ބޭންކް އޮފް މޯލްޑިވްސް (ބީއެމްއެލް) ގެ އެފޯޑަބަލް ހޯމް ލީސިން ކޮމްޕެނީން ތަރައްގީކުރާ ހައުސިން ޔުނިޓްތަކުގެ މަސައްކަތް ނިންމައި، 2028 ވަނަ އަހަރުގެ މެދުތެރޭގައި އާންމުންނަށް ދޫކުރަން ފަށާނެ ކަމަށް އެ ބޭންކުގެ ސީއީއޯ އަދި އެމްޑީ މުހައްމަދު ޝަރީފު މިއަދު އިއުލާން ކުރައްވައިފި އެވެ. ޝަރީފު މިކަން ހާމަކުރެއްވީ ދ. ކުޑަހުވަދޫގައި ބީއެމްއެލްގެ އާ ބްރާންޗެއް ހުޅުވުމަށް ބޭއްވި ރަސްމިއްޔާތުގަ އެވެ.
މި މަޝްރޫއުގެ ދަށުން ޖުމްލަ 3,260 ފްލެޓު އިމާރާތް ކުރުމަށް ވަނީ ހަމަޖެހިފަ އެވެ. މި މަސައްކަތުގެ އަމަލީ މަސައްކަތް ފަސް ކޮންޓްރެކްޓަރަކާ ހަވާލުކޮށްގެން މިދިޔަ ހަފުތާގައި ވަނީ ފަށާފަ އެވެ. މި މަޝްރޫއު ކުރިއަށްދަނީ ހުޅުމާލޭގެ ފުރަތަމަ ފޭސް އާއި ތިންވަނަ ފޭސް އަދި ވިލިމާލޭގަ އެވެ. ނަމަވެސް، މި ތަންތަން ދޫކުރާނެ ވަކި އުސޫލެއް ބޭންކުން އަދި ހާމައެއް ނުކުރެ އެވެ.
މި ފްލެޓުތައް އެޅުމުގެ މަސައްކަތް ބީއެމްއެލްގެ ސަބްސިޑަރީ ކުންފުނިން ހަވާލުކޮށްފައިވަނީ ރާއްޖޭގެ ކުންފުނިތައް ކަމަށްވާ އާރުސީސީ، އަމިން ކޮންސްޓްރަކްޝަން، އަދި އެފްޑަބްލިއު އާރުގެ އިތުރުން ޗައިނާގެ ބީޔޫސީޖީ އަދި ސީއެމްއީސީ އާއެވެ. މި މަޝްރޫއަކީ އެމްއެމްއޭގެ އިންކްލޫސިވް ނޭޝަނަލް އެފޯޑަބްލް ހައުސިން (އައިއެންއޭއެޗް) ގެ ލަނޑުދަނޑިތައް ހާސިލްކުރުމަށް ބީއެމްއެލް އިން އުފެއްދި ކުންފުނިން ކުރިއަށްގެންދާ މަސައްކަތެކެވެ.
މި ހައުސިން ޔުނިޓްތަކަކީ 'ލީސް-ޓު-އޯން' އުސޫލުން ދޫކުރާ ތަންތަނެވެ. މިއީ ކުލި ދައްކައި ނިމުމުން އެ މީހަކަށް އެ ތަނެއް މިލްކުވާ ގޮތަށް ހަމަޖެހިފައިވާ ނިޒާމެކެވެ. ހައުސިން މިނިސްޓަރު ޑރ. އަބްދުﷲ މުއްތަލިބު މީގެ ކުރިން ވިދާޅުވެފައިވާ ގޮތުގައި، މި މަޝްރޫއަށް ބޭނުންވާ ބިން ބީއެމްއެލް އަށް ދޫކޮށްފައިވަނީ ހިލޭ އެވެ.
މި ފްލެޓުތައް ލިބޭނީ ސަރުކާރުގެ ބޯހިޔާވަހިކަމުގެ ޕްރޮގްރާމަށް ކުރިމަތިލާ ފަރާތްތަކުގެ ތެރެއިން ބޭންކުގެ ޝަރުތުތައް ހަމަވާ މީހުންނަށެވެ. މިނިސްޓަރު ފާހަގަކުރެއްވި ގޮތުގައި މިއީ ބޯހިޔާވަހިކަމުގެ މައްސަލަ ހައްލުކުރުމަށް ބޭންކުން ސަރުކާރަށް ދޭ ވަރަށް ބޮޑު އެއްބާރުލުމެކެވެ.
