އިނގިރޭސިވިލާތުގެ ކެންޓްގެ މާގޭޓްގައި ހުންނަ ކުއީން އެލިޒަބަތު ދަ ކްއީން މަދާ ހޮސްޕިޓަލުގައި، އެންމެ ފަހުގެ ޒަމާނީ ރޮބޮޓިކް ސިސްޓަމް ބޭނުންކޮށްގެން ފުރަތަމަ ފަހަރަށް އޮޕަރޭޝަންތަކެއް ކޮށްފި އެވެ. "ހިއުގޯ" ގެ ނަމުން ނަންދެވިފައިވާ މި ރޮބޮޓިކް ނިޒާމު ބޭނުންކޮށްގެން އެންމެ ފުރަތަމަ އޮޕަރޭޝަން ކުރީ ގޮހޮރުގެ ކެންސަރަށް ފަރުވާ ހޯދަމުންދާ މެންޑީ ލީ ނަމަކަށް ކިޔާ މީހެކެވެ.
އޮޕަރޭޝަނަށްފަހު ވާހަކަދައްކަމުން ލީ ބުނީ، ރޮބޮޓެއް ބޭނުންކޮށްގެން އޮޕަރޭޝަން ކުރުމަކީ ފުރަތަމަ ކުޑަކޮށް ބިރުގަތް ކަމެއް ނަމަވެސް، އޭނާގެ އެންމެ ބޮޑު ބޭނުމަކީ ވީހާވެސް އަވަހަށް ކެންސަރުގެ ބަލިން ސަލާމަތްވުން ކަމަށެވެ. ގޮހޮރުގެ ބައެއް ނެގުމަށް އޮޕަރޭޝަން ކުރި ލީ އިތުރަށް ބުނިގޮތުގައި، މި ރޮބޮޓަކީ ޔޫރަޕްގެ އެކި ހިސާބުތަކުގައި ބޭނުންކޮށް، ކާމިޔާބު ނަތީޖާތަކެއް ހޯދާފައިވާ އެއްޗެއްކަމުގެ ޔަގީންކަން ޑޮކްޓަރުން ވަނީ އޭނާއަށް ދީފައެވެ.
މި އޮޕަރޭޝަންތައް ކުރިއަށް ގެންދިޔަ ކޮލޮރެކްޓަލް އެންޑް ޖެނެރަލް ސާޖަން ސުދާކަރް މަންގަމް ބުނީ، މިއީ އީސްޓް ކެންޓް ސަރަހައްދުގެ ބަލިމީހުންނަށް ލިބުނު ވަރަށް ބޮޑު ކުރިއެރުމެއް ކަމަށެވެ. އަދި މި އައު ޓެކްނޮލޮޖީގެ ސަބަބުން އިތުރު ފުރިހަމަކަމާއެކު އޮޕަރޭޝަންތައް ކުރެވި، ބަލިމީހުން އަވަހަށް ފަސޭހަވެގެންދާނެ ކަމަށްވެސް އޭނާ ފާހަގަރި އެވެ.
މި ރޮބޮޓުގެ ހާއްސަ ސިފަތަކަށް ބަލާއިރު، މީގައި ހަތަރު އަތް ހިމެނޭއިރު، މިއީ ޑޮކްޓަރުން ދުރުގައި ތިބެގެން ކޮންޓްރޯލްކުރާ ނިޒާމެކެވެ. މި ނިޒާމުގެ އެހީގައި ބަލިމީހާގެ ހަށިގަނޑުގެ އެތެރެ 3D މަންޒަރުތަކުން ވަރަށް ސާފުކޮށް ޑޮކްޓަރުންނަށް ފެންނަން ހުރެ އެވެ. އިނގިރޭސިވިލާތުގެ އެންއެޗްއެސްއިން މި ރޮބޮޓް އެންމެ ފުރަތަމަ ބޭނުންކުރަން ފެށީ 2023 ވަނަ އަހަރު ލަންޑަނުގަ އެވެ.
ކުއީން އެލިޒަބަތު ދަ ކްއީން މަދާ ހޮސްޕިޓަލުގައި މި ރޮބޮޓް ބޭނުންކޮށްގެން ދެވަނައަށް އޮޕަރޭޝަން ކުރީ ހާން ބޭ އަށް ނިސްބަތްވާ އުމުރުން 68 އަހަރުގެ ސްޓެންލީ ރަސަލް އެވެ. އޭނާގެ ގޮހޮރުން ފެނުނު ކެންސަރުގެ މުލިއްސެއް ނެގުމަށް ކުރި މި އޮޕަރޭޝަނާ ގުޅޭގޮތުން ރަސަލް ބުނީ، އާދައިގެ އޮޕަރޭޝަންތަކަށްވުރެ މި ގޮތް މާ ތަދުކުޑަވާނެކަން ޑޮކްޓަރުން ވަރަށް ރަނގަޅަށް ކިޔައިދިން ކަމަށެވެ. "އަހަރެން އޮޕަރޭޝަން ކުރީ ބުރާސްފަތި ދުވަހު، އަދި އާދީއްތަ ދުވަހު ގެއަށް ދެވުނު. މިހާރު ދުވަހެއް ދުވަހަކަށް ހާލު ރަނގަޅުވަމުން އަންނަނީ،" އޭނާ ބުންޏެވެ.
އެންއެޗްއެސް ގެ އަމާޒަކީ 2035 ވަނަ އަހަރު އަންނަންވާއިރު، ކެންސަރު ބަލިމީހުންނަށް ކުރާ ރޮބޮޓިކް އޮޕަރޭޝަންތަކުގެ އަދަދު އަހަރަކު 70,000 އިން 500,000 އަށް އިތުރުކުރުމެވެ. މިއީ ސިއްހީ ދާއިރާއަށް އަންނަ އިންގިލާބީ ބަދަލެއްގެ ގޮތުގައި މާހިރުން ސިފަކުރެ އެވެ.
