އެމެރިކާ އިސްވެ އޮވެ އިރާނާ ދެކޮޅަށް ފެށި ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގު އުފުލި ރާއްޖޭގައި ވިއްކާ ތެލާއި ޑީސަލުގެ އަގު އުފުލިއްޖެ އެވެ.

އެސްޓީއޯއިން މިއަދު އާންމުކުރި އިއުލާނެއްގައިވާ ގޮތުން، އެކުންފުނިން އެތެރެކޮށް ވިއްކާ ތެލުގެ އަގަށް ގެނައި ބަދަލާއެކު މިއަދުން ފެށިގެން ޕެޓްރޯލް ލީޓަރެއް ވިއްކާނީ 16.01 ރުފިޔާއަށެވެ. އަދި ޑީސަލް ލީޓަރެއްގެ އަގަކީ 17.54 ރުފިޔާއެވެ. ކުރިން އެސްޓީއޯއިން ޕެޓްރޯލް ލީޓަރެއް ވިއްކަމުން ދިޔައީ 13.50 ރުފިޔާއަށެވެ. އަދި ޑީސަލް ލީޓަރެއް ކުރިން ވިއްކީ 13.92 ރުފިޔާއަށެވެ. އެހެންކަމުން، މިއީ ޕެޓްރޯލް ލީޓަރަކުން 2.51 ރުފިޔާ އަދި ޑީސަލް ލީޓަރަކުން 3.62 ރުފިޔާގެ ބޮޑުވުމެކެވެ.

ރާއްޖޭގައި ތެލުގެ ވިޔަފާރިކުރާ މައި ކުންފުނި އެސްޓީއޯއިން ޕެޓްރޯލާއި ޑީސަލް ވިއްކާ އަގު މިއަދުން ފެށިގެން ބޮޑުކުރީ ދުނިޔޭގެ ބާޒާރުގައި ތެލުގެ އަގަށް އަންނަމުންދާ ބަދަލުތަކާ ގުޅިގެން ކަމަށް ބެލެވެ އެވެ. ހާއްސަކޮށް މެދުއިރުމަތީގެ މަސްރަހަށް އައިސްފައިވާ ބަދަލުތަކާއި، ހަނގުރާމައިގެ ނުތަނަވަސްކަމުގެ ސަބަބުން ސަޕްލައިއަށް ބުރޫއަރައި، ތެލުގެ އަގު މުޅި ދުނިޔޭގެ ބާޒާރުގައި ވަނީ ވަރަށް ބޮޑަށް އުފުލިފައެވެ.

އެސްޓީއޯގެ އިތުރުން ރާއްޖެއަށް ތެޔޮ އެތެރެކުރާ ދަ ހޯކްސް އިން އެތެރެކޮށް ވިއްކާ ތެލުގެ އަގުވެސް ވަނީ ބޮޑުކޮށްފަ އެވެ. އެގޮތުން އެކުންފުނިން ވިއްކާ ޕެޓްރޯލް ލީޓަރަކުން 2.51 ރުފިޔާ އަދި ޑީސަލް ލީޓަރަކުން 3.62 ރުފިޔާ ވަނީ ބޮޑުކޮށްފަ އެވެ.