ކުރިއަށް އޮތް ބަރަކާތްތެރި ރަމަޟާން މަހު މޯލްޑިވްސް އިމިގްރޭޝަނުން މާލެއާއި އަތޮޅުތެރޭގެ އޮފީސްތަކުން ހިދުމަތް ދޭނެ ގަޑިތައް އެ އިދާރާއިން މިއަދު ހާމަކޮށްފި އެވެ.

އިމިގްރޭޝަނުން ބުނި ގޮތުގައި، އާންމު ދުވަސްތަކެކޭ އެފަދައިން ރަމަޟާން މަހުގެ ކޮންމެ ވަގުތެއްގައިވެސް "އިމުގާ" ޕޯޓަލް މެދުވެރިކޮށް ޕާސްޕޯޓަށް އެދި ހުށަހެޅޭނެ އެވެ. މާލެ ސަރަހައްދުގައި ޕާސްޕޯޓާ ހަވާލުވުމަށްޓަކައި، އާދީއްތަ ދުވަހުން ފެށިގެން ބުރާސްފަތި ދުވަހާ ހަމައަށް "ކިއުބީ" އެޕްލިކޭޝަން މެދުވެރިކޮށް ނަންބަރު ދޫކުރާނީ ކޮންމެ ދުވަހެއްގެ ހެނދުނު 09:15 އިން މެންދުރު 13:00 އަށެވެ. އަދި ހުކުރު ދުވަސްތަކުގައި ނަންބަރު ދޫކުރުމަށް ހަމަޖެހިފައިވަނީ ހެނދުނު 09:15 އިން 11:00 އަށެވެ.

އަތޮޅުތެރޭގެ ރަށްރަށުގައި ހުންނަ އިމިގްރޭޝަންގެ އޮފީސްތަކުން ޕާސްޕޯޓާ ހަވާލުވުމަށް ނަންބަރު ދޫކުރާނީ ހެނދުނު 09:15 އިން މެންދުރު 12:00 އަށެވެ. މީގެ އިތުރުން، ސިއްހީ ކުއްލި ނުރައްކަލުގެ ހާލަތްތަކުގައި (މެޑިކަލް އިމަރޖެންސީ) ޕާސްޕޯޓުގެ ޚިދުމަތް ބޭނުންވާ ފަރާތްތަކުން އެ އިދާރާގެ ހޮޓްލައިން ނަންބަރު 9555333 އަށް ގުޅުއްވައިގެން ކުރިއަށް ގެންދިއުމަށް އިމިގްރޭޝަނުން ވަނީ އިލްތިމާސްކޮށްފަ އެވެ.

ވިސާގެ ހިދުމަތްތަކަށް ބަލާއިރު، އީ-ވިސާއަށް އެދި "އިމުގާ" ޕޯޓަލް މެދުވެރިކޮށް 24 ގަޑިއިރު ހުށަހެޅޭނެއެވެ. ނަމަވެސް، އޮފީހަށް ހާޒިރުވެގެން ހޯދަންޖެހޭ ވިސާގެ ޚިދުމަތްތައް ސްޓަރ ކްލައުޑްސް ބިލްޑިންގުގެ 8 ވަނަ ފަންގިފިލާއިން ލިބޭނީ ހެނދުނު 09:00 އިން މެންދުރު 13:00 އަށެވެ. އަދި އެންފޯސްމަންޓު އެންޑް ކޮމްޕްލަޔަންސް ޑިވިޜަނުން ފޯރުކޯށްދޭ ރިޕެޓްރިއޭޝަންއާ ގުޅުންހުރި ޚިދުމަތްތައް ހެނދުނު 09:00 އިން މެންދުރުފަހު 14:00 އާ ހަމައަށް ލިބޭނެ އެވެ.

ސީޕޯޓުގެ ހިދުމަތްތައް ދިނުމަށް ހަމަޖެހިފައި ވަނީ ތަފާތު ގަޑިތަކެއްގަ އެވެ. އެގޮތުން ހުކުރު ދުވަސް ނޫން އެހެން ދުވަސްތަކުގައި:

1. ފަތިހު 05:20 އިން މެންދުރު 12:00 އަށް
2. މެންދުރު 13:00 އިން ހަވީރު 17:30 އަށް
3. ރޭނގަނޑު 20:00 އިން ފަތިހު 04:00 އަށް

ހުކުރު ދުވަހު ސީޕޯޓުގެ ޚިދުމަތް ދޭނީ:

1. ފަތިހު 05:30 އިން ހެނދުނު 08:00 އަށް
2. މެންދުރުފަހު 14:30 އިން ހަވީރު 17:30 އަށް
3. ރޭނގަނޑު 20:00 އިން ފަތިހު 04:00 އަށް

މީގެ އިތުރުން، ކުޅުދުއްފުށި، އުލިގަމު އަދި ހިތަދޫ ސީޕޯޓު އޮފީސްތައް ރަމަޟާން މަހު ހުޅުވިފައި ހުންނާނީ ހެނދުނު 09:00 އިން މެންދުރު 13:00 އަށް ކަމަށްވެސް އިމިގްރޭޝަނުން ބުންޏެވެ.