މަޝްހޫރު ފުޓްބޯޅަ ކުޅުންތެރިޔާ ކްރިސްޓިއާނޯ ރޮނާލްޑޯ މިދިޔަ އަހަރު ރޯދަ މަހުގެ ފުރަތަމަ ދެދުވަހު ރޯދައަށް ހުރިކަމަށް އޭނާއާއެކު ކުޅުނު ކުޅުންތެރިއަކު ބުނެފިއެވެ.
ބޯޅަ ކުޅެން ސަޢުދީ ޢަރަބިޔާގައި ދިރިއުޅެމުންދާ ޣައިރު މުސްލިމެއްކަމުގައިވާ ޕޯޗުގަލްގެ ފުޓްބޯޅަ ކުޅުންތެރިޔާ ކްރިސްޓިއާނޯ ރޮނާލްޑޯ ވެސް ރޯދައަށް ހުންނަ ކަމަށް ބުނެ ވަރަށް ގިނަ އަޑުއަޑު ވަނީ ފެތުރިފައެވެ.
ރޮނާލްޑޯ ބޯޅަ ކުޅެމުން ދަނީ ސަޢުދީ ޢަރަބިއްޔާގެ ކްލަބް އަލް ނަޞްރަށެވެ. ދާދިފަހުން ވަނީ އޭނާ އެކުލަބަށް ކުޅޭ އެއްބަސްވުން އައުކޮށް ކުޅޭ މުއްދަތު އިތުރުކޮށްފައެވެ.
އަލްނަސްރުގެ ކުރީގެ ކުޅުންތެރިޔާ ޝާޔޭ ޝަރަހިލީ، ބުނިގޮތުގައި މިދިޔަ އަހަރު ރޯދަމަހުގެ ފުރަތަމަ ދެ ދުވަހު ރޮނާލްޑޯ ވަނީ މުސްލިމް ކުޅުންތެރިންނާއެކު ރޯދައަށް ހުރެފައެވެ. ރޮނާލްޑޯ ބުނިގޮތުގައި އޭނާ ރޯދައަށް ހުރީ ރޯދަހިފުމުން މުސްލިމުންނަށް އިޙްސާސް ކުރެވޭ ގޮތް އޭނާއަށް ވެސް އިޙްސާސް ކުރެވޭތޯ ބެލުމަށެވެ.
ޝާޔޭ ޝަރަހިލީ ބުނީ، ދުވަހުން ދުވަހަށް އަންނަ ބަދަލުތަކަށް ހޭނިފައި ނުވާތީ، ބިދޭސީ ކުޅުންތެރިންނަށް ރޯދައަށް ހުންނަން ފުރަތަމަ ކޮޅު އުނދަގޫ ވާނެކަމަށެވެ. ޝާޔޭ ބުނި ގޮތުގައި ރޮނާލްޑޯގެ ރޯދައަކީ ދީނީ އަޅުކަމެއް އަދާކުރަން ކުރިކަމެއް ނޫނެވެ. އަދި ދީނީ މުނާސަބަތަކާ ގުޅިގެން ކުރި ކަމެއްވެސް ނޫނެވެ.
"އެއީ ކުރިން އަންގައި އިއުލާނު ކުރުމެއްނެތި ކުރިކަމެއް. އެއީ ރޯދައަށް ހުރުން އަމިއްލައަށް ތަޖުރިބާކުރުމުގެ ގޮތުން ކުރިކަމެއް." ޝާޔޭ ބުންޏެވެ.
ބޭރުގެ މީޑިއާ ރިޕޯޓްތައް ބުނާ ގޮތުން ރޮނާލްޑޯ އަލް ނަސްރާ ގުޅުނުފަހުން އޭނާ ދަނޑުމަތީގައި ދުއާކޮށް އިސްލާމް ދީނާ ރައްޓެހި އަމަލުތައް ކުރަމުން ދެއެވެ.
ރޮނާލްޑޯ މި ރޯދަ މަހު ރޯދައެއް ހިފިކަން އެނގިފައެއް ނުވެއެވެ.
