މާލެ ސިޓީގެ މޭޔަރު އާދަމް އާޒިމް، މަގާމުގެ ނާޖާއިޒު ނުފޫޒު ބޭނުންކުރައްވައިގެން އޭނާއާ ހިޔާލުތަފާތުވާ ކައުންސިލަރުންނަށް ބިރުދައްކައި އިންޒާރު ދެމުންދާ ކަމަށް މާލެ ސިޓީ ކައުންސިލްގެ ޑެޕިއުޓީ މޭޔަރު މުހައްމަދު އަރީޝް ތުހުމަތު ކުރައްވައިފި އެވެ.
ޑެޕިއުޓީ މޭޔަރު މިއަދު ކުރެއްވި ސޯޝަލް މީޑިއާ ޕޯސްޓެއްގައި ވިދާޅުވީ، މޭޔަރު އާޒިމް އެކި ގޮތްގޮތުން ކައުންސިލަރުންނަށް ބިރުދައްކަން މަސައްކަތް ކުރުމަކީ ވަރަށް ދަށްފެންވަރުގެ ނާތަހުޒީބު އަމަލެއް ކަމަށެވެ. އަދި ކިތަންމެ ވަރަކަށް ހަގީގަތް ފޮރުވަން އުޅުނު ނަމަވެސް، މޭޔަރު އާޒިމް ހިންގަވާފައިވާ ކަމަށް ބުނާ ޖަރީމާތަކާއި ކޮރަޕްޝަންގެ މައްސަލަތައް ރައްޔިތުންނާ ހަމައަށް ތިލަވާނެ ކަމަށްވެސް އޭނާ ވިދާޅުވި އެވެ.
މޭޔަރުގެ މަސައްކަތްޕުޅު ހުންނަ ގޮތަށް ފާޑުވިދާޅުވަމުން ޑެޕިއުޓީ މޭޔަރު ފާހަގަކުރެއްވި ގޮތުގައި، ސިޓީ ކައުންސިލުން ކުރާ ކޮންމެ ރަނގަޅު ކަމެއްގެ ކްރެޑިޓް އެހެން އެއްވެސް މީހަކަށް ނުދީ، އަމިއްލައަށް ހޯއްދެވުމަށް އާޒިމް އަބަދުވެސް މަސައްކަތް ކުރައްވައެވެ. ކައުންސިލަރުންނާއި އިސް މުވައްޒަފުން ރެޔާދުވާލު ބުރަ މަސައްކަތް ކޮށްގެން ރައްޔިތުންގެ މަންފާއަށް ނިންމާ ކަންކަމުގެ ރީތިނަން މަކަރާއި ހީލަތުން ދަމައިގަތުމަށް މޭޔަރު މަސައްކަތް ކުރައްވާ ކަމަށްވެސް އޭނާ ތުހުމަތު ކުރެއްވި އެވެ.
"މިވާހަކަތައް ކައުންސިލް ޖަލްސާތަކުގައި އަޅުގަނޑު ދައްކާތީ މޭޔަރަކަށް އެކަން ހަޖަމެއް ނުވޭ. ހަގީގަތުގައި މާލެ ސިޓީގެ ރައްޔިތުންނަށް މިހާރު ލިބިފައި މިހިރަ މޭޔަރަކީ، އަމިއްލަ ޖީބަށް ބަރުވާގޮތަށް ނޫނީ އެއްކަމެއްވެސް ކުރާ މީހެއްނޫން،" ޑެޕިއުޓީ މޭޔަރު ވިދާޅުވި އެވެ.
މީގެ އިތުރުން، މޭޔަރު އާޒިމް ސިޓީ ކައުންސިލް ހިންގަވަނީ އޭނާގެ އަމިއްލަ ގޭގެ ކުޑަ ފިހާރައެއް ފަދައިން ކަމަށާއި، އެއްވެސް ކައުންސިލަރަކަށް އިހްތިރާމް ކުރުމެއް ނުވަތަ ހައްގުތައް އަދާކުރުމެއް ނޯންނަ ކަމަށްވެސް ޑެޕިއުޓީ މޭޔަރު ވިދާޅުވި އެވެ.
ކިތަންމެ ވަރަކަށް ޒާތީވެ، ބިރުދެއްކި ނަމަވެސް އެ އަޒުމް ނުގުޑާނެ ކަމަށާއި، ކައުންސިލް ޖަލްސާތަކުގައި މޭޔަރުގެ ހަގީގަތް ރައްޔިތުންނަށް ހާމަކޮށްދިނުމުގައި ދެމިހުންނާނެ ކަމަށް އޭނާ ވިދާޅުވި އެވެ. އަދި މޭޔަރު ދޭ އިންޒާރުތަކަށް ފަސްނުޖެހޭނެ ކަމަށްވެސް ޑެޕިއުޓީ މޭޔަރު ވަނީ ވިދާޅުވެފަ އެވެ.
