ތ. ވިލުފުށީގެ ބިން ހިއްކުމަށް ކުރިއަށްގެންދާ ބޮޑު މަޝްރޫޢުގެ ބޮޑު ބައެއް ނިމި، މުޅި މަޝްރޫއުގެ 98 އިންސައްތަ މަސައްކަތް މިހާރު ނިންމާލައިފި އެވެ.

މި މަޝްރޫއުގެ ދަށުން ވިލުފުށީގައި ޖުމްލަ 81 ހެކްޓަރުގެ ބިން ހިއްކުމަށް ހަމަޖެހިފައިވާއިރު، މިހާތަނަށް 79 ހެކްޓަރުގެ ބިން ވަނީ އެއްކޮށް ހިއްކާ ނިންމާފަ އެވެ. މިއީ އެ ރަށުގެ ބިމުގެ ދަތިކަމަށް ދާއިމީ ހައްލެއް ހޯދައިދީ، އިގްތިސާދީ އަދި އިޖުތިމާއީ ތަރައްގީއަށް މަގުފަހިކުރުމަށްޓަކައި ސަރުކާރުން އިސްކަންދީގެން ކުރިއަށްގެންދާ މުހިންމު މަޝްރޫއުކެވެ.

_{ވިލުފުށީގައި ބިން ހިއްކުމުގެ މަސައްކަތް ކުރިއަށް ގެންދަނީ 11,300 ކިއުބިކް މީޓަރުގެ ބޮޑު ކެޕޭސިޓީއެއް ހުރި "ފިލިޕޯ ބުރުނެލެސްކީ" ބޭނުންކޮށްގެން. / ފޮޓޯ: އެމްއޭސީއެލް}

އެމްއޭސީއެލްއާ ހަވާލުކޮށްގެން ކުރިއަށްގެންދާ މި މަޝްރޫއުގެ އަމަލީ މަސައްކަތް ކުރިއަށް ގެންދަނީ 11,300 ކިއުބިކް މީޓަރުގެ ބޮޑު ކެޕޭސިޓީއެއް ހުރި "ފިލިޕޯ ބުރުނެލެސްކީ" ކޮންނަ ބޯޓު ބޭނުންކޮށްގެންނެވެ. ވިލުފުށީ ބިން ހިއްކުމުގެ އަމަލީ މަސައްކަތް ފަށާފައިވަނީ 14 ނޮވެމްބަރު 2025 ގައެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ރަށްރަށުގެ ބިން އިތުރުކުރުމަށް ގެންގުޅުއްވާ ސިޔާސަތުގެ ދަށުން ކުރިއަށްދާ މި މަޝްރޫއު ނިމުމަކާ ގާތްވެފައިވާއިރު، ބާކީ އޮތް 2 އިންސައްތަ މަސައްކަތް ނިމުމާއެކު މި ބޮޑު މަޝްރޫއު އެއްކޮށް ނިމިގެންދާނެ އެވެ.

މި މަޝްރޫއު ނިމުމުން ވިލުފުށީގެ ރައްޔިތުންނަށް ދިމާވެފައިވާ ގެދޮރުވެރިކަމުގެ މައްސަލައަށް ބޮޑު ލުޔެއް ލިބި، ރަށުގެ ތަރައްގީއަށް އިތުރު ފުރުސަތުތަކެއް ހުޅުވިގެންދާނެ އެވެ.