މޮރިޝަސްއަށް ވުރެ ފޯޅަވަހި ހައްގުވަނީ ރާއްޖެއަށް ކަމަށް އިނގިރޭސި ގާނޫނު ހަދާ މަޖިލީހުގެ މެންބަރު އަދި ރިފޯމް ޕާޓީގެ ލީޑަރު ނައިޖަލް ފަރާޖް ވިދާޅުވެއްޖެއެވެ.
މޮރިޝަސްއަށް ފޯޅަވަހީގެ ޖަޒީރާ ހަވާލުކުރުމަށް އިނގިރޭސި ސަރުކާރުން ނިންމާފައިވާ ނިންމުމާ ގުޅޭގޮތުން މަޖިލީހުގައި ވާހަކަ ދައްކަވަމުން ފަރާޖް ވަނީ އެ އެއްބަސްވުން މަޑުޖައްސާލުމަށް ގޮވާލައްވާފަ އެވެ.
ފަރާޖް ވިދާޅުވީ ފޯޅަވަހީގެ ރަށްތަކުގެ މައްޗަށް މޯރިޝަސްގެ އެއްވެސް ސިޔާދަތީ ހައްގެއް އޮތް ކަމަށް ގަބޫލުނުކުރައްވާ ކަމަށެވެ. އަދި އެ ރަށްތަކަކީ ތާރީހީ ގޮތުންނާއި ސަގާފީ ގޮތުންވެސް މޮރިޝަސްއާ ގުޅުންހުރި ތަނެއް ނޫން ކަމަށާއި، އެ ރަށްތަކަށް ދިވެހިން ކިޔަމުން އައި ނަންތައް ބަދަލުކުރީ ފަރަންސޭސިން ކަމަށް އޭނާ ފާހަގަކުރެއްވިއެވެ. ފޯޅަވައްސަކީ ތާރީހީ ގޮތުންނާއި ވިޔަފާރީގެ ގޮތުންވެސް ދިވެހިންނާ ގުޅިފައިވާ ތަނެއްކަން އޭނާ ފާހަގަކުރެއްވިއެވެ.
މި މައްސަލާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެސް ވަނީ ފޯޅަވަހި ލިބުން އެންމެ ހައްގު ގައުމަކީ ރާއްޖެ ކަމަށް ވިދާޅުވެފައެވެ. ސަރުކާރުން ވަނީ ކުރީ ސަރުކާރުން މޮރިޝަސްއަށް ފޮނުވި ސިޓީ އަނބުރާ ގެންގޮސް، އިނގިރޭސި ސަރުކާރާއެކު މިކަމުގައި މަޝްވަރާކުރާނެ ކަމަށް ހާމަކޮށްފައެވެ. އަދި ރާއްޖޭގެ ދެކުނުން ގެއްލުނު ކަނޑުގެ ސަރަހައްދު ހޯދުމަށް ޤާނޫނީ މާހިރުންގެ ލަފަޔާއެކު މަސައްކަތްތައް ފަށާފައިވާކަން ރައީސް ވަނީ އިއުލާން ކުރައްވާފައެވެ.
އިނގިރޭސި ނޫހެއް ކަމަށްވާ "އެކްސްޕްރެސް" އަށް ދެއްވި އިންޓަވިއުއެއްގައި ރައީސް މުޢިއްޒު ވިދާޅުވީ، ފޯޅަވައްސާއި ރާއްޖެއާ ދެމެދު އޮތް ތާރީޚީ ގުޅުމަކީ ލިޔެކިޔުންތަކުން ސާބިތުވާން ހުރި ހެކިތަކެއް ކަމަށެވެ. އެހެންކަމުން އެހެން އެއްވެސް ޤައުމަކަށް ވުރެ ބޮޑަށް އެ ޖަޒީރާތަކުގެ މައްޗަށް ދައުވާ ކުރުމުގެ ހައްޤު ރާއްޖެއަށް އޮތް ކަމަށް ރައީސް ގަބޫލުކުރައްވައެވެ.
ޖިއޮގްރަފީ ގޮތުން ބަލާއިރު، މޮރީޝަސްގެ ވެރިރަށް ޕޯޓް ލުއީ އާއި ފޯޅަވައްސާ ދެމެދު 1،300 އަށްވުރެ ގިނަ މޭލު ހުރި ނަމަވެސް، ރާއްޖޭގެ ވެރިރަށް މާލެއާއި ފޯޅަވައްސާ ދެމެދު ހުރީ އެންމެ 310 މޭލެވެ. މިއީވެސް ފޯޅަވައްސަކީ ރާއްޖެއާ ގާތް ތަނެއްކަން ހާމަވާ މުހިންމު ހެއްކެކެވެ.
