އެމެރިކާއާއެކު އެއްބަސްވުމަކަށް އައުމަށްޓަކައި އަދި ދަތިކުރުމުގެ ފިޔަވަޅުތަކަށް ވީހާވެސް އަވަހަށް ލުއިތަކެއް ހޯދުމަށްޓަކައި ނިއުކްލިއާ ޕްރޮގްރާމްގެ ބައެއް ކަންކަމުގައި ލިމިޓެޑް ލުއިތަކެއް ދިނުމަށް ވިސްނަން ތައްޔާރަށް ތިބި ކަމަށް އީރާނުން އިޝާރާތްކޮށްފިއެވެ.

އާ ޑިޕްލޮމެޓިކް މަސައްކަތްތަކުގެ ކުރިން ވާހަކަ ދައްކަވަމުން ޑެޕިއުޓީ ފޮރިން މިނިސްޓަރު ތަޚްތު-ރަވާންޖީ ވިދާޅުވީ އީރާނުގެ ބެލިސްޓިކް މިސައިލް ޕްރޮގްރާމަކީ މަޝްވަރާގެ ތެރޭގައި ހިމެނޭނެ ކަމެއް ނޫން ކަމަށާއި އެއްވެސް ހާލަތެއްގައި އެކަމުގައި މަޝްވަރާ އަށް ފުރުސަތެއް ނުދޭނެ ކަމަށެވެ.

އީރާނާއި އެމެރިކާ މިހާރު ތައްޔާރުވަމުން ދަނީ މި މަހުގެ ކުރީކޮޅު އޮމާންގައި މީގެ ކުރިން ބޭއްވި ބައްދަލުވުމަކާއި ގުޅިގެން އަންގާރަ ދުވަހު ޖެނީވާގައި ނުސީދާ މަޝްވަރާތަކުގެ އާ ބުރަކަށެވެ.

ބީބީސީގައި ދެއްވި އިންޓަވިއުއެއްގައި ތަޚްތު-ރަވަންޖީ ވިދާޅުވީ ފުރަތަމަ ބުރުގެ މަޝްވަރާތަކަކީ ބިނާކުރަނިވި މަޝްވަރާތަކެއް ކަމަށާއި ނަމަވެސް ކުރިއެރުމެއް ލިބޭނެ ކަމަށް ލަފާކުރަން އަދި މާ އަވަސް ކަމަށެވެ.

ޖެނީވާގެ މަޝްވަރާތަކުގައި އެމެރިކާގެ މެދުއިރުމަތީގެ މަންދޫބު ސްޓީވް ވިޓްކޯފް އާއި ޖޭރެޑް ކުޝްނަރ ބައިވެރިވާއިރު، މިފަހަރު ވެސް މެދުވެރިއެއްގެ ގޮތުގައި އޮމާން ޙަރަކާތްތެރިވާނެއެވެ.