ރަމަޟާން މަހަކީ ކެއުމުގެ އާދަތައް އިސްލާހުކޮށް، ދުޅަހެޔޮ ދިރިއުޅުމެއް ބައްޓަންކުރަން ލިބޭ އަގުހުރި ފުރުސަތެކެވެ. ނަމަވެސް، ބަރުދަން ލުއިކުރުމުގައި ސަމާލުވާންޖެހޭ މުހިންމު ކަންތައްތަކެއް ވެސް ހުރެއެވެ. ދެމެހެއްޓެނިވި ނަތީޖާއެއް ހާސިލުކުރެވޭނީ ހަމައެކަނި މަދުން ކައިގެންނެއް ނޫނެވެ. އޭގެ ބަދަލުގައި ސިއްހަތަށް ފައިދާހުރި ގޮތުގައި ކެއުން ބައްޓަންކޮށްގެންނެވެ.

ފައިދާހުރި ހާރުކެއުމެއް މުހިންމު:

ރޯދަވީއްލާ ގަޑީގައި މާގިނައިން ކެއުން ހުއްޓުވުމަށްޓަކައި، ފައިދާހުރި ހާރުކެއުމެއް އިހްތިޔާރުކުރުން ވަރަށް މުހިންމެވެ. އެގޮތުން، ދުވަހުގައި ހަށިގަނޑަށް ބޭނުންވާ ހަކަތަ މަޑުމަޑުން ފޯރުކޮށްދޭ "ކޮމްޕްލެކްސް ކާބޯހައިޑްރޭޓްސް" ހިމެނޭ ކާނާ (މިސާލަކަށް: އޯޓްސް ނުވަތަ މުގު ފަދަ ގްރެއިންސް) އިހްތިޔާރު ކުރާށެވެ. މީގެ އިތުރުން، ބަނޑުހައިވުން ކުޑަކޮށްދީ މަސްތަކުގެ ދުޅަހެޔޮކަން ހިފެހެއްޓުމަށްޓަކައި ބިސް ނުވަތަ ޔޯގަޓް ފަދަ ޕްރޮޓީން ގިނަ ކާނާ ބޭނުންކުރެވިދާނެއެވެ. އަދި ރޯދައަށް ހުންނަ ވަގުތު ހަށިގަނޑުން ފެން މަދުވިޔަނުދިނުމަށްޓަކައި ފެން ގިނަ މޭވާ (މިސާލަކަށް: ކަރާ ނުވަތަ އޮރެންޖު) ހާރުގަޑީގައި ހިމެނުން ބުއްދިވެރިއެވެ.

ލުއި ރޯދަވީއްލުމެއް:

ރޯދަވީއްލާ ގަޑީގައި ހަށިގަނޑަށް ލުއިވާނޭހެން ކެއުން ފެށުން މުހިންމެވެ. އެންމެ ފުރަތަމަ ކަދުރު ނުވަތަ ފެނުން ރޯދަވީއްލުމަކީ ލޭގައި ހަކުރު ހުންނަ މިންވަރު އެއްވަރުކޮށްދޭނެ ކަމެކެވެ. އޭގެ ފަހުން ލުއި ސޫޕެއް ނުވަތަ ސެލެޑެއް ބޭނުންކުރެވިދާނެއެވެ. ތެލުލި ތަކެއްޗާއި ފޮނި އެއްޗެހި ވަގުތުން ކެއުމާ ދުރުހެލިވާށެވެ. ސަބަބަކީ މިފަދަ ތަކެތީގައި ކެލަރީސް ގިނަވެފައި، ބަނޑު ފުއްޕުމާއި ވަރުބަލިކަން އިހުސާސްވުމަށް މަގުފަހިވާތީއެވެ. އޭގެ ބަދަލުގައި، ފިހުނު ކުކުޅު ނުވަތަ މަސް ފަދަ ޕްރޮޓީން ހިމެނޭ ތަކެއްޗާއި، ފައިބަރު ގިނަ ތަރުކާރީ ބޭނުންކުރުމުން މާ ގިނައިން ނުކައި ބަނޑު ފުރޭނެއެވެ.

ރޯދަ ވީއްލާގޮތަށް ކާން އަވަސް އަރުވާ ނުލާތި:

ބަރުދަން ކޮންޓްރޯލް ކުރުމުގައި ކެވޭ މިންވަރަށް ސަމާލުވުމަކީ ކޮންމެހެން ބޭނުންތެރި ކަމެކެވެ. މަޑުމަޑުން ހަފައިގެން ކެއުމުން، ބަނޑު ފުރުނުކަމުގެ އިހުސާސް ސިކުނޑިއަށް ކުރަން ވަގުތު ލިބި، އިތުރަށް ކެވޭ ކެވުން މަދުވެއެވެ. އަދި ޕްރޮސެސްކޮށްފައި ހުންނަ ކާނާ އާއި، ފޮނި ބުއިންތަކާއި، ފުން ތެލުގައި ތެލުލާފައި ހުންނަ ހެދިކާ ފަދަ ތަކެތި މަދުކުރުމަކީ ބަރުދަން ލުއިކުރުމަށް އެހީތެރިވެދޭނެ ކަމެކެވެ.

ކަސްރަތާއި އެއްވަރަށް ފެން ވެސް މުހިންމު:

ބަރުދަން ލުއި ކުރުމަށް ހަށިގަނޑަށް ބޭނުންވާ ފެން ފޯރުކޮށްދިނުމަކީވެސް އެހާމެ މުހިންމު ކަމެކެވެ. ރޯދަވީއްލާ ގަޑިން ފެށިގެން ހާރާ ދެމެދު އެއްފަހަރާ ގިނައިން ފެން ބުއިމުގެ ބަދަލުގައި، ވަގުތުތަކަށް ބަހާލައިގެން އެކަށީގެންވާ މިންވަރަށް ފެން ބޯށެވެ. މީގެ އިތުރުން، ރޯދަވީއްލުމަށްފަހު ނުވަތަ ހާރުގެ ކުރިން ކޮންމެވެސް ވަރަކަށް ހިނގާލުން ފަދަ ލުއި ކަސްރަތެއް ކުރުމަކީ ހަށިގަނޑުގެ މެޓަބޮލިޒަމް ރަނގަޅުކޮށްދީ، ސަރުބީ ވިރުވުމަށް ބާރުއަޅާނެ ކަމެކެވެ.

ރަމަޟާން މަހަކީ ކެއުމުން މަހްރޫމްވާ މަހެއް ނޫނެވެ. އެއީ ދިރިއުޅުމުގެ ހުރިހާ ކަމެއްގައި މެދުމިންކަން އިސްކުރަން ދަސްކޮށްދޭ މަހެކެވެ. ސިއްހަތަށް ފައިދާހުރި ކާނާ ބޭނުންކޮށް، ކެއުމުގެ އާދަތަކަށް ސަމާލުކަން ދީގެން، މި މާތް މަހުގެ ރޫހާނީ ފައިދާ ލިބިގަންނަމުން ދުޅަހެޔޮ ގޮތުގައި ބަރުދަން ވެސް ލުއިކުރެވިދާނެއެވެ.