މެދުއިރުމަތީގައި މިހާރު ހިނގަމުންދާ ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގު އިންތިހާއަށް އުފުލި، ސާފުނުކުރާ ތެޔޮ ފީފާއެއްގެ އަގު 110 ޑޮލަރަށް ވުރެ މައްޗަށް އަރައިފިއެވެ.
އެމެރިކާ އާއި އިޒްރާއީލުން އިރާނާ ދެކޮޅަށް ހަނގުރާމަ ފެށުމުގެ ކުރިން ތެޔޮ ފީފާއެއްގެ އަގު އެވްރެޖުކޮށް ހުރީ 70 ޑޮލަރުގަ އެވެ.
ތަފާސްހިސާބުތަކުން ދައްކާގޮތުގައި އެމެރިކާގެ ތެލުގެ ބެންޗްމާކް ކަމަށްވާ ވެސްޓް ޓެކްސަސް އިންޓަމީޑިއޭޓް (ޑަބްލިޔު.ޓީ.އައި) ގެ އަގު 30 އިންސައްތަ އުފުލި، 118.88 ޑޮލަރަށް ވަނީ އަރާފައެވެ. އަދި ޔޫރަޕްގެ ބެންޗްމާކް ކަމަށްވާ ބްރެންޓްގެ އަގު 28 އިންސައްތަ އުފުލި، 118.73 ޑޮލަރަށް ވަނީ އަރާފައެވެ. މިއީ 2022 ވަނަ އަހަރު ރަޝިއާ-ޔޫކްރެއިން ހަނގުރާމައިގެ ކުރީކޮޅަށް ފަހު ތެލުގެ އަގު 100 ޑޮލަރަށް ވުރެ މައްޗަށް ދިޔަ ފުރަތަމަ ފަހަރެވެ.
ހަނގުރާމައިގެ ސަބަބުން ތެޔޮ އުފައްދާ މިންވަރަށް ވެސް ވަނީ ބޮޑެތި ބަދަލުތަކެއް އައިސްފައެވެ. އެގޮތުން އޯޕެކްގެ މެންބަރު ގައުމެއް ކަމަށްވާ އިރާގުން ވަނީ ދުވާލަކަށް އުފައްދާ ތެލުގެ މިންވަރު 4.3 މިލިއަން ފީފާއިން 1.3 މިލިއަން ފީފާއަށް މަދުކޮށްފައެވެ. މިއީ ގާތްގަނޑަކަށް 70 އިންސައްތައިގެ ދަށްވުމެކެވެ. މީގެ އިތުރުން ކުވައިތާއި ޔޫއޭއީން ވެސް ވަނީ ތެޔޮ އުފައްދާ މިންވަރު ކޮންޓްރޯލް ކުރަން ފަށާފައެވެ.
ތެލުގެ ސަޕްލައިއަށް ބޮޑު ހުރަހެއް ކުރިމަތިވީ އީރާނުން ހޮރްމުޒް ކަނޑުއޮޅި ބަންދުކުރުމާ ގުޅިގެންނެވެ. މިއީ ތެޔޮ އެކްސްޕޯޓް ކުރުމުގައި ބޭނުންކުރާ އެންމެ މުހިންމު އެއް މަގެވެ. ގަލްފްގެ ގައުމުތަކުން ތެޔޮ އުފެއްދުން މަދުކުރަމުން ދަނީ ސަޕްލައިއަށް ކުރިމަތިވެފައިވާ މިފަދަ ގޮންޖެހުންތަކުގެ ސަބަބުންނެވެ.
މި ހަނގުރާމައިގެ ތެރޭގައި އެމެރިކާ އާއި އިޒްރޭލުން އީރާނަށް ހަމަލާދޭން ފެށުމާ ގުޅިގެން، އީރާނުން އަންނަނީ އަވަށްޓެރި ގައުމުތަކުގައި ހުރި އެމެރިކާގެ މިލިޓަރީ ބޭސްތަކަށް ހަމަލާދެމުންނެވެ. މި ނުތަނަވަސްކަމުގެ ސަބަބުން ތެލުގެ އަގު އުފުލުމުގެ އިތުރުން، ދުނިޔޭގެ ވައިގެ ދަތުރުފަތުރުތަކަށް ވެސް ބޮޑެތި ބުރޫތަކެއް ވަނީ އަރާފައެވެ.
