ޖެނީވާގައި އެމެރިކާ އާއި އީރާނާ ދެމެދު ކުރިއަށް ގެންދިޔަ ނުސީދާ މަޝްވަރާތަކުގެ ދެވަނަ ބުރު ނިންމުމަށް ފަހު އައްމާނުގެ ހާރިޖީ ވަޒީރު ބަދުރު އަލް ބުސައިދީ ވަނީ އެ މަޝްވަރާތަކުން "ރަނގަޅު ކުރިއެރުމެއް" ލިބިފައިވާކަން އިއުލާން ކުރައްވާފަ އެވެ.

އީރާނާއި އެމެރިކާއާ ދެމެދު މެދުވެރިއެއްގެ ގޮތުގައި ހަރަކާތްތެރިވެ ވަޑައިގަންނަވަމުން ގެންދަވާ އައްމާންގެ ހާރިޖީ ވަޒީރު އަލް ބުސައިދީ އަންގާރަ ދުވަހު، ބޭއްވި މަޝްވަރާ ބައްދަލުވުމާ ގުޅޭގޮތުން އޭނާގެ އެކްސް އެކައުންޓުގައި ލިޔުއްވާފައިވާފައި ވަނީ މަޝްވަރާތައް ނިމުނީ އާންމު ލަނޑުދަނޑިތަކާއި ގުޅުންހުރި ފަންނީ މައްސަލަތައް ކަނޑައެޅުމަށް ރަނގަޅު ކުރިއެރުމަކާ އެކުގައި ކަމަށެވެ.

"އަޅުގަނޑުމެންގެ ބައްދަލުވުންތަކުގެ މާހައުލަކީ ބިނާކުރަނިވި މާހައުލެއް. އެންމެ ފަހުގެ އެއްބަސްވުމަކަށް މަގުދައްކައިދޭ ބައެއް އުސޫލުތައް ގާއިމުކުރުމަށް އެކުގައި ސީރިއަސް މަސައްކަތްތަކެއް ކުރެވުނު." އޭނާ އިތުރަށް ވިދާޅުވި އެވެ.

ނަމަވެސް ކުރިއަށް އޮތްތާގައި ކުރަން އަދިވެސް ވަރަށް ގިނަ މަސައްކަތްތަކެއް އެބަހުރިކަންވެސް އޭނާ ސާފުކޮށްދެއްވިއެވެ. ދެން އޮންނަ ބައްދަލުވުމުގެ ކުރިން އިތުރަށް ދެފަރާތުން ވެސް އަޅަންޖެހޭ ފިޔަވަޅުތަކެއް އެބަހުއްޓެވެ. ތިންވަނަ ބައްދަލުވުމެއްގައި އިށީނުމުގެ ކުރިން ކުރިއަށް އަޅަން ޖެހޭ ފިޔަވަޅުތައް ދެ ފަރާތުން ވެސް ސާފުކޮށް ކަނޑައަޅާނެ އެވެ. ދެން އޮންނަ ބައްދަލުވުން ބާއްވާނެ ތާރީހެއް، ތަނެއް އަދި ކަނޑައަޅާފައެއް ނުވެ އެވެ.

އީރާނުގެ ވަފުދުގެ އިސްވެރިއަކަށް ހުންނެވި އީރާނުގެ ހާރިޖީ ވަޒީރު އައްބާސް އަރާގްޗީ ވިދާޅުވީ ފުރަތަމަ ބުރާ އަޅާބަލާއިރު ދެވަނަ ބުރުގައި ހެޔޮ ކުރިއެރުންތަކެއް ލިބިފައިވާ ކަމަށެވެ.

އީރާނުގެ ޓީވީއަކަށް ދެއްވި އިންޓަވިއުއެއްގައި އަރާގްޗީ ވިދާޅުވީ އޭނާގެ ވަފުދުން އެމެރިކާއާ އެކު އަސާސީ އުސޫލުތަކާ ގުޅޭ ގޮތުން އެއްބަސްވުމަކަށް އައިސްފައިވާ ކަމަށާއި އެމެރިކާއާ އެކު ކުރިއަށްދާ މަޝްވަރާތަކުގައި މިހާރު ކުރިއަށް ދާން ސާފު މަގެއް އޮތް ކަމަށެވެ.

އޭނާ އިތުރަށް ވިދާޅުވީ، މީގެ މާނައަކީ އަވަހަށް އެއްބަސްވުމަކަށް އާދެވޭނެ ކަމަކަށް ނުވާނެ ކަމަށާއި، ނަމަވެސް މަގު ފެށުނީ ކަމަށެވެ. އަދި ދެ ފަރާތުން އެއްބަސްވުމެއް ހަދަން ޖެހިދާނެ ލިޔުމެއްގެ ދެ ދެލިކޮޕީއެއް ތައްޔާރުކޮށް އެ ދެލިކޮޕީ ދެ ގައުމުގެ ދެމެދު ބަދަލުކުރާނެ ކަމަށް ވެސް އޭނާ ވިދާޅުވި އެވެ.

ނަމަވެސް ދެފަރާތުންވެސް އިތުރަށް މަސައްކަތް ކުރަންޖެހޭ ބައެއް ކަންކަން އެބަހުރިކަންވެސް އޭނާ ފާހަގަކުރެއްވިއެވެ. އެމެރިކާއާއި އީރާނާ ދެމެދު މަޝްވަރާތަކެއް ކުރިއަށްދާއިރު އެމެރިކާގެ ރައީސް ޓްރަމްޕު ގެންދަވަނީ އީރާނަށް އިންޒާރުތަކެއް ދެއްވުމުގެ އިތުރަށް އީރާނު ސަރަހައްދަށް ހަތިޔާރާއި ސިފައިން ޖަމާކުރަމުންނެވެ.

އެމެރިކާއިން ތަކުރާރުކޮށް ޔޫރޭނިއަމް މުއްސަނދިކުރުން ހުއްޓުވުމަށް އީރާނަށް ފިއްތުންތައް ކުރިމަތި ކުރުމުގެ އިތުރަށް، އީރާނުގެ ބެލިސްޓިކް މިސައިލް ޕްރޮގްރާމާއި އެ ސަރަހައްދުގައި ހަތިޔާރު އެޅި ޖަމާއަތްތަކަށް އީރާނުން ތާއީދު ކުރަމުންދާތީ، އިޒުރޭލުން ދަނީ މިކަންކަން މަޝްވަރާތަކުގައި ހިމަނަން ބާރުއަޅަމުންނެވެ.

އަނެއްކޮޅުން އީރާނުގެ އޮފިޝަލުން ފަހަކަށް އައިސް ތަކުރާރުކޮށް ބުނެފައި ވަނީ ވޮޝިންޓަނާ އެކު ކުރެވޭ މަޝްވަރާތަކަކީ ހަމައެކަނި ނިއުކްލިއާ ޕްރޮގްރާމަށް ނިސްބަތްވާ މަޝްވަރާތަކެއް ކަމަށާއި މިސައިލް ޕްރޮގްރާމަކީ "ސިޔާސަތުގެ މައްސަލައެއް" ކަމަށް ސިފަކޮށްފައެވެ. އަދި ޔޫރޭނިއަމް މުއްސަނދި ކުރުމުގެ ހައްގަކީ މަޝްވަރާ ނުކުރެވޭނެ ހައްގެއް ކަމަށް އީރާނުން ވަނީ ތަކުރާރުކޮށް އެތައް ފަހަރަކު ބުނެފައެވެ.