ރޯދަވީއްލާ ވަގުތަކީ ހަށިގަނޑަށް ބޭނުންވާ ހަކަތަ މަޑުމަޑުން އަލުން ލިއްބައިދޭންޖެހޭ ވަގުތެކެވެ. މާގިނައިން ހަކުރު އެކުލެވޭ ތަކެތި ބޭނުންކުރުމުން ކުޑަވަގުތުކޮޅަކަށް ހަކަތަ ލިބުނު ކަމުގައި ވިޔަސް، އިރުކޮޅަކުން ވަރުބަލިކަން އިހުސާސްވާން ފަށާނެއެވެ. ޗިއާ ސީޑްސް އާއި ކާށިކިރު އަދި ކަދުރު ބޭނުންކޮށްގެން ތައްޔާރުކުރާ މި ޕުޑިންގް އަކީ ރޯދަވީއްލުމަށް ފަހު ހަށިގަނޑަށް ބޭނުންވާ ހަކަތަ ހަމަހަމަކޮށްދީ، ފެންމަދުވުމުން ދުރުކޮށްދޭ، ބަނޑަށް ލުއި ފޮނި ކެއުމެކެވެ.

މި އަހަރު ވެސް ހޫނު މޫސުމުގައި ރޯދައަށް ހުންނައިރު, ހަށިގަނޑުން ވަރުބަލިކަން ފިލުވައިދީ، ތަރާވީސް ނަމާދަށް ދާއިރު ކަންނެތްވުމުގެ ބަދަލުގައި ހަށިގަނޑަށް ތާޒާކަން ގެނެސްދިނުމަށް މި ޕުޑިންގް އެހީތެރިވެދޭނެއެވެ.

ބޭނުންވާ ތަކެތި:

1. 2 ސައިސަމުސާ ޗިއާ ސީޑްސް
2. 1 ތަށި ކާށިކިރު
3. 3 މަޑު ކަދުރު (އޮށް ނެގުމަށްފަހު)
4. 1 ސައިސަމުސާ މާމުއި (ބޭނުންނަމަ)
5. ¼ ސައިސަމުސާ ފޮނިތޮށި/ ކާފޫރުތޮޅި (ކުނޑި)
6. މަތީގައި އެތުރުމަށް ކޮށާފައި ހުރި މޭވާ (ކަދުރު ނުވަތަ ދޮންކެޔޮ)
7. ގާނާފައި ހުރި ހިކި ކާށި (ބޭނުންނަމަ)

ތައްޔާރުކުރާނެ ގޮތް:

އެންމެ ފުރަތަމަ ކާށިކިރާއި ކަދުރު ރަނގަޅަށް މިކްސަރުކޮށްލާށެވެ.

ރަނގަޅަށް އެއްވުމުން ތައްޓަކަށް އެޅުމަށްފަހު އޭގެ ތެރެއަށް ޗިއާ ސީޑްސް އަޅާފައި އެއްކޮށްލާށެވެ.

ދެން މާމުޔާއި ފޮނިތޮށި/ކާފޫރުތޮޅި ކުނޑި ކޮޅު އެއްކޮށްލާށެވެ.

ރަނގަޅަށް އެއްކުރުމަށްފަހު 1 ނުވަތަ 2 ގަޑިއިރު ވަންދެން (ނުވަތަ މުޅި ރޭ) ފިނިކުރަން ބަހައްޓާށެވެ.

ކެއުމުގެ ކުރިން ކޮށާފައިހުރި ތާޒާ މޭވާ އާއި ގޭނި ކާށިކޮޅު މައްޗަށް އަތުރާލާށެވެ.

މި ކެއުމުގައި ހިމެނޭ ކޮންމެ އެއްޗަކީ ވެސް ސިއްހަތަށް އެތައް ފައިދާތަކެއް ލިއްބައިދޭ ކާނާތަކެކެވެ. އެގޮތުން ޗިއާ ސީޑްސްގެ ސަބަބުން ހަށިގަނޑުގައި ފެން ހިފަހައްޓައިދީ، ފެންމަދުވުމުން ދުރުކޮށްދެއެވެ. އަދި ކަދުރުން ހަށިގަނޑަށް އަވަސް އަދި ސިއްހަތަށް ފައިދާހުރި ހަކަތައެއް ލިއްބައިދެއެވެ. މީގެ އިތުރުން ކާށިކިރުގައި ހުންނަ ފައިދާހުރި ފެޓްސްގެ ސަބަބުން ގިނައިރު ބަނޑުފުރިފައި ހުންނަ ކަމުގެ އިހުސާސް ކޮށްދޭއިރު, ހަޖަމުކުރުމުގެ ނިޒާމަށް އެހީތެރިވެދީ، ރޭގަނޑުގެ ވަގުތުތަކުގައި މާ ގިނައިން ކެއުމުން ވެސް ދުރުކޮށްދެއެވެ.

ލުއި، މީރު އަދި ސިއްހަތަށް ފައިދާހުރި މި ފޮނިކެއުމަކީ ރޯދަ މަހުގެ ދުވަސްތަކަށް އެންމެ އެކަށޭނަ އެއް ފޮނި ކެއުމެވެ.