ދަރަނީގެ މައްސަލައަކީ ސަރުކާރަށް އެކަނި ހައްލު ހޯދޭނެ މައްސަލައެއް ނޫން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރާއްޖެ މިވަރަށް ދަރަނިވެރިވީ އެމްޑީޕީ ސަރުކާރުން ވައްކަންކޮށް، އިމެއް ނެތި ފައިސާ ޗާޕުކުރުމުގެ ސަބަބުން ކަމަށް މާހިރުން ބުނެއެވެ.
ދިވެހި ދައުލަތުގެ ދަރަނީގެ މައްސަލައަކީ އަދުގެ ސަރުކާރަށް އެކަނި ހައްލު ހޯދޭނެ ބާވަތުގެ މައްސަލައެއް ނޫންކަން ފާހަގަކުރައްވަމުން ނަޝީދު އެކްސްގައި ހިއްސާކުރެއްވި ޕޯސްޓެއްގައި ވިދާޅުވީ، ރާއްޖެއަށް ދިމާވެފައިވާ ދަރަނީގެ މައްސަލައަކީ މިހާރު ގައުމީ މައްސަލައެއްގެ ގޮތުގައި ބަލަންޖެހިފައިވާ މައްސަލައެއް ކަމަށެވެ.
"ދިވެހިންނަށް އަނބުރާ ދެއްކުން ނުކުޅަދާނަ މިންވަރުގެ ބޮޑު އިންޓްރެސްޓުގައި ދަރަނި ނަގައި، އެ ފައިސާއިން ކުރާ ހަމައެކަނި ކަމަކީ ކުރީގެ ދަރަނި ދެއްކުން ކަމަށްވީމަ، މި ރާއްޖެ ދަރަނީގެ ދަންތުރައެއްގައި ރަނގަޅަށް ބެދިފައިވާކަން ވަރަށް ސާފު،" --- ކުރީގެ ރައީސް މުހައްމަދު ނަޝީދު އެކްސްގައި ހިއްސާކުރެއްވި ޕޯސްޓުގައި ވިދާޅުވި އެވެ.
ނަޝީދު މި މޭރުމުން ވިދާޅުވެފައިވާއިރު، 2018 އަދި 2019 ވަނަ އަހަރު ބައިނަލްއަގުވާމީ މާލީ ބާޒާރުގައި ވިއްކާފައިވާ 500 މިލިއަން ޑޮލަރުގެ ސުކޫކަށް ދައްކަންޖެހޭ ފައިސާ މި އަހަރުގެ ތެރޭގައި އަދާކުރަންޖެހެ އެވެ.
ސަރުކާރުން އެކުލަވާލާފައިވާ 2026 ވަނަ އަހަރުގެ ބަޖެޓުގައިވާ ގޮތުން، މި ސްކޫކުގެ ތެރެއިން 450 މިލިއަން ޑޮލަރު ދެއްކުން ފަސްކުރުމަށް ވަނީ ނިންމައިފަ އެވެ. އަދި މި ސުކޫކަށް ދެއްކުމަށް ކަނޑައަޅާފައިވާ 150 މިލިއަން ޑޮލަރު އަދާކުރުމަށް ހަމަޖެހިފައިވަނީ ސޮވަރިން ޑިވަލޮޕްމަންޓް ފަންޑް (އެސްޑީއެފް) ގައި ހުރި ފައިސާ ބޭނުންކޮށްގެންނެވެ.
ރާއްޖޭގެ ދަރަނި އެންމެ ބޮޑަށް އިތުރުވެފައިވަނީ ނިމިދިޔަ އެމްޑީޕީގެ ސަރުކާރުގައި އެޅި ދެކޮޅުނުޖެހޭ ފިޔަވަޅުތަކުގެ ސަބަބުންނެވެ. އޭރުގެ ސަރުކާރުން އިންޑިއާއިން ބޮޑެތި ލޯނުތަކެއް ނަގާފައިވާއިރު، ދައުރު ނިމުނުއިރު ދައުލަތުގެ ޖުމްލަ ދަރަނި ވަނީ 120 ބިލިއަން ރުފިޔާއަށް އަރައިފަ އެވެ.
