މި އަހަރުގެ ބަރަކާތްތެރި ރަމަޟާން މަހު އުމްރާގެ އަޅުކަމަށް ގެންދާނެ ކަމަށް ބުނެ އަމިއްލަ އުމްރާ ގްރޫޕަކުން ގިނަ ބައެއްގެ އަތުން ފައިސާ ނެގުމަށްފަހު، އެ އިންތިޒާމުތައް ހަމަޖައްސާފައި ނުވާތީ ހާލުގައި ޖެހުނު މީހުންގެ ތެރެއިން ބަޔަކަށް މޯލްޑިވްސް ހައްޖު ކޯޕަރޭޝަނުން އެހީތެރިކަން ފޯރުކޮށްދީފިއެވެ.
ހައްޖު ކޯޕަރޭޝަންގެ އެމްޑީ މުހައްމަދު ޝަކީލް އެކްސްގއަި ކުރެއްވި ޕޯސްޓެއްގައި ވިދާޅުވީ އަމިއްލަ ގްރޫޕެއްގެ އިހުމާލުން އުމްރާއަށް ނުދެވި ތިބި މީހުންގެ ތެރެއިން ގިނަ ބައެއްގެ އެދިލެއްވުމުގެ މަތިން، ހައްޖު ކޯޕަރޭޝަނުން ޖާގަ އޮތް މިންވަރުން 28 މީހަކަށް ޢުމްރާގެ ފުރުޞަތު ފަހިކޮށްދީފައިވާ ކަމަށެވެ.
އިއްޔެ ހަވީރުގެ ވަގުތެއްގައި މި މީހުންގެ ވިސާގެ ކަންކަމާއި، މައްކާ އަދި މަދީނާއިން ހުރުމުގެ އިންތިޒާމުތައް ވަނީ ހަމަޖައްސާފައެވެ. އަދި މީގެ އިތުރުން ކެއިންބުއިމާއި ދަތުރުފަތުރުގެ ހުރިހާ އިންތިޒާމެއް ވެސް އެ ކޯޕަރޭޝަނުން ވަނީ ފުރިހަމަކޮށްދީފައެވެ.
ހައްޖު ކޯޕަރޭޝަނުގެ އެހީތެރިކަމާއެކު މި 28 މީހުން މިއަދު ހެނދުނު ވަނީ މޯލްޑިވިއަންގެ ފްލައިޓެއްގައި ސައުދީ އަރަބިއްޔާއަށް ފުރާފައެވެ.
އުމްރާއަށް ގެންގޮސްދޭނެ ކަމަށް ބުނެ އަމިއްލަ ބައެއް ގުރޫޕުތަކުން ފައިސާ ނެގުމަށްފަހު، އެކަށީގެންވާ އިންތިޒާމުތައް ހަމަނުޖެއްސުމާއި، އަދި ބައެއް ހާލަތްތަކުގައި މަކަރާއި ހީލަތުން ފައިސާ އަތުލައި ފިލާ މައްސަލަތައް މަދުން ނަމަވެސް ދަނީ ފާހަގަކުރެވެމުންނެވެ.
