ހުޅުމާލޭގައި ބިނާކުރުމަށް ހަމަޖެހިފައިވާ "ގްރޭންޑް މޮސްކް" ނުވަތަ ބޮޑު މިސްކިތުގެ އަމަލީ މަސައްކަތް 2026 ވަނަ އަހަރުގެ ސެޕްޓެމްބަރު މަހުގެ 13 ވަނަ ދުވަހު ފެށޭނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އެންމެ ފަހުން އިއްވެވި ރިޔާސީ ބަޔާނުގައި ހިމަނުއްވާފައިވާ މި ބޮޑު މަޝްރޫއަކީ ރާއްޖެ އިސްލާމްވިތާ 900 އަހަރު ފުރޭ މުނާސަބަތާ ގުޅުވައިގެން ކުރިއަށްގެންދާ ވަރަށް ހާއްސަ މަޝްރޫއެކެވެ. މި މިސްކިތް ބިނާކުރުމަށް ހަމަޖެހިފައިވަނީ ހުޅުމާލޭ ފޭސް 2 އަދި ފޭސް 3 އާ ގުޅޭ ސަރަހައްދުގަ އެވެ.
މިނިސްޓަރު ވިދާޅުވީ، މި މިސްކިތް ފަރުމާކޮށްފައި ވަނީ ހަމައެކަނި ނަމާދުކުރާ ތަނެއްގެ ގޮތުގައެއް ނޫން ކަމަށެވެ. މިއީ ވަގުފު ބިނާތަކާއި، ކޮމާޝަލް ބިލްޑިންގްތަކާއި، ޕާކިންގް ހިމެނޭ ބޮޑު ކޮމްޕްލެކްސް އެކެވެ. މި ކޮމްޕްލެކްސްގައި ހިމެނޭ ވަޤުފު އިމާރާތްތަކުން ލިބޭ ނަފާ ހޭދަކުރާނީ ރާއްޖޭގެ އިސްލާމީ ކަންތައްތައް ކުރިއެރުވުމަށެވެ. މީގެ އިތުރުން، މި ބިނާގައި ޤުރުއާން މިއުޒިއަމަކާއި އިސްލާމީ ތަޢުލީމާ ގުޅޭ މުހިންމު ވަސީލަތްތައް ގާއިމުކުރެވޭނެ ކަމަށެވެ.
Advertisement
މި މަޝްރޫއުގެ ފަންޑިންގއާ ގުޅޭގޮތުން މިނިސްޓަރު ވިދާޅުވީ، މިއީ ރާއްޖެއިން ބޭރުގެ ހެޔޮއެދޭ ފަރާތަކުން ދޭ އެހީގައި ކުރިއަށްގެންދާ މަޝްރޫއެއް ކަމަށެވެ. މިހާރު މިސްކިތުގެ ކޮންސެޕްޓް މަސައްކަތް ނިމި، ތަފްސީލީ ޑިޒައިން އެކުލަވައިލުމުގެ މަސައްކަތް ބޭރުގެ ތަޖުރިބާކާރުންގެ އެހީގައި ދަނީ ކުރެވެމުންނެވެ. ޑިޒައިނިންގް މަރުހަލާގެ ހުރިހާ ހަރަދެއްވެސް ބަލަހައްޓަނީ މަޝްރޫއަށް ފަންޑުކުރާ ފަރާތުންނެވެ.
ގާތްގަނޑަކަށް 10,000 މީހުންނަށް އެއްފަހަރާ ނަމާދު ކުރެވޭނެ ކަމަށް ލަފާކުރެވޭ މި މިސްކިތަކީ ރާއްޖޭގައި ބިނާކުރެވޭނެ އެންމެ ބޮޑު އެއް މިސްކިތަށް ވެގެންދާނެއެވެ. މިސްކިތުގެ ބިންގާ އެޅުމުގެ ރަސްމިއްޔާތުގައި މަޝްރޫއަށް އެހީތެރިކަން ފޯރުކޮށްދޭ ބޭރުގެ ފަރާތްތަކުން ބައިވެރިވެވަޑައިގަންނަވާނެ ކަމަށްވެސް މިނިސްޓަރު ވިދާޅުވިއެވެ.
