ޓިކްޓޮކް އިން އޮންލައިން ސަލާމަތީ ގަވާއިދުތަކާ ހިލާފުވެފައިވާކަން ހާމަކޮށް، އެ ޕްލެޓްފޯމް ބޭނުންކުރާ ފަރާތްތައް އެއަށް ދެވިހިފާ ގޮތަށް ހުންނަ "އެޑިކްޓިވް ޑިޒައިން" ނުވަތަ ފަރުމާތައް ބަދަލުނުކޮށްފިނަމަ ބޮޑު ޖޫރިމަނާއެއް ކުރާނެ ކަމުގެ އިންޒާރު ޔޫރަޕްގެ އިއްތިހާދު (އީޔޫ) އިން ޓިކްޓޮކް ކުންފުންޏަށް ދީފިއެވެ.
މި ނިންމުމަކީ ޗައިނާގެ ބައިޓްޑާންސް ކުންފުނިން ހިންގާ މި އެޕްއާ ގުޅޭގޮތުން 2024 ވަނަ އަހަރުގެ ފެބްރުއަރީ މަހުން ފެށިގެން ޔޫރަޕިއަން ކޮމިޝަނުން ކުރިއަށްގެންދިޔަ ތަހުގީގަކަށް ފަހު ނިންމި ނިންމުމެކެވެ.
ކޮމިޝަނުގެ ވަގުތީ ހޯދުންތަކުން ދައްކާ ގޮތުގައި، ވީޑިއޯތައް އަމިއްލައަށް ފެށޭ 'އޮޓޯޕްލޭ' ފަދަ ސިފަތަކުގެ ސަބަބުން ކުޑަކުދިން ހިމެނޭހެން ބޭނުންކުރާ ފަރާތްތަކުގެ ނަފްސާނީ ދުޅަހެޔޮކަމަށް ލިބިދާނެ ގެއްލުންތަކަށް ޓިކްޓޮކުން އެކަށީގެންވާ ވަރަށް ރިއާޔަތްކޮށްފައެއް ނުވެ އެވެ. އަދި މިފަދަ ނުރައްކާތައް ކުޑަކުރުމަށް އަޅަންޖެހޭ ފިޔަވަޅުތައް އެޅުމުގައިވެސް އެ ކުންފުނި ވަނީ ނާކާމިޔާބުވެފަ އެވެ.
މިކަމާ ގުޅިގެން ޓިކްޓޮކްގެ ތަރުޖަމާނަކު ބުނި ގޮތުގައި އެ ހޯދުންތަކަކީ އެ ކުންފުނީގެ ޕްލެޓްފޯމާ ބެހޭގޮތުން ހަދާފައިވާ "ކަނޑައެޅިގެން ދޮގު އަދި އެއްވެސް އަސާސެއް ނެތް" ވާހަކަތަކެއް ކަމަށެވެ. އަދި މި ނިންމުންތައް އިސްތިއުނާފު ކުރާނެ ކަމަށްވެސް އޭނާ ބުންޏެވެ.
އީޔޫގެ މި ހޯދުންތަކަށް ޖަވާބުދާރީވުމުގެ ފުރުސަތު މިހާރު ވަނީ ޓިކްޓޮކަށް ދީފައެވެ. މި މަރުހަލާގެ ނަތީޖާއަށް ބިނާކޮށް، އެ ކުންފުނީގެ އަހަރީ އާމްދަނީގެ 6 އިންސައްތައާ ހަމައަށް ޖޫރިމަނާ ކުރުމުގެ ބާރު ކޮމިޝަނަށް ލިބިގެންވެ އެވެ. މިއީ އެތައް ބިލިއަން ޑޮލަރަކަށް އަރާނެ އަދަދެއް ކަމަށް ބެލެވެ އެވެ.
އީޔޫގެ ޓެކްނޮލޮޖީ ދާއިރާގެ އިސްވެރިޔާ ހެނާ ވިރްކޫނެން ނޫސްވެރިންނަށް ވިދާޅުވީ، ޖޫރިމަނާއިން ސަލާމަތްވާން ބޭނުންނަމަ ޔޫރަޕްގައި ދޭ ހިދުމަތްތަކުގެ ޔޫއައި ޑިޒައިން ނުވަތަ ފަރުމާ ޓިކްޓޮކުން ބަދަލުކުރަން ޖެހޭނެ ކަމަށެވެ.
