސީ" އެއްގެ ގޮތުގައި އޭނާ ސިފަކުރެއްވި އެވެ.
2014 ވަނަ އަހަރުން ފެށިގެން މި ކުންފުންޏުން ވަނީ 330 އަށްވުރެ ގިނަ އަންހެނުންގެ އަތުން 2,000 އަށްވުރެ ގިނަ ސާމްޕަލް ނަގައި ދިރާސާކޮށްފަ އެވެ. މި އައު ހޯދުމުގެ ސަބަބުން، އޮޕަރޭޝަނެއް ކުރުމުގެ ބަދަލުގައި، އަންހެނުން އަމިއްލައަށް ގޭގައި ތިބެގެން ފޮނުވާ ސާމްޕަލްތަކުން ބަލިތައް އަވަހަށް އަދި އަގުހެޔޮކޮށް ދެނެގަނެވޭނެ މަގު ފަހިވެ، މުސްތަގުބަލުގައި އަންހެން ކުދިންނަށް ބޮޑު ލުޔެއް ލިބިގެންދާނެ އެވެ.
