ޗައިނާގެ އަސްކަރީ ސްޕެޝަލިސްޓުން މިހާރު ވެސް އީރާނުގައި އެބަ ތިބި ކަމަށާއި، ހަތިޔާރު ޓެސްޓް ކުރުމާއި އީރާނުގެ ސިފައިން ތަމްރީނު ކުރުމުގައި އެހީތެރިވެ ދެމުންދާ ކަމަށް ރަޝިޔާގެ ރިޓަޔާޑް މޭޖަރ ޖެނެރަލް ވްލަޑިމިއާ ޕޮޕޯވް ވިދާޅުވެއްޖެއެވެ.
ޕޮޕޯވް ވިދާޅުވީ ޗައިނާގެ އެކްސްޕާޓުން އީރާނުގައި ތިބީ އެޑްވާންސް ހަތިޔާރުގެ ނިޒާމުތައް ޓެސްޓްކޮށް، އީރާނުގެ ސިފައިން ތަމްރީނުކުރުމަށެވެ. ޚާއްސަކޮށް މިސައިލް އަދި ހައިޕަރސޮނިކް ހަތިޔާރު ބޭނުންކުރުމަށެވެ.
އޭނާ ވިދާޅުވީ އީރާނުން އަދިވެސް އެންމެ ވަރުގަދަ ހަތިޔާރުތައް ބޭނުންކޮށްފައި ނުވާ ކަމަށާއި، އެމެރިކާގެ ލޮޖިސްޓިކަލް ކެޕޭސިޓީތައް ބަލިކަށިވުމުން ހަނގުރާމައިގެ ފަހު މަރުހަލާއަކަށް އެ ހަތިޔާރުތައް ހުރީ ބަހައްޓާފައެވެ.
ރިޓަޔާޑް ޖެނެރަލް އިތުރަށް ވިދާޅުވީ އެމެރިކާއަށް މި ހަނގުރާމައިގައި ލޮޖިސްޓިކަލް ގޮންޖެހުންތަކެއް ކުރިމަތިވެދާނެ ކަމަށާއި އޭގެ ތެރޭގައި ހަތިޔާރު ސަޕްލައި ކުރުމާއި، ލޯންޗް ސައިޓްތަކަށް ޕްރެޝަރު ކުރިމަތިވެދާނެ ކަމަށެވެ.
އީރާނުން މިހާތަނަށް ބޭނުންކުރަމުން އައީ އެތެރޭގައި އުފައްދާ ހަތިޔާރު ކަމަށާއި، ޗައިނާ ނުވަތަ ރަޝިޔާގެ ހަތިޔާރުތައް ރިޒާވްގައި ބެހެއްޓުމުގެ ފުރުސަތު އީރާނަށް އެބަ އޮތް ކަމަށް ވެސް ޕޮޕޯވް ވިދާޅުވިއެވެ.
