އަތޮޅުތެރޭގައި ހިދުމަތްތައް ފުޅާކޮށް، ރައްޔިތުންނާ ގާތުން ހިދުމަތް ދިނުމަށް ކުރަމުންދާ މަސައްކަތުގެ ދަށުން ކުޅުދުއްފުށީގައި އިމިގްރޭޝަންގެ ހިދުމަތްތައް އިތުރަށް ހަރުދަނާކޮށް ފުޅާކުރުމަށްޓަކައި ގާއިމުކުރި އާ އޮފީސް މިއަދު ރަސްމީކޮށް ހުޅުވައިފި އެވެ.

ކުޅުދުއްފުށީގައި ބޭއްވި ހާއްސަ ރަސްމިއްޔާތެއްގައި މި އޮފީސް ހުޅުއްވައިދެއްވީ ޑެޕިއުޓީ ކޮންޓްރޯލަރ އޮފް އިމިގްރޭޝަން އަހްމަދު އަޝްފާން އެވެ.

މިކަމާ ގުޅޭގޮތުން މޯލްޑިވްސް އިމިގްރޭޝަނުން 'އެކްސް'ގައި ކުރި ޕޯސްޓެއްގައި ބުނެފައިވަނީ، މި އޮފީހާއެކު އެ އިދާރާގެ އޮފިސަރުންނަށް ކުރިމަތިވެފައިވާ ޖާގައިގެ ދަތިކަމަށް ދާއިމީ ހައްލެއް ލިބިގެންދާނެ ކަމަށެވެ. މީގެ އިތުރުން، މިފަދަ އޮފީހެއް ހުޅުވުމުގެ އެންމެ ބޮޑު މަގްސަދަކީ މުވައްޒަފުންނަށް މަސައްކަތް ކުރުމަށް އެކަށީގެންވާ ރަނގަޅު މާހައުލެއް ގާއިމުކޮށްދިނުމާއި، އެ ސަރަހައްދުގައި ދިރިއުޅޭ ރައްޔިތުންނަށް އިމިގްރޭޝަންގެ ހިދުމަތްތައް ފޯރުކޮށްދިނުމުގައި މިހާރަށްވުރެ ބޮޑު ލުއިފަސޭހަތަކެއް މަގުފަހިކޮށްދިނުން ކަމަށްވެސް އެ އިދާރާއިން ފާހަަގަކުރި އެވެ.

މި އޮފީހުގެ ސަބަބުން ކުޅުދުއްފުށި ސިޓީގެ އިތުރުން މުޅި ތިލަދުންމަތީގެ ރައްޔިތުންނަށް އިމިގްރޭޝަންގެ ހިދުމަތްތައް ހޯދުމުގައި ބޮޑެތި ކުރިއެރުންތަކެއް ލިބިގެންދާނެ އެވެ.