މެކްސިކޯގެ އެންމެ ނުފޫޒުގަދަ އަދި ނުރައްކާތެރި އެއް ކާޓެލް ކަމަށްވާ 'ޖަލިސްކޯ ނިއު ޖެނެރޭޝަން ކާޓެލް' (CJNG) ގެ ލީޑަރު، ނެމެސިއޯ ރޫބެން އޮސެގުއޭރާ ސާވަންޓެސް (އެލް މެންޗޯ) މަރުވުމާ ގުޅިގެން، އެ ކާޓެލް އިން ސަރުކާރާ ދެކޮޅަށް ހަނގުރާމަ އިއުލާންކޮށް މުޅި ގައުމުގައި ބޮޑެތި ހަމަނުޖެހުންތަކެއް ފަށައިފި އެވެ.

އުމުރުން 59 އަހަރުގެ 'އެލް މެންޗޯ' މަރުވީ ޖަލިސްކޯ ސްޓޭޓްގެ ޓަޕަލްޕާގައި މެކްސިކޯގެ އަސްކަރިއްޔާއިން ހިންގި ހާއްސަ އޮޕަރޭޝަނެއްގައި ލިބުނު އަނިޔާތަކަށް ފަރުވާ ދިނުމަށް މެކްސިކޯ ސިޓީއަށް ވައިގެ މަގުން ގެންދަނިކޮށް މިދިޔަ އާދީއްތަ ދުވަހު އެވެ. އެމެރިކާގެ އިންޓެލިޖެންސްގެ އެހީތެރިކަމާއެކު ހިންގި މި ރޭޑުގައި އެ ކާޓެލްގެ އިތުރު ބައެއް މެންބަރުން ވެސް ވަނީ މަރުވެފައެވެ.

އެލް މެންޗޯ އަކީ ފެންޓަނީލް އާއި ކޮކެއިން ފަދަ މަސްތުވާތަކެތި ޓްރެފިކް ކުރުމުގެ އިތުރުން، ސަރުކާރުގެ އޮފިޝަލުންނަށް ދޭ ނުރައްކާތެރި ހަމަލާތަކުގެ އިސް މޭސްތިރިޔާއެވެ.

އޭނާ މަރުވި ހަބަރާއެކު، ބަދަލުހިފުމުގެ ގޮތުން ޖަލިސްކޯ، ކޮލިމާ، އަދި މިޗޯއަކާން ހިމެނޭހެން މަދުވެގެން 12 ސްޓޭޓެއްގައި ހަމަނުޖެހުންތައް ވަނީ ފެށިފަ އެވެ. ކާޓެލްގެ މެންބަރުން ވަނީ އުޅަނދުފަހަރާއި ވިޔަފާރިތަކުގައި ރޯކޮށް، ގައުމުގެ އެކި ސަރަހައްދުތަކުން 250 އަށްވުރެ ގިނަ މަގު ބަންދުކޮށްފަ އެވެ. މި ހަމަލާތަކުގެ ސަބަބުން ދަތުރުފަތުރަށް ބޮޑެތި ހުރަސްތަކެއް އެޅި، ރައްޔިތުންގެ ސަލާމަތަށް ނުރައްކާވެފައިވާކަމަށް މެކްސިކޯގެ ކަމާބެހޭ ފަރާތްތަކުން ވަނީ ބުނެފަ އެވެ.

މި ހަމަނުޖެހުންތަކުގެ ސަބަބުން ޖަލިސްކޯގެ ވެރިރަށް ގުއަޑަލަހާރާގެ މަގުތައް ފަޅުވެ، ސްކޫލްތައް ވަނީ ބަންދުކޮށްފަ އެވެ. އަދި އެއާޕޯޓްތަކުގެ ފްލައިޓްތައް ކެންސަލްވުމާ ގުޅިގެން ޕުއެރްޓޯ ވަޔާޓާ ފަދަ ފަތުރުވެރި ސަރަހައްދުތަކުގައި ތިބި އެމެރިކާ އާއި ކެނެޑާގެ ގިނަ އަދަދެއްގެ ފަތުރުވެރިން ވަނީ ތާށިވެފައެވެ. ސަރުކާރުން ވަނީ ހުރިހާ ރައްޔިތުންވެސް ގޭގައި ތިބުމަށް އިލްތިމާސްކޮށްފަ އެވެ.

އެލް މެންޗޯގެ މަރާއެކު ސީޖީއެންޖީ ބައިބައިވުމަށް ނުވަތަ ސިނަލޯއާ ކާޓެލް ފަދަ ވާދަވެރި ގްރޫޕްތަކާއެކު ބޮޑެތި ކުރިމަތިލުންތަކެއް ހިނގައި، ގައުމުގެ މަސްރަހު އިތުރަށް ގޯސްވެދާނެ ކަމުގެ ބިރު ވަނީ އުފެދިފަ އެވެ.