މާލޭގެ ބާޒާރުމަތީގައި ހުންނަ، ބިނާކުރިތާ ގާތްގަނޑަކަށް ސަތޭކަ އަހަރުވާން ގާތްވެފައިވާ ތާރީހީ ބަންޑާރަ މިސްކިތް (މަސްޖިދުއްސުލްތާން މުހައްމަދު ޝަމްސުއްދީން) ތަޅާލައި، އެތަނުގައި ޒަމާނީ އާ މިސްކިތެއް ބިނާކުރުމުގެ ކުރިން ފުޅާ ދާއިރާއެއްގައި މަޝްވަރާކުރަން ބޭނުންވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
މިނިސްޓަރު މިހެން ވިދާޅުވީ އެ މިސްކިތް ތަޅާލަން ނިންމުމާ ގުޅިގެން އާންމުންނާއި ތާރީހީ ކަންކަމަށް ލޯބިކުރާ ފަރާތްތަކުގެ ފާޑުކިޔުންތައް އަމާޒުވެފައިވާ ދަނޑިވަޅެއްގައެވެ.
މިނިސްޓަރު ޝަހީމް ކުރިން އިއުލާން ކުރެއްވި ގޮތުގައި، މިއަހަރުގެ ރަމަޟާން މަހަށް ފަހު ބަންޑާރަ މިސްކިތް ތަޅާލައި، ދީލަތި ފަރާތެއްގެ އެހީގައި އެތަނުގައި ބޮޑު މިސްކިތެއް ބިނާކުރުމަށް ވަނީ ނިންމާފަ އެވެ. ނަމަވެސް، މި އިއުލާނާއެކު ގިނަ ބަޔަކު ވަނީ އެއީ އާސާރީ އަދި ތާރީހީ ބިނާއެއް ކަމަށް ބުނެ، އެތަން ނައްތާލުމަކީ ތާރީހަށް ދެވޭ ބޮޑު ގެއްލުމެއް ކަމަށް ބުނެ ކަންބޮޑުވުން ފާޅުކޮށްފަ އެވެ.
މި މައްސަލައިގައި ކުރީގެ ހެރިޓޭޖް މިނިސްޓްރީގެ ރިސާޗް އެނަލިސްޓް މުހައްމަދު ނާޖިހު ދީދީ ވިދާޅުވީ، މިފަދަ ތަނެއް ނައްތާލުމަކީ ތަރިކަ ރައްކާތެރިކުރުމުގެ ގާނޫނާ ވެސް ހިލާފު ކަމެއް ކަމަށެވެ. އެކަމަށް ރައްދު ދެއްވަމުން މިނިސްޓަރު ޝަހީމް ކުރިން ވިދާޅުވީ، ތަނަކަށް 100 އަހަރު ވުމަކީ އެތަން ތަޅާނުލާ ބަހައްޓަންޖެހޭ ސަބަބެއް ނޫން ކަމަށާއި، ބަންޑާރަ މިސްކިތަކީ ރާއްޖޭގެ އާސާރީ މިސްކިތްތަކުގެ ރަސްމީ ލިސްޓުގައި ހިމެނޭ ތަނެއް ނޫން ކަމަށެވެ.
ކުރީގެ ބުމްބާ މިސްކިތުގެ ނަމުން މަޝްހޫރުވި ބަންޑާރަ މިސްކިތަކީ ވޯރާ ވިޔަފާރިވެރިންގެ ޒަމާނުގައި ބިނާކުރި، އައްޝައިޚް ހުސައިން ސަލާހުއްދީން ފަދަ އިލްމުވެރިން ކިޔަވައިދެއްވި ތާރީހީ މުހިންމު ބިނާއެކެވެ. މި މިސްކިތަކީ ކުރީގެ ރައީސް ނާސިރާއި ރައީސް މައުމޫންގެ ވެރިކަމުގައި ވެސް ބައެއް ބަދަލުތައް ގެނެސްފައިވާ ތަނެކެވެ. ކުރީގެ ހެރިޓޭޖް މިނިސްޓަރު ޔުމްނާ މައުމޫން ވެސް ވަނީ މި މިސްކިތް ތަޅާލުމާ މެދު ކަންބޮޑުވުން ފާޅުކުރައްވާފަ އެވެ.
އާންމުންގެ މެދުގައި ބަހުސް ހޫނުވުމާ ގުޅިގެން މިނިސްޓަރު ޝަހީމް ރޭ ކުރެއްވި ޕޯސްޓެއްގައި ވިދާޅުވީ، "މިނިސްޓްރީން ކަންކަން ކުރާނީ ރައްޔިތުންގެ އަޑުއަހައިގެން" ކަމަށެވެ.
އެހެންކަމުން، ބަންޑާރަ މިސްކިތް ހުރިތާ އާ މިސްކިތެއް ބިނާކުރުމާ މެދު އިތުރަށް މަޝްވަރާކުރަން މިހާރު ވަނީ ނިންމާފަ އެވެ. މިނިސްޓަރު އިތުރަށް ފާހަގަކުރެއްވި ގޮތުގައި ބާޒާރުމަތީގެ ކާރޫބާރު ބޮޑު ސަރަހައްދެއްގައި މިސްކިތް ބޮޑުކުރުމަކީ މުސްލިމުންގެ މަސްލަހަތަށްޓަކައި ކުރަންޖެހޭ ކަމެކެވެ.
މީގެ އިތުރުން، މަޖީދީ މަގުގައި ހުންނަ ޒިކުރާ މިސްކިތް ހުރި ބިމުގައި ވެސް ރަމަޟާން މަހުގެ 27 ވިލޭރޭ ބިންގާ އަޅައި، އަމަލީ މަސައްކަތް ފެށުމަށް ވަނީ ހަމަޖެހިފައެވެ. މިނިސްޓަރު ވިދާޅުވި ގޮތުގައި މިއަހަރުގެ ރޯދަ މަސް ނިމޭއިރު، މުޅިން އަލަށް ހުޅުވޭ މިސްކިތްތަކުގެ އަދަދު 20 އަށް އަރާނެ އެވެ.
