ބޭންކް ފަންޑް 2025 ގެ ކާމިޔާބީ ހޯދި "ޔުނައިޓެޑް އިސްލާމިކް ސޮސައިޓީ" (ޔޫ.އައި.އެސް) ގެ އެހީތެރިކަމާއެކު ދ. އަތޮޅު ތައުލީމީ މަރުކަޒުގައި މަލްޓިމީޑިއާ ސްޓޫޑިއޯއެއް ރަސްމީކޮށް ހުޅުވައިފި އެވެ.
ބޭންކް އޮފް މޯލްޑިވްސް (ބީއެމްއެލް) އިން ފާހަގަކުރި ގޮތުގައި މި މަޝްރޫއުގެ ދަށުން ޔޫ.އައި.އެސް އިން ވަނީ 800 އަށްވުރެ ގިނަ ދަރިވަރުން ތައުލީމު ހާސިލުކުރަމުންދާ ދ. އަތޮޅު ތައުލީމީ މަރުކަޒުގެ މީޑިއާ ކްލަބަށް ބޭނުންވާ ފުރިހަމަ ވަސީލަތްތަކާއެކު ދެމެހެއްޓެނިވި ގޮތެއްގައި ބޭނުންކުރެވޭނެ ސްޓޫޑިއޯއެއް ގާއިމުކޮށްދީފަ އެވެ.
މި ސްޓޫޑިއޯ ހުޅުވުމުގެ މަގްސަދަކީ ދަރިވަރުންގެ މީޑިއާ ހުނަރުތައް ތަރައްގީކުރުމަށް އެކަށީގެންވާ މާހައުލެއް ބިނާކުރުމެވެ.
މަލްޓިމީޑިއާ ސްޓޫޑިއޯގައި ހިމެނޭ މުހިންމު ވަސީލަތްތަކުގެ ތެރޭގައި ޕްރޮފެޝަނަލް ކެމެރާ، ލައިޓިންގ ކިޓްސް، އޯޑިއޯ ރެކޯޑިންގ އާލާތްތައް، އެޑިޓިންގ ކޮމްޕިއުޓަރު އަދި ލައިވް ސްޓްރީމް ކުރުމަށް ބޭނުންވާ ހާޑްވެއާ ހިމެނެ އެވެ.
މިއީ ސްކޫލްގެ މީޑިއާ ކްލަބްގެ ހަރަކާތްތައް އިތުރަށް ފުޅާކޮށް، ޒަމާނީ ފެންވަރުގައި މަސައްކަތް ކުރުމަށް ލިބުނު ބޮޑު ކުރިއެރުމެކެވެ.
