ހޮލީވުޑްގެ މަޝްހޫރު ރިއަލިޓީ ތަރި ކިމް ކާޑޭޝިއަން އާއި ފޯމިއުލާ ވަން (އެފް1) ގެ ކާމިޔާބު ރޭސަރު ލުއިސް ހެމިލްޓަން ލޯބީގެ ގޮތުން ގުޅިގެން އުޅޭކަމުގެ ހަބަރުތަކެއް ފެންމަތިވެއްޖެ އެވެ. ބޭރުގެ މީޑިއާ ރިޕޯޓުތައް ބުނާގޮތުގައި، މި ދެ ތަރިން މިހާރު އުޅެނީ ލޯބީގެ ގޮތުން ގުޅިގެންނެވެ.
މި ހަބަރުތައް އިތުރަށް ގަދަވެފައިވަނީ، މި ފަހުން މި ދެތަރިން އިނގިރޭސިވިލާތުގައި އެކުގައި ޗުއްޓީ ހޭދަކޮށްފައިވާ ކަމަށް ރިޕޯޓް ކުރުމާ ގުޅިގެންނެވެ. ނަމަވެސް، މި ދެތަރިންގެ ގުޅުމާ މެދު ގިނަ ބަޔަކު ދަނީ ސުވާލު އުފައްދަމުންނެވެ. ބައެއް މީހުން ބުނާ ގޮތުގައި މި ދެމީހުންގެ އުމުރުގެ ތަފާތު ބޮޑުވުމާއި، ދެ މީހުން ދިރިއުޅެމުންދާ މާހައުލު ތަފާތުވުމުގެ ސަބަބުން މި ހަބަރު ގަބޫލުކުރަން ދަތިވެއެވެ.
"ކީޕިން އަޕް ވިތް ދަ ކާޑޭޝިއަންސް" އިން ދުނިޔޭގެ މަޝްހޫރުކަން ހޯދި ކިމް ކާޑޭޝިއަން މިހާތަނަށް ތިން ކައިވެންޏެއް ކޮށްފައިވެ އެވެ. އޭނާ އެންމެ ފަހުން ކައިވެނިކޮށްގެން އުޅުނީ މަޝްހޫރު ރެޕް ލަވަކިޔުންތެރިޔާ ކާންޔޭ ވެސްޓްއާ އެވެ. އެ ކައިވެންޏަށް ހަތަރު ކުދިން ލިބިފައިވާއިރު، ކާންޔޭއާ ވަރިވުމަށްފަހު މިހާރު އެ ކުދިން ބަލަމުންދަނީ ކިމް އެކަނި ކަމަށް މީޑިއާ ރިޕޯޓުތައް ބުނެއެވެ.
ކިމް އާއި ލުއިސް ހެމިލްޓަންގެ ގުޅުމާ ބެހޭގޮތުން ދެ ފަރާތުން ރަސްމީކޮށް ވަކި އެއްޗެއް ބުނެފައި ނުވި ނަމަވެސް، މި ހަބަރަކީ މިހާރު ހޮލީވުޑްގައި އެންމެ ގަދައަށް ދެކެވޭ އެއް ވާހަކަ އެވެ.
ސުވާލަކީ އުމުރުން 41 އަހަރުގެ ލުއިސް ހެމިލްޓަން އޭނާގެ އަލަތު ކައިވެނި، އޭނާ އަށްވުރެ އުމުރުން ދުވަސްވީ އަދި ހަތަރު ދަރީންގެ މަންމަ 45 އަހަރުގެ ކިމް ކާޑޭޝިއަންއާއި ކުރާނެ ހެއްޔެވެ؟
