އައްޑޫ ސިޓީގައި ހަރަކާތްތެރިވާ 'ސްކޫޕް' ގްރޫޕަކީ ގޭންގެއް ކަމަށް ކަނޑައަޅައިދިނުމަށް އެދި ދައުލަތުން ހައިކޯޓަށް ހުށަހެޅި މައްސަލަ އެ ކޯޓުން ބަލައިގެންފި އެވެ.
މިއީ ގޭންގްތައް ހުއްޓުވުމަށްޓަކައި އަލަށް އަމަލުކުރަން ފެށި ގާނޫނުގެ ދަށުން، ވަކި ގްރޫޕެއް ގޭންގެއްގެ ގޮތުގައި ކަނޑައަޅަން ކޯޓަށް ހުށަހެޅި ފުރަތަމަ މައްސަލަ އެވެ. މި މައްސަލަ ކޯޓަށް ބަލައިގަތް ނަމަވެސް، މައްސަލައިގެ އިތުރު ތަފްސީލެއް ކޯޓުން އަދި ހާމައެއް ނުކުރެ އެވެ.
ޕްރޮސެކިއުޓާ ޖެނެރަލް (ޕީޖީ) އޮފީހުން މި މައްސަލަ ހައިކޯޓަށް ހުށަހެޅީ ޖެނުއަރީ 15 ވަނަ ދުވަހު އެވެ. ޕީޖީ އޮފީހުން ބުނި ގޮތުގައި، 'ސްކޫޕް' ގްރޫޕަކީ ގޭންގެއް ކަމަށް ކަނޑައަޅަން ހުށަހެޅީ ފުލުހުން ހުށަހެޅި ހެކިތަކަށް ބެލުމަށްފަހު، އެ ގްރޫޕުގައި ގޭންގެއްގެ ކިބައިގައި ހުންނަންޖެހޭ ޝަރުތުތައް ފުރިހަމަވާތީ އެވެ. އަދި އެ ގްރޫޕުން މިހާރު ވެސް ކުށްކުރުމުގައި ހަރަކާތްތެރިވާ ކަމަށް ދައުލަތުން ތުހުމަތުކުރެ އެވެ.
މި މައްސަލައިގައި ދައުލަތުން ހައިކޯޓުގައި މައިގަނޑު ހަތަރު ކަމަކަށް އެދިފައިވެ އެވެ. އޭގެ ތެރޭގައި 'ސްކޫޕް' ގްރޫޕަކީ ގޭންގެއް ކަމަށް ކަނޑައެޅުމާއި، އެ ގްރޫޕަށް ނިސްބަތްވާ ނުވަ މީހަކީ ގޭންގު މެންބަރުން ކަމަށް ކަނޑައަޅައިދިނުން ހިމެނެއެވެ. މީގެ އިތުރުން އެ ގްރޫޕާ ގުޅުން އޮންނަ "އެސް ކޭ ޕީ ސްޕޯޓްސް ކްލަބް" އުވާލަން ސްޕޯޓްސް ކޮމިޝަނަރަށް އަމުރުކޮށްދިނުމަށާއި، އައްޑޫގެ އެކި ތަންތަނުގައި ލިޔެފައިވާ އެ ގްރޫޕުގެ ނަންތައް ފޮހެލަން ސިޓީ ކައުންސިލަށް އަމުރުކޮށްދިނުމަށް ވެސް އެދިފައިވެއެވެ.
މިއީ ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ގާނޫނަށް އަމަލުކުރަން ފެށިފަހުން، ފުލުހުން ޕީޖީ އޮފީހަށް ހުށަހެޅި މިފަދަ ދެވަނަ ހުށަހެޅުމެވެ. ކުރީގެ ހުށަހެޅުން ދިރާސާކޮށް ބެލިއިރު، ގޭންގެއް ކަމަށް ކަނޑައެޅުމަށްޓަކައި ގާނޫނުގައި ބަޔާންކޮށްފައިވާ ޝަރުތުތައް ފުރިހަމަވާކަމަށް ސާބިތުކުރުމަށް ބޭނުންވާވަރަށް ތަހުގީގު ފުރިހަމަވެފައި ނުވާކަން އެ އޮފީހުން ވަނީ ފާހަގަކޮށްފަ އެވެ.
ގޭންގު ހުއްޓުވުމުގެ ގާނޫނު ބުނާގޮތުން، ގްރޫޕެއް ގޭންގެއްގެ ގޮތުގައި ކަނޑައެޅުމުގެ ކުރިން އެ މީހުންނަށް ޖަވާބުދާރީވުމުގެ ފުރުސަތު ދޭންޖެހޭނެ އެވެ. ޕީޖީ އޮފީހުން ބުނީ ކޯޓުން މިކަމުގައި ގޮތެއް ނިންމުމުން، ފުލުހުންނާ ގުޅިގެން އަޅަންޖެހޭ އިތުރު ފިޔަވަޅުތައް އަޅަމުން ގެންދާނެ ކަމަށެވެ.
