ޖަރުމަނުގެ ފުޓްބޯޅަ ފެޑެރޭޝަނުން ފުޓްބޯޅަ ވޯލްޑް ކަޕް ބޮއިކޮޓް ކުރަން ގަސްތުކުރާ ކަމަށް ދެކެވޭ ވާހަކަތައް ޖަރުމަނުގެ ފުޓްބޯޅަ ފެޑެރޭޝަނުން ދޮގުކޮށްފިއެވެ. ޖަރުމަނުގެ ފުޓްބޯޅަ ފެޑެރޭޝަނުން އެ ކަން ދޮގުކޮށް ވާހަކަދެއްކީ ދާދިފަހުން އެމެރިކާގެ ރައީސަށް ފޮނުވި މެސެޖެއްގަ އެވެ.

ޖަރުމަނުގެ ފުޓްބޯޅަ ފެޑެރޭޝަނުން ނެރުނު ބަޔާނެއްގައި ބުނެފައިވަނީ ފީފާ ވޯލްޑް ކަޕުން އުފެދޭ ކުޅިވަރުގެ ދުނިޔޭގެ ރަނގަޅު އަސަރާއި އެއްބައިވަންތަކަން މުހިންމު ކަމަށް އެ މީހުން ދެކޭކަމަށެވެ. "އަޅުގަނޑުމެންގެ އަމާޒަކީ މި ހެޔޮ ބާރު ވަރުގަދަކުރުން. މި ހެޔޮ ބާރު ހުއްޓުވުމެއް ނޫން،" އެ ބަޔާނުގައި ވެއެވެ.

"ޑީއެފްބީ"ގެ ނަމުން މަޝްހޫރު ޖަރުމަނު ފެޑެރޭޝަނުން ވެސް ވަނީ އެމެރިކާ، ކެނެޑާ އަދި މެކްސިކޯގައި ބާއްވާ ވޯލްޑް ކަޕްގައި ބައިވެރިވާނީތޯ ނުވަތަ ބޮއިކޮޓް ކުރަންވީތޯ ބެލުމަށް އެގްޒެކެޓިވް ކޮމިޓީގެ ބައްދަލުވުމެއްގައި މަޝްވަރާކޮށްފައެވެ. މިކަމާ ގުޅޭގޮތުން "ޑީއެފްބީ"ގެ ނައިބު ރައީސް ހުށަހެޅުއްވި ހުށަހެޅުމެއް ޑީއެފްބީގެ ހިންގާ ކޮމިޓީން ވަނީ ބަލާފަ އެވެ. މި ހުށަހެޅުމަކީ މިދިޔަ ހަފްތާގައި ހުށަހެޅިފައިވާ ހުށަހެޅުމެކެވެ.

ޖަރުމަނު ފުޓްބޯޅަ ފެޑެރޭޝަންގެ ވެރިޔާއަކީ އެ ގައުމުގެ ފުޓްބޯޅަ ކްލަބެއް ކަމަށްވާ ސެއިންޓް ޕައުލީގެ ރައީސް ވެސް މެއެވެ. ރައީސް ޓްރަމްޕް ގްރީންލޭންޑާ ބެހޭ ގޮތުން ދާދި ފަހުން ދެއްކެވި ވާހަކަތަކަށް ފަހު އޭނާ ވަނީ ވޯލްޑް ކަޕް ބޮއިކޮޓް ކުރުމަށް ސީރިއަސްކޮށް ވިސްނަންވީ ވަގުތު އައިސްފައިވާ ކަމަށް ވިދާޅުވެފައެވެ.

ޑީއެފްބީން އިތުރަށް ބުނެފައިވަނީ ފެޑެރޭޝަނަކީ ސިޔާސީ ކަންކަމާއި ސަލާމަތާއި ވިޔަފާރިއާ ގުޅުން ހުރި ކަންކަމުގައި ބައިވެރިވާ ފަރާތެއް ނޫންކަމަށެވެ.

ފީފާގެ ކުރީގެ ރައީސް ސެޕް ބްލެޓާ ވަނީ މިދިޔަ ހަފްތާގައި ފުޓްބޯޅަ ސަޕޯޓަރުންނަށް ވޯލްޑް ކަޕާ ދުރުހެލިވުމަށް އަންގަވާފައެވެ. ބްލެޓާ 2018 ވަނަ އަހަރު ރަޝިޔާގައި ބޭއްވި ވޯލްޑް ކަޕް ބޮއިކޮޓް ކުރުމާ ދެކޮޅު ހައްދަވައި ވިދާޅުވީ، އެއްވެސް ގައުމެއްގައި ފުޓްބޯޅަ ބޮއިކޮޓް ނުކުރެވޭނެ ކަމަށެވެ.

އެމެރިކާއަށް ހޫނު މޫސުމުގައި ބާއްވާ ވޯލްޑް ކަޕްގެ ފެށުމުގެ ކުރިން ސަޕޯޓަރުންގެ މެދުގައި ބޮޑު ކަންބޮޑުވުންތަކެއް ހުރިކަން ފާހަގަކުރަން ޖެހެއެވެ. އެއީ ޓިކެޓުގެ އަގުބޮޑުވުމާއި އެމެރިކާއިން ވިސާ ދޫކުރުމުގައި ކުރިމަތިވާ ހުރަސްތަކާ ގުޅިގެންނެވެ. އަދި ޓްރަމްޕްގެ ވެރިކަމުގައި ބައެއް ފުޓްބޯޅަ ސަޕޯޓަރުން އެމެރިކާއަށް އެތެރެވުން މަނާވެދާނެ ކަމުގެ ބިރުވެސް ވަނީ އުފެދިފައެވެ. ނަމަވެސް ޖަރުމަނު ޓީމު ވޯލްޑް ކަޕް ކުޅެން އެމެރިކާއަށް ދަތުރުކުރާނެކަން މިހާރު ވަނީ ޔަގީންވެފައެވެ.

ޑީއެފްބީން ބުނީ 2024 ވަނަ އަހަރު ޔޫރަޕިއަން ޗެމްޕިއަންޝިޕްގައި އެމީހުންގެ ގައުމުގައި އުފާ ފާޅުކުރިފަދައިން މި އަހަރުގެ ވޯލްޑް ކަޕްގައި ވެސް ފުޓްބޯޅައަށް ތަރުހީބުދޭ މީހުން އުފާކުރަން ބޭނުންވާ ކަމަށެވެ.