އަންނަ މާޗު މަހުގައި މުޅި ރާއްޖެއަށް އާންމުކޮށް އިހުސާސް ކުރެވޭ ފިނިހޫނުމިން ކުޑަކޮށް މަތިވާނެ ކަމަށް މޫސުމާ ބެހޭ ގައުމީ އިދާރާ (މެޓް)އިން ހާމަކޮށްފިއެވެ.
މެޓް އޮފީހުން މިކަން ހާމަކޮށްފައިވަނީ ދުނިޔޭގެ މޫސުމާ ބެހޭ ޖަމިއްޔާގެ ލީޑް ސެންޓަރުގެ މަލްޓި-މޮޑެލް އެންސެމްބަލް އާއި ބައިނަލްއަގުވާމީ މޫސުމީ މޮޑެލްތަކުން ލިބިފައިވާ އިރުޝާދުތަކަށް ބިނާކޮށް ތައްޔާރުކޮށްފައިވާ މޫސުމީ ރިޕޯޓެއްގައެވެ.
މެޓް އޮފީހުގެ ރިޕޯޓުގައިވާ ގޮތުން، މާޗު މަހު ރާއްޖޭގެ ހުރިހާ ހިސާބެއްގައިވެސް އެންމެ މަތީ ހޫނުމިނާއި އެންމެ ދަށް ހޫނުމިން އާންމު މިންވަރަށްވުރެ ކުޑަކޮށް މަތިވާނެއެވެ. ނަމަވެސް، ށ. ތޮޅާއި ކ. އަތޮޅާ ދެމެދުގެ ސަރަހައްދުތަކުގައި ހޫނުމިން އާންމު މިންވަރަށްވުރެ މަތިވުމުގެ ފުރުސަތު ނިސްބަތުން ކުޑަ ކަމަށްވެސް އެ އިދާރާއިން ފާހަގަކޮށްފައިވެ އެވެ.
ވާރޭވެހުމުގެ ފުރުސަތުތަކަށް ބަލާއިރު، މެދުރާއްޖެތެރެއާއި ދެކުނުގެ އަތޮޅުތަކަށް ވާރޭވެހޭނީ އާންމު މިންވަރަށްވުރެ މަދުން ކަމަށް ބެލެވޭ ކަމަށް ރިޕޯޓުގައި ވަނީ ފާހަގަކޮށްފައެވެ. އަދި އުތުރުގެ އަތޮޅުތަކަށް ވާރޭވެހޭނީ އާންމު މިންވަރާ ގާތްކުރާ މިންވަރަކަށް ނުވަތަ އާންމު މިންވަރަށްވުރެ މަދުން ކަމަށް މޫސުމީ މޮޑެލްތަކުން ދައްކައެވެ.
ޖުމްލަގޮތެއްގައި، އަންނަ އަހަރުގެ މާރޗް މަހަކީ ރާއްޖޭގެ ބޮޑު ބަޔަކަށް ވާރޭވެހޭ މިންވަރު މަދު، އަދި ހޫނުމިން އާންމު މިންވަރަށްވުރެ މަތި މަހަކަށް ވާނެ ކަމަށް ބެލެވެއެވެ.
